MARCOS-GAYABURBA-NUED
MARCOS
GEBE-SOGLENAID
Garda-nug
Marcos, Bab-Dummad-Burba-Isligwaledba, we-Gayaburba-Nued narmaksad. Adi, Judíoʼsurmaladga-oyogega, we-Jesús, Bab-Dummad-Machi-sunnadye. Marcos, Jerusalénʼginedid, Judío-duled. We-dule, Juan-Marcosʼye bimarbalid. Marcos Jesús-sapingan-warambe-gakabogwad-sordaga gussulid. Binsamardo, we-garda birga 57-63ʼgi narmakles-insaye.
Marcos-Gayaburba-Nuedgi weyob sunmaklenaid
Jesús bela-bela gangued-nikadbali, degi, igar-nikadbali ibmar-dakledisulidi imakdii gusad. Jesús niamarba bur gangued nikad, degi, dulemar-isgued-eliega gangued nikabalid. Degine, Marcos anmarga sogbalid, Jesús nakrusgi dulemar-isgued-ular burgwisye, ibapaagine gannar durgusbarye.
Jesús we-napneggi-gudigusgu, Marcos deun sapingwaa gued. Pablo, Bernabé-ebo Bab-Jesús-igargi sunmakega barmilesgu, Marcos eba nadegusmogad. Marcos eba nadegusmogu, deunni gannar bilisgusad. (Gusmalad 13:13) A-sorba, Bernabéʼba Marcos nadegusbalid. (Gusmalad 14:37-39) Degine, Marcos, Pedroʼbali arbadii gusbalid. Napidgine, Marcos, Pablo-bendakdii gusad. (2 Timoteo 4:11)
We-gardagine, weyob ilemakar sunmaklenaid:
1. Diigi-dule-oged-Juan Bab-Igargi sunmaksad (1:1-8).
2. Jesús-gebe-e-arbaed-imakded (1:9-15).
3. Jesús, Dule-Wargwen-Barmiledagoye (Mesías) soglesad (1:16–8:30).
3a. Jesús-ibmar-imaksad, degi, ibmar-odurdaksad (1:16–3:12).
3b. Bab-negsemaidgi sunmaklenaid (3:13–6:6).
3c. Jesús sogsad, ede, Mesías, Dule-Wargwen-Barmiledagoye soglesadye (6:7–8:30).
4. Jesús, Dule-Machi gued (8:31–16:20).
4a. Jesús na e-burgoedgi iduakwaa sunmaksad (8:31–11:11).
4b. Jesús, Jerusalénʼgi ibmar-imaksad (11:12–13:37).
4c. Jesús-wilesad, e-burgwisad, degi, e-gannar-durgusad (14:1–16:20).
Be itogua.
1. DIIGI-DULE-OGED-JUAN BAB-IGARGI SUNMAKSAD
1
(1:1-8)
Diigi-dule-oged-Juan, Bab-Dummad-Machi-idu igar-mayenonikid
(Mateo 3:1-12; Lucas 3:1-9, 15-17; Juan 1:19-28)
1 Jesucristo, Bab-Dummad-Machi, egi-gayaburba-nued-sunmaklesad, weyobi onoded.
2 Igi Bab-Dummad-gayaburba-barsoged-Isaías-e-gardagi-narmakar-naiyob, ibmar gusad:
“An be-iduale, anga-gayaburba-berbeged an barmided,
we-dule, be-iduale bega igar-mayoed.”
3 “Dule-wargwen nega-dulesulidganba binnasur goled:
‘Dule-Dummad-idu igar-mayemar,
igar-swilidik mesmar.’ ”
Isaías 40:3; Malaquías 3:1
4 Weyobi Diigi-dule-oged-Juan nonikid, nega-dulesulidganba Bab-Dummad-diigi-ogleged-igar imaknonikid, degi, weyobi sunmaknonikid: “Bemar na be-isguedga ulubgi bukib binsamar, be-daed be ogwamar. Bab-Dummad be-isgued bega eliega, Bab-Dummad-diigi-ogleged-igar be imakmar.”
5 Bela Judea-yalaganbarmalad, degi, bela Jerusalén-neggweburginmalad, Diigi-dule-oged-Juanʼse nonidamalad. Na e-isgued dukin barsogsamalale, Juan, Jordán-diwargi, Bab-Dummad-diigi-ogleged-igar ega imakdaed. 6 Diigi-dule-oged-Juan moli-yargan-mureged-e-absar na morga imakdii gualid, degi, moli-uka e-molidubga imakdii guarbalid. Sese, degi, achanis e-masga imakdii gusbalid.
7 Juan weyob dulemarga sunmakdii gualid: “An-sorbali, dule-wargwen anba bur-gangued-nikad danikid. Amba an e-sapat-dubse-bakar, geg ei an esiked. 8 Andi Bab-Dummad-diigi-ogleged-igargi, unnila diigi an be-ogsamalad. Dule-an-sorba-danikiddi, Bab-Dummad-Burba-Isligwaledgi be-ogmaloed.”
2. JESÚS-GEBE-E-ARBAED-IMAKDED
(1:9-15)
Diigi-dule-oged-Juan, Bab-Dummad-diigi Jesús-ogsad
(Mateo 3:13-17; Lucas 3:21-22)
9 A-ibagangi, Jesús Galilea-yargi, Nazaretʼye-neggwebur-nugadgi gudiid. Agi gudiidgi, Jordán-diwarse nadegusad. Geb a-diwargi Diigi-dule-oged-Juan Bab-Dummad-diigi-ogleged-igargi Jesús-ogsad. 10 Jesús diwargi nakwiargu, nibnega argad daksad, degine, Bab-Dummad-Burba-Isligwaled nuuyobi egi aidedani daksad. 11 Degidgine, nibneggi gayaburba gollalid, sogded: “Be, An-Machi-sabedid. An beba weligwar itoged.”
Jesús, nia-sailase wilubdaklesad
(Mateo 4:1-11; Lucas 4:1-13)
12 A-sorbali, Bab-Dummad-Burba-Isligwaled nega-dulesulidganba Jesús-sesa gusad. 13 Agi Jesús iba-dulabo (40) ibmar-durgan-abargi gudigusad. Agi nia-saila-Satanás Jesús-wilubdaknai gualid. Baliwiturmar Jesúsʼga ibmar-imaknai guarmalad.
Jesús, Galilea-yargi e-arbaedgi arbaded
(Mateo 4:12-17; Lucas 4:14-15)
14 Diigi-dule-oged-Juan-esgaryagi-metemalad-sorba, Jesús Galilea-yarse Bab-Dummad-e-negdakmaid-gayaburba-nuedgi sunmakega nonikid. 15 Jesús sogdii gualid: “Ibagandi nonisun, Bab-Dummad-e-negdakmaid anmarse warmaknonisun. Degisoggu, be-isgudiidga na be wile itomar, degi, Bab-Dummad-Gayaburba-Nued, bensulidgi be abingamar.”
3. JESÚS, DULE-WARGWEN-BARMILEDAGOYE (MESÍAS) SOGLESAD
(1:16–8:30)
3a. Jesús-ibmar-imaksad, degi, ibmar-odurdaksad
(1:16–3:12)
Jesús, ua-gamalad-warbakese gochad
(Mateo 4:18-22; Lucas 5:1-11)
16 Jesús Galilea-mata-dummad-gakaba-nadapgu, dakalid, Simón, degi, e-urba-Andrésʼbo, sakigi ua-ganai. Ar we-dulemarde, gusgu ua-gaedgi arbamaladid. 17 Jesús amarga sogded: “Anba be dagmar, igi bemar ua-gae, ayobi, dulemar-we-napneggi-bukwad-gaega an be-imakmaloed.” 18 Geb Simón, degi, Andrés, yog e-saki indakar imaksamalad, degi, Jesúsʼba nadmalad.
19 Jesús sikwas nadbargu, Zebedeo-machimala-Jacobo, degi, e-urba-Juanʼbo, urgi saki-matumakbukwa dakdapid. 20 Jesús amarse yog-gollar imaksad. Geb Jacobo, Juan-ebo, e-bab-Zebedeo, degi, ega-arbamalad urgi-obesa, Jesúsʼba nadmalad.
Jesús, dulegi-niaburba-maid onosad
(Lucas 4:31-37)
21 Jesús na e-sapinganmala, Capernaúm-neggweburse nonimalad. Obunnoged-iba-nagunonigu, Judíoʼmar-onmakednegse nadmalad. Agi Jesús Bab-Dummad-Igargi dulemar-odurdakdegusad. 22 Dulemar, Jesús-ibmar-odurdaked geger itomalad, ar ade, Garda-Narmaked-Dulemargii dulemar-odurdaksulid, nue-gangued-nika dulemar-odurdaked. 23 Ukiagwar Judíoʼmar-onmakedneggi dule-wargwen-niaburba-nikad-siid binnasur gollalid, sogded:
24 —Jesús-Nazaretʼgined, ¿ibiga be anmargi gwisgudaniki? ¿Be anmar-obelogega daniki? Ar an be-wisid, be doa-dule gue. Be, Bab-Dummad-E-Dule-Isligwaledid.
