HAGEO-GARDA
HAGEO
GEBE-SOGLENAID
Garda-nug
Hageo-Garda.Iba-nonaidgi-gwalulesadye, Hageo-nug obarileged.
Hageo-Gardagi weyob sunmaklenaid
Hageo, Judá-yalagi bur bule Bab-Dummad-gayaburbagi sunmakdii gusad. Deunni, Zorobabelʼba dulemar-Babiloniaʼgi-gales-bukwad bato gannar Judá-yarse nonimalad. Ibagan-nasad-sorbali, dulemar Jerusalén-neggweburgi neg-dummagan-yeerdaklemalad sobdemalad. Bab-Dummadse-goled-neg-sobeddi, ied gusmalad.
We-gardagine, weyob ilemakar sunmaklenaid:
1. Bab-Jehová ese-goled-neg-sobega igar-uknaid (1:1-15).
2. Bab-Jehováʼse-goled-neg-binid-yeerdakleged (2:1-9).
3. Galagwensur-damaladga sabsur-ibmar-soged (2:10-19).
4. Bab-Jehová, Zorobabelʼga ibmar-imakoye sogsad (2:20-23).
Be itogua.
1. BAB-JEHOVÁ ESE-GOLED-NEG-SOBEGA IGAR-UKNAID
1
(1:1-15)
Rey-Darío birgabogus negdakmaidgi, nii-walanergwad gebe-e-iba-onodedgine, Bab-Jehová Judá-yar-dakmaid-Salatiel-machi-Zorobabelʼse, degi, dule-irwa-Babse-goled-bur-dummad-Josadac-machi-Josuéʼse, e-gayaburba-barsoged-Hageoʼye-nugadba e-gayaburba barmialid. Weyobi sognaid:
“Bab-Jehová-Bela-Gangued-Nikad weyob sogye: ‘We-dulemar soged, gannar Bab-Jehováʼse-goled-neg-sobegala amba yoo e-ibagan warmakye.’ ”
Bab-Jehová, e-gayaburba-barsoged-Hageoʼba weyob sogsabalid:
“Ar bemardi neg-nuegangi mamaid,
degite, an-negdi amba bela bibisgar siid.”
Bab-Jehová-Bela-Gangued-Nikadi, weyob soged:
“Bemar-ibmar-imaknanaidgi be nue binsamar.
 
”Bemar ibmar-durba bukidar makenad,
degi-inigwele, ichee wis be wemalad.
Be mas gunmalanad,
degi-inigwele, amba be ukudmaada itodamalad.
Be gobmalanad,
degi-inigwele, amba be uku-uku itodamalad.
Be mor yodamalanad,
degi-inigwele, amba be dambe itodamalad.
Arbasadgi be-mani-bennuklegedi,
ibmar-bakega amba bega unnisurdaed.”
Bab-Jehová-Bela-Gangued-Nikad weyob sogbalid:
“Bemar-ibmar-imaknanaidgi be nue binsamar.
 
”An-neg gannar-sobega, bemar sapurba urgo aminamala.
Anse-goled-neg-soblegoedi an yeerdakoed.
Agine an-gangued-yeerdakleged an oyogoed.
Ani Bab-Jehová deyob soged.
 
”Bemar ibmar-bukidar abitodimalanad,
degi-inigwele, wis be ichee ibmar abingamalad.
Bemar na neggi ibmar-sabomaladi, an bemar-ibe yoga-obelogar imaked.
¿An ibiga deyob imaksa?
‘Ar an-neg bela bibisgar-siid-ular, an deyob imaksad.
Bemardi, unnila be-negginbi be binsamalad.’
Ani Bab-Jehová-Bela-Gangued-Nikad deyob soged.
10 ”Degisoggu, bemar-ulale, dii bar wisulid, degi, napneggi geg bar ibmar sanmakbalid 11 Ani an wemargi mer bar dii-wiega imaksad:
Orosyob-dakleged-trigo-digar-nanaidgi,
uva-digar-nanaidgi,
olivo-gwallu-nuegan-digar-nanaidgi,
ibmar-durbamar-digarmaladgi,
dulemar-bukwadgi,
ibdurgan-bukwadgi,
degi, dulemar-e-ibmarmar-imakmaladgi,
ani an mer bar dii-wiega imaksad.”
12 Geb degine, Salatiel-machi-Zorobabel, degi, dule-irwa-Babse-goled-e-dummad-Josadac-machi-Josué, deginbali, bela dulemar e-Bab-Dummad-Jehováʼba ibsasmalad. Ar igi Bab-Dummad na e-gayaburba-barsoged-Hageoʼga ibmar-sogsadi, dulemar itosmalad. Geb dulemar Bab-Jehová dobgudmalad. 13 Geb degine, Bab-Jehová-gayaburba-barsoged-Hageo, Bab-Jehová ega ibmar-sogsadi, dulemarga sogded: “Bab-Jehová sogye, an beba gudimarye.” 14 Weyobi Bab-Jehová Judá-yar-dakmaid-Salatiel-machi-Zorobabel-ogannosad, degi, dule-irwa-Bab-Dummadse-goled-e-dummad-Josadac-machi-Josué-ogannosad, deginbali, bela-dulemar-ogannosbalid. Geb bela wemar, e-Bab-Dummad-Jehová-Bur-Gangued-Nikad-e-neg-sobmalaga arbadmalad. 15 Deunni, Rey-Darío birgabogus negsemaid. A-Nii-walanergwagi, e-iba-durgwen-gakabakegi neg sobdemalad.