ESDRAS-GARDA
ESDRAS
GEBE-SOGLENAID
Garda-nug
Esdras-Garda. Esdras, dule garda-narmaked-duled, degi, Israel-e-Bab-Dummad-Jehová Moisésʼba-Igar-uksa-gusad nue-wisbalid. Bab-Dummad-dule-bendakedye, Esdras-nug obarileged.
Esdras-Gardagi weyob sunmaklenaid
We-garda, Nehemías-gardabogwa soggwenna guenad. Neggusmaladi, ibagan-sekalaa-gusmarye sogleged. Amba emar-emargii sunmaklenai-inigwele, bur bule na e-ibmar-sogbiedgi akargusiid. Esdras odurdakedsailaye gin-sogleged. Bur Bab-Dummad-walikaa-gudigumalaga emar-odurdaksa gusad.
We-gardagine, Persa-e-rey-Ciroʼgi iduakwaa sunmaklesgusad. We-reyde gebe-megided-birgagi, Cristo-idu birga-538ʼgi, Judíoʼmar-Babiloniaʼgi-bukwamaladga igar-uksagusad, gannar e-yarse namalagar. Judío-dulemar e-yarse-nonimargu, gannar Bab-Jehováʼga Jerusalén-neggweburse neg-sobnonimalad. Adi, Bab-Jehováʼse-gordii gumalagar.
We-gardagine, weyob ilemakar sunmaklenaid:
1. Israel-dulemar gannar e-yarse-nadmalad (1:1–2:70).
2. Bab-Jehováʼse-goled-neg sobsamalad (3:1–6:22).
3. Esdras Jerusalén-neggweburse nonikid (7:1–8:36).
4. Esdras-e-arbaed (9:1–10:44).
Be itogua.
1. ISRAEL-DULEMAR GANNAR E-YARSE-NADMALAD
1
(1:1–2:70)
Rey-Ciro-igar-uksad
(2 Crónicas 36:22-23)
1 Rey-Ciro, Persia-yar-e-reyga maigusad. Ciro-gebe-reyga-megided-birgagi, Bab-Jehová, Rey-Ciro-e-gwage ebusad, adi, bela e-yar-dakmaidgi igar-mesegar. Adi, we-igar-megoedba, nabir Bab-Jehová Jeremíasʼba gayaburba-sogsadba guegar. Degine, Rey-Ciro bela yar-ganikidgi igar-mesisad sogsa gusad, degi, gardagi-narmakar imaksabalid. Weyob sogsad:
2 “Persia-rey-Ciro weyob soged:
” ‘Bab-Dummad-Jehová-Nibneggi-Maidi, anga we-napneg-dirbir-naidgi bela yarmar-nanaid uksad. Degi, anga sogsabalid, Judá-yargi Jerusalén-neggwebur-siidgi ese-goled-neg ega soboye. 3 Degisoggu, anmar-abargi-Judá-dulemar-gudimalad Jerusalén-neggweburse be namar. Israel-dulemar-e-Bab-Dummad-Jehováʼga ese-goled-neg be sobnamar. We-Bab-Dummadde, Jerusalénʼgi maid. Degi, a-Bab-Dummad bemarba naena gadin. 4 A-ukinbali, an igar-ukbardo, dule-bamaladi Judío-dulemar-amba-gudidimalad-bendakega we-ibmar ukmalo: Mani, olo, ibmar-nuegan, degi, e-ibmar-durgan ukmalo. De-ukinbali, dulemar Bab-Dummadga-ibmar-ukleged e-binsaedba Bab-Dummadse-goled-negga ukbalo.’ ”
Israel-dulemar gannar e-yarse nonimalad
5 Degidgine, Judá-wagan-e-dummagan-neguya-sedimalad, Benjamín-wagan-e-dummagan-neguya-sedimalad, dule-irwa-Bab-Dummadse-gormalad, degi, Levita-dulemar, degi, Bab-Dummad bela dule-gwenna-gwenna-e-gwage-ebusmaladmala, amar Jerusalén-neggweburse Bab-Dummadse-goled-neg-sobnaega guakwaa ambikusmalad. 6 Bela dulemar e-neg-nagaba-mamaimalad bendaksamarmogad. We-ibmarmar ega uksamalad: Mani, or, ibmar-nuegan, ibmar-durgan, degi, ibmar-gargerbamalad ega uksamalad. Deginbali, dulemar, bela ibmarmar-akar-akar e-binsaedba Bab-Dummadse-goled-negga uksamarbalid. 7 Epenne, Jerusalénʼgi Bab-Jehováʼse-goled-neggi-ibmar-ebulemalad, Nabucodonosor Babiloniaʼse sear gusad. Geb e-bab-dummadse-goled-negse urbenoni gusad. Emide, a-ibmarmar Persa-rey-Ciro onisad. 8 Degi, Persia-rey-Ciro, e-mani-daked-Mitrídatesʼga ibmar-onilesmalad uksad, adi, ebisegar. Bela ebichisgu, Judá-dulemar-e-dummad-Sesbasarʼga we-ibmarmar uksad.
9 Ar ibmar-ebislesmalad, wemalad:
Bate-dummagan-orbiid, gwadulagwen-gakambe (30).
Bate-dummagan-manibiid, miligwen (1,000).
Estin, gadulagwen-gakabakebak (29).
10 Nog-orbiid, gwadulagwen-gakambe (30).
Nog-manibiid, gwadulataled-ilabake gakambe (410).
Degi, ibmar-baigan-ebulemalad, miligwenba (1,000).
11 Ibmar-ebulemalad-orbiid, degi, manibiid, bela miliatar gaka dulataled-ilabake-mergu (5,400) daklealid. Bela we-ibmarmar Sesbasar gannar Jerusalén-neggweburse sesa gusad, deun Judá-dulemarga soglesgu, bemar gannar Babilonia-neggweburgi-bukwad Jerusalén-neggweburse namaloye.