NEHEMÍAS-GARDA
NEHEMÍAS
GEBE-SOGLENAID
Garda-nug
Nehemías-Garda. Nehemías, deun Rey-Artajerjesʼga nog-dakedid. Bab-Dummad-dule-gwage-armakedye, Nehemías-nug obarileged.
Nehemías-Gardagi weyob sunmaklenaid
Nehemías-Garda. Esdras-Gardagi-sunmaklenaid-sordamogad. We-gardagine, Persia-e-rey, Artajerjes, Jerusalén-neggweburse Nehemías-barmisad. Adi, Jerusalén-neggwebur-e-galu-matusulid gannar onakwegar. Nehemías, Jerusalén-galu-matusulid gannar-sobsad. Nehemías bela-belad bonigan-abargi neggwebur-galu-matusulid-onaknai gusad.
We-gardagine, weyob ilemakar sunmaklenaid:
1. Nehemías Jerusalénʼse nadegusad (1:1–2:20).
2. Jerusalén-galu-matusulid gannar-soblesad (3:1–6:19).
3. Nehemías dule-dummagan-nugsasad (7:1-4).
4. Dulemar, Zorobabelʼba Jerusalénʼse nonimalad (7:5-73).
5. Esdras, Bab-Dummad-Igar-Maid-absosad (8:1-18).
6. Judíoʼmar Bab-Dummad-ebo gannar igar-mesismalad (9:1–10:39).
7. Nehemías Israel-dulemar Jerusalénʼgi-megega amisad (11:1–12:26).
8. Jerusalén-galu-matusulid Bab-Dummadga nugsalesad (12:27-47).
9. Nehemías igarmar-napi-nudaksad (13:1-31).
Be itogua.
1. NEHEMÍAS JERUSALÉNʼSE NADEGUSAD
1
(1:1–2:20)
Nehemías, Jerusalén-neggweburgala Bab-Dummadse gornai gusad
1 Ani, Nehemías Hacalