SAMUEL-GARDA-GEBED
1 SAMUEL
GEBE-SOGLENAID
Garda-nug
Samuel-Garda-Gebed. We-garda sogabo narmaklesad. Samuel, Elí-sorbali, napi Israel-dulamarga igar-nabogedga megisad, degi, Bab-Dummad-gayaburba-barsogedga megisbalid. Samuel-nug obarileged, Bab-Dummadse-egislegaledye.
Samuel-Garda-Gebedgi weyob sunmaklenaid
We-gardagine, dulemar-e-warbaagwadgi sunmaklenaid: Samuel, Saúl, degine, David. Samuel-ibagansega, dule-igar-nabomalad-negsemaladi bergunonikid. Degi, Samuel dule-walabo reyga onug-imaksad. We-rey-gwensak Saúlʼye nugad. Baiddi, Davidʼye nugad.
We-gardagine, weyob ilemakar sunmaklenaid:
1. Samuel-gwalulesad (1:1–2:11).
2. Samuel, Bab-Dummad-Gayaburba-Barsogedga gunonikid (2:12–3:21).
3. Bab-Dummad-Igar-Mesisad-Ulu (4:1–7:1).
3a. Bab-Dummad-Igar-Mesisad-Ulu-sulesad (4:1-22).
3b. Filistea-dulemar Bab-Dummad-Ulu gannar Israel-yarse barmismalad (5:1–7:1).
4. Israel-dulemar rey-igar onosmalad (7:2–16:13).
4a. Samuel, Israel-dulemarga igar-nabogedga megisad (7:2-17).
4b. Israel-yargi gebe-rey-megsokalid-igar (8:1–12:25).
4c. Saúl, Reyga-megisgu, ibmar imaksad (13:1–15:35).
4d. David, Saúl-anar Reyga nug-imaklesad (16:1-13).
5. David, Goliat-oburgwisad (16:14–17:58).
6. Saúl, Davidʼgi nobgusad, degi, isdardaksabalid (18:1–27:12).
6a. Saúl, Davidʼgi nobed (18:1-30).
6b. Saúl, David-oburgwebied (19:1-24).
6c. Jonatán, Davidʼbo ai-nuedid (20:1-42).
6d. David, Saúlʼgi wakichad (21:1–27:12).
7. Saúl, ner-bundor-Endorʼginedse idaksad (28:1-25).
8. David, Filisteaʼmargi, degi, Amalecʼmargi ibmar imaksad (29:1–30:31).
9. Saúl-burgwisad (31:1-13).
Be itogua.
1. SAMUEL-GWALULESAD
1
(1:1–2:11)
Ana Babse-mimmi-egichisad
1 Efraín-yalaganba, Ramataimʼgi Suf-dule-wargwen maigusad. A-dule, Elcanaʼye nugad, Jeroham-e-machid. Jerohamʼdi, Eliú-e-machid. Eliúʼdi, Tohu-e-machid. Tohuʼdi, Zuf-e-machid. Zufʼdi, Efrateo-duled. 2 Elcana ome-warbo nikad: Wargwendi, Anaʼye nugad, baiddi, Peninaʼye nugad. Peninaʼdi mimmigan nikad, ar Anaʼdi mimmigan sated.
3 Birga-irba, Elcana, Bab-Jehová-Bela-Gangued-Nikad-e-nug-odummogega, e-neggwebur-akar Silo-neggweburse ardaed. Agine, Bab-Jehováʼga ibdurgan-ogumakar-ukleged ukdaed. Deunni, Elí-e-machimala-warbogwad, Ofniʼye-nugad, degi, Fineesʼye-nugad, Siloʼgi dule-irwa-Bab-Dummadse-gormaladga mamaid. 4 Ar ibdurgan-ogumakar-ukleged-ibagan-mosale, Elcana, e-ome-Peninaʼga, degi, bela e-mimmiganga igar-soglesmaidba Bab-Jehováʼga-ibdurgan-ogumakar-ukleged-e-goamar ukdaed. 5 Bab-Dummad Ana-mer-mimmi-nikuega-imaksa-inigwele, Elcana amba Ana-nue-sabdaed. A-ulale, ega ibdurgan-ogumakar-ukleged-e-goa-bur-nued ukdaed 6 Ar Bab-Jehová Ana-mer-mimmi-nikuega-imaksadbali, e-isdarad-Penina, Ana-ourwega yamo egi dodoardaed.
7 Ar birga-irba, Bab-Dummadse-goled-negse nadmalale, Penina degibi Ana-imakardaed. Penina Anaʼgi dodoardasoggu, Anaʼdi boardasunnad, bar mas-gunbidasulid. 8 Geb degine, e-sui-Elcana ega sokardaed: “Ana, ¿ibiga be boardae? ¿Ibiga be mas-gunbisurdae? ¿Ibiga be nue-wile-itodae? ¿Ar ande, machimala-warambe-nikulegedba (10), bur bega nuedsursi?”
9-10 Ibagwengi, Ana, Silo-neggweburgi Bab-Dummadse-goled-neggi mas-guchad-sorbali, Bab-Dummadse-golega gwisguded. Agine, Anaʼdi bela-bela ulubgi-nunmak-itogedba, Bab-Jehováʼse isedar-boar gorsii gusad. Deunni, dule-irwa-Bab-Dummadse-goled Elíʼye-nugad, Bab-Dummadse-goled-neg-e-yawagak-dikarba siid.
11 Geb degine, Ana Bab-Jehováʼga ise-sogar sogded:
“Bab-Jehová-Bela-Gangued-Nikadye, Andi be-mai-wilegedid. Be an-dake, an nue wile-itodiid, mer be an-iege. Bab-Jehováʼye, be anga machi-wargwen-ukele, na degisadegu bega-arbaega an imakoed. E-sailagia, bipisaale ei siklegosulid.”
12 Ar Ana, Bab-Jehováʼse suitii gorsigusad. Degisoggu, Elí, Ana-e-gaya nuu daksii gusad. 13 Ar ade, Ana binnasuli Bab-Dummadse-gorsisulid. Unnila e-gaya arbo-arbo imaksiid. Degidbali, Elí, Anaʼgi binsaded, mummu-an-dakye. 14 Geb Elí, Anaʼga sogded:
—¿Ar sana be dadakguoe? ¡Vino-gobed ies be imake!
15 Ana abin-sogded:
—Dummad, degisuli. Vino an gobsasulid, inna-gagbid an gobsasurbalid. Unnila gwage-naibi an itoged. A-ulale, an Bab-Jehová-asabin, ulubgi-naibi-itogedgi an gorsiid. 16 Mer ome-isganayob be an-dake. An-wile-itoged-ular, undar-suitisaar Bab-Jehováʼse an gorsii gusad.
17 Elí abin-sogded:
—Mer bar be bukib-binsao, nuedgi be nae. Israel-e-Bab-Dummadse be ibmar-egichisadi, na e bega ukena gadin.
18 Ana abin-sogded:
—Doggus-nuedi. Bitigi be nued angi-binsadigusana gadin.
Weyob Ana sogsagu, nadegusad. Geb agi na mas-gundapid. Agine, Ana bar wile-itossulid. 19 A-bangine, Elcana na e-omeganmala wakudaryalaba gwisgusad. Geb Bab-Jehová-e-nug-odummosad-sorbali, na gannar e-negse Ramá-neggweburse nonimalad. Geb a-sorbali, Elcana, Anaʼse gochad. Agine, Bab-Jehová, Anaʼgi nued-binsasad.
Ana Bab-Jehováʼga Samuel-uksad
20 Geb Ana gurgin-nika gunonikid. Na ugakgued-e-iba nagunonigua, ega machigwa uklenonikid. “Ar Ana Bab-Jehováʼse egichadbali, Samuelʼye onugsasad.”
21 Ar Elcana, e-ome-Penina, degi, e-mimmiganmala aligusmalad, Bab-Jehováʼga ise-sogar-sogsadba ibmar-ukega, degine, ibdurgan-ogumakar-birga-irba-ukleged ukbaligar. 22 Anaʼdi wemarba aligussulid, ar e-sui-Elcanaʼga sogsad:
—Machi-bipi mam-iarguedse, Bab-Dummadse-goled-negse, Bab-Jehováʼga-oyogega an nidoed. Geb agine, machi-bipi Bab-Dummadga-arbaega degisadegu gudii guoed.
23 E-sui-Elcana abin-sogded:
—Degirdi nabirdo. Be-sogedba be imakdo. Machi-bipi-mam-iarguedse be nasunnodo. Bab-Jehová bega-ibmar-imakoye-sogsad bega imaksun.
Degisoggu, Ana e-neggi besad. Geb mam-iargusadse e-machi-bipi-odummosad. 24 Ana, Samuel-mam-oiar-imaksagua, Elcanaʼbo Silo-neggweburse Bab-Jehováʼse-goled-negse Samuel-sesmalad. Ana, moli-bebe-nikad-machered-birgapaa-nikad sesad. Deginbali, madubur nibir-dulagwen-gakabo (22) sesbalid, buglugi vino-sesbalid. Deunni, Samuel amba bipigwad. 25 Modapmargua, moli-bebe-nikad-selealid oburgwismalad. A-sorbali, Ana, Elíʼga machi-bipi sesmalad ega-oyogegar. 26 Geb Ana, Elíʼga sogded: “Dummad, inniki an bega soged, ar ani an be-walik Bab-Jehováʼse gorsigusadid. 27 We-machi-bipi Bab-Jehováʼse-an-egichisgusadi, emide, anga uksad. 28 Emisgindi, machi-bipi an Bab-Jehováʼga uked. Burgwedsega, Bab-Jehováʼga degisadegu ibmar-imakdii guoed.” Geb agine, Elí Bab-Jehová-nug-odummogega, napase wagar-dulluu imaksad.