25 Geb Jesús niase uluded, ega sabsur ibmar sogded:
—Mer be sunmak, dulegi-maid be noe.
26 Geb niaburba binnasur-dule-bindumake imaksad, degi, binnasur-gote dulegi noded. 27 Bela dulemar geger dakmalad. Degisoggu, na muchub-muchub sogdemarsunnad: “¿Wede igidbarsunna? ¿Odurdaked-binidi? Ar ade, nue-gangued-nika dulemar-odurdaked. Amba niaburbamargarse-bakar, igar-ukbalid, amar eba ibsamalad.”
28 Deyob ibmar-gusadba, bela Galilea-yalaganba, Jesús-nug dummarba gusad.
Jesús, Simón-Pedro-e-sakbundor nudaksad
(Mateo 8:14-15; Lucas 4:38-39)
29 Judíoʼmar-onmakedneggi-noarmargua, Simón-negse nadmalad. A-neg, Andrés-negmogad. Jesúsʼba, Jacobo, degi, Juan, nadmalad. 30 Jesús Simón-negse-dogdapgua, ega sogsamalad, Simón-sakbundor ise-uellegar maiye. 31 Jesús, Simón-sakbundorse naded, argangi gadapid, degi, ogwichis imaksad. Agine, yog-nuguar naded. Geb Simón-sakbundor emarga yog-ibmar-imakar imakded.
Jesús, dulemar-bukidar nudaksad
(Mateo 8:16-17; Lucas 4:40-41)
32 Neg-sedodgu, bato dad-argwategua, dulemar Jesúsʼse bela uellemalad, degi, niaburba-nikamalad sesmalad. 33 Dulemar bukidar Simón-yawagak-naba ambikunonimalad. 34 Jesús bukidar dule-gegumalad nudaksad. Deginbali, bukidar dulemargi-niamar-mamaid onisbalid. Ar a-niamar e-abin-sunmakega gwen imaksasulid, ar amarde wismalad, we-Jesús doa-dule gue.
Jesús, Galilea-yalaganba Bab-Igargi sunmakdii gusad
(Lucas 4:42-44)
35 Bolegoedba, amba negsichi-sichigwa, Jesús gwisgusad. Neggweburgi-node, nega-dulesulidganba naded, agi Babse gorsigusad. 36 Simón-Pedro, degi, e-sordamar Jesús-amiarmalad. 37 Geb Jesús-amismargu, ega sogdemalad:
—Bela dulemar be-amidimalad.
38 Jesús, e-sapinganga sogded:
—Anmar neggwebur-bamalad-wegi-itaka-bukmaladse namala, ar amargi an Bab-Dummad-Igargi sunmakbalirgebed. Ar aga an we-napnegse nonikid.
39 Bela Galilea-yalaganba Jesús garmakdii gualid. Judíoʼmar-onmakednegmargi Bab-Dummad-Igargi sunmakdii, degi, dulemargi-niamar-mamaid-onidii gusad.
Jesús, dule-naibe-buna-yaa-maleged-nikad nudaksad
(Mateo 8:1-4; Lucas 5:12-16)
40 Dule-naibe-buna-yaa-maleged-nikad, Jesús-asabin yokorgi-sindigar-sii, egi wilenaigusad:
—An wisi, sunna be an-nudaked, be an-nudakbier.
41 Jesús dule-wiledake, e-argangi dule-ebus imaksad. Geb ega sogded:
—Nugubi an be-abeged. ¡Be nugusun!
42 Jesús deyob sogsagu, dule-naibe-buna-yaa-maleged-nikad yog-nuguar naded. 43 Jesús, dule-nugusadga sabsur-ibmar-sogsagu, yog-barmiar imaksad. Weyob ega sogsad:
44 —Be-nugusad mer dulemar-baiganga be sogo. Unnila dule-irwa-Bab-Dummadse-goledse be nae, adi, be-san-nugusad dakegar. Degine, Moisés-Igar-Mesisadba, Bab-Dummadga-ukega nuu-gwabo be sedbaloed. Deyobi, dulemar dakmaloed, be a-boni bar nikasurye.
45 Ar dule-nugusad nadgua, bela emarga sogded, igi Jesús e-nudaksa. A-ulale, Jesús geg-basursunna neggweburmargi doge gualid. Unnila dulemarsulidba besdasunnad. Ar degi-inigwele, bukidar dulemar-neggwebur-baidsik-baidsikmalad Jesúsʼse nonidamalad.