TESALÓNICA-DULEMARSE-NARMAKLESAD-GARDA-SOGBOGWAD
2 TESALONICENSES
GEBE-SOGLENAID
Garda-nug
Pablo gwenadgan-Tesalónica-neggweburgi-bukmaladga garda barmisgusad. A-sorba, garda-baid abgasaar barmisbalid, ar ade, bukidar binsamalad, Jesús bato gannar we-napnegse noniye.
Binsamardo, we-garda birga 51ʼgi narmakles-insaye.
Tesalónica-Dulemarse-Narmaklesad-Garda-Sogbogwadgi weyob sunmaklenaid
Pablo, gwenadganga sogsado, Jesús gannar we-napnegse gwen nonisurye, Jesús-daged-iduale, ibmar-sogbo gugwelergebye: Gebedgi, dulemar bela-bela Bab-Jesúsʼgi bangudmaloye. Sogbogi, dule-isgana nonikoye, yamo Cristoʼyobi na san imaknonikoye. We-duledi, Cristoʼsurye. Geb degine, Bab-Jesús we-napnegse nonikoye.
Deginbali, gwenadgan-Tesalónicaʼgi-bukmalad gwenna-gwenna yapa arbamaladbali, Pablo gwenadganga sogdo, bemar arbamalargebye, ar degisulile, mer masgi ogunmaloye.
We-gardagine, weyob ilemakar sunmaklenaid:
1. Gebe-sikwas-soglenaid (1:1-2).
2. Pablo, Tesalónicaʼginmaladga Babse goled (1:3-12).
3. Pablo, Tesalónicaʼginmalad unasiid (2:1–3:15).
3a. Dule-isgana-nonikoed (2:1-12).
3b. Bab-Gayaburba-nasguega Babse goled (2:13–3:5).
3c. Arbaed-igar-maid (3:6-15).
4. Napi-soglenaid (3:16-18).
Be itogua.
1. GEBE-SIKWAS-SOGLENAID
1
(1:1-2)
Anmar Pablo, Silvano, degi, Timoteo, bemar-Jesúsʼba-nanaimalad-danar-Tesalónica-neggweburgi-ambikunonidamaladga, garda narmakmalad. Bemar Bab-Dummadgi, degi, Bab-Jesucristoʼgi-akananaimalad.
Anmar-Bab-Dummad, degi, Bab-Jesucristo, bemargi nued binsamarsun, degi, e-ulubgi-bogidik bemarga uksabarsun.
2. PABLO, TESALÓNICAʼGINMALADGA BABSE GOLED
(1:3-12)
Gwenadgan, anmar bemar-ular gusgu Bab-Dummadga dog-nuedye sogergebed. Ar deyob anmar sogele, wede ibnuedid, ar bemar Cristoʼgi-bensulid-nikad bur bule nasgumaid, deginbali, na bemar muchub-muchub-sabgued bur bule nasgumaibalid. Degisoggu, anmar Bab-Dummadba-nanaimalad-danar-ambikunoni-damalad-abargi bemargi sunmakalile, anmar bemarba nug-dummarba itodamalad. Ar be-baregilledimalad-abargi, degine, ise-solegagwar-gudimalad-abargi, na be san-bargadimalad, degi, Jesúsʼgi-bensulid nue oyodimalad. Bela weyob ibmar-guedi nue oyonaid, Bab-Dummad igar-nabogedi bela innikigwadba imakye. Degisoggu, Bab-Dummad e-negdakmaidse bemar nabir-dogega be-imaknanaid. Ar a-ular, bemar sabsur-wiledimalad.
Ar Bab-Dummad dule-innikigwadsoggu, emi dulemar-be-wiodimalad, Bab-Dummadse sabsur-odurdaklemarmogoed. Ar bemar-naibi-itodimaladgardi Bab-Dummad obunnoged ukoed, ar igi anmarga obunnoged ukmogoe. Ar Bab-Jesús nibneggi e-baliwitur-dutusurmalad-abargi, soo-gwabunye-danikid-abalagi-danikir, we-ibmar weyob guoed. Bab-Jesús, dulemar-aku-Bab-Dummad-dakdimalad-sabsur-odurdakega, degi, dulemar-anmar-Dummad-Jesucristo-e-Gayaburba-Nuedba-nanadisurmalad sabsur-odurdakega, danikoed. A-dulemar degisadegu odurdaklesii gumaloed, Bab-Jesús-e-maidgi dikasur-bangu barmelledmaloed, gwen Bab-Jesús-yeerdakleged-e-gangued dakosurmalad. 10 Bab-Jesús gannar danikir, weyob we-ibmar guoed. A-ibagi, bela Jesúsʼba-nanaimalad-gwage-swilidikmalad Bab-Jesús-nug odummomaloed, degi, bela Jesúsʼgi-bengussurmalad geger Jesús-dakmaloed. Ar bemar amar-abargi nanaimogad, ar ade, anmar bemarga Jesúsʼgi-sunmaksagua, bemar bengussurmalad.
11 A-ulale, anmar bemarga Bab-Dummadse bali-bali gordimalad, adi, anmar-Bab-Dummad eba-naguega bese-gochadi nabir be-dagmalagar. Anmar Bab-Dummadse egisbalid, bitigi Bab-Dummad na e-gangued-nikadba bela bemar ibmar-nuegan-abedimalad bemarga ukena gadinye. Deginbali, bitigi bemar Jesúsʼgi-bensulidgi-arbaed-imakdemalad bemarga obelosana gadinye. 12 Anmar weyob Bab-Dummadse gormalad, adi, deyobi anmar-Bab-Jesucristo-e-nug bemarba dunguoed. Jesucristo anmar-Bab-Dummad-sabgued-dummarba-nikadba, degi, na e dulemargi-nabir-binsaedba, bemar-nug odunguoed.