51
Miꞌ cꞌajtiben Dios i ñusʌntyel i mul
I tꞌan David cheꞌ ñac Natán, jini profeta tiꞌ tiqꞌui chaꞌan i mul cheꞌ ñac tiꞌ chaꞌle mulil yicꞌot Betsabé.
1 Dios, pꞌuntyañon chaꞌan cabʌl i yutslel a pusicꞌal.
Tic ñusʌbeyet a mandar. Ñusʌbeñon c mul como wen a wujil pꞌuntyaya.
2 Luꞌ pocbeñon loqꞌuel jini machꞌʌ wen tsaꞌ bʌ c chaꞌle.
Sʌc isʌbeñon c pusicꞌal chaꞌan tic chaꞌle mulil.
3 Cujil isujm tic ñusʌbeyet a mandar.
Mic ñaꞌtyan c mul ti pejtyel ora.
4 Tij contrajiyet a bajñel cheꞌ ñac tic chaꞌle jini leco bʌ ti a tyojlel.
Cheꞌ jini ti cʌcꞌʌ ti tsictiyel tyojʌch a tꞌan.
Weñʌch maꞌ chaꞌlen melojel.
5 Xmulilon ti chꞌocꞌʌyon. Añʌch c mul cꞌʌlʌ cheꞌ cʌñʌtyʌbilon tyo i chaꞌan c ñaꞌ.
6 A wom a tyaj chʌ bʌ melel tiꞌ pusicꞌal quixtyañu.
Jin chaꞌan aqꞌueñon c wen chꞌʌmben i sujmlel chʌ bʌ yes a wom.
7 Sʌc isañon ti caj c mul
Chaꞌan wen sʌc mi cajñel.
Pocoyon chaꞌan más sʌc mi cajñel bajcheꞌ sʌsʌc bʌ tyocal.
8 Ti a xulbon c bʌquel yubil. Laꞌ lajmicon chaꞌan mi cubin cꞌajacña bʌ coj.
9 Mʌctyan a wut chaꞌan machꞌan maꞌ chʌc qꞌuelbeñon c mul.
Yʌpbeñon pejtyel c mul.
10 Dios, chaꞌ melbeñon c pusicꞌal ti sʌc.
Chaꞌ tsijibtisan c chꞌujlel ti tyoj.
11 Mach a chocon loqꞌuel ti a tyojlel.
Mach a chilbeñon loqꞌuel tic pusicꞌal Chꞌujul bʌ a Chꞌujlel.
12 Chaꞌ aqꞌueñon cubin cꞌajacña bʌ coj chaꞌan j cotyʌntyel.
Aqꞌueñon c wersa chaꞌan c mel chʌ bʌ tyoj ti jumpꞌej c pusicꞌal.
13 Cheꞌ jini mi quej c pʌsbeñob a bijlel jini muꞌ bʌ i ñusʌbeñet a mandar.
Xmulilob mi quejel i sutquiñob i bʌ baꞌ añet.
14 Dios, ñusʌbeñon c mul como tic chaꞌle tsʌnsa.
Dios, cajcotyaya, mi quej cꞌʌybeñet a tyojel.
15 C Yum, jambeñon c tiꞌ
Chaꞌan mic sub a ñuclel.
16 Machꞌan maꞌ mulan tsʌnsʌbil bʌ a majtyan.
Muqꞌuic a mulan mi cʌqꞌueñet pulem bʌ a majtyan
Mach tijicñayet maꞌ qꞌueleꞌ.
17 Jini muꞌ bʌ a mulan jiñʌch cheꞌ mi lojon c pecꞌ isan lojon c bʌ.
I wenta tsʌnsʌbil bʌ a majtyan jini.
Dios, machꞌan maꞌ tsꞌaꞌlen jini pecꞌ isʌbilix bʌ i pusicꞌal muꞌ bʌ i cʌy i mul.
18 Pʌsbeñob i yutslel a pusicꞌal a chaꞌañoꞌ bʌ.
Chaꞌ melel i tsꞌajquil tyac muꞌ bʌ i joy mʌctyan Jerusalén.
19 Cheꞌ jini tijicña mi quej a qꞌuel tsʌnsʌbil bʌ a majtyan cheꞌ tyojʌch lojon c pusicꞌal.
Tijicña mi quej a qꞌuel cotyol bʌ ofrenda yicꞌot pulem bʌ.
Cheꞌ jini mi quej i yʌqꞌueñetyob tsʌnsʌbil bʌ tyat wacax yaꞌ ti yajnib pulem bʌ a majtyan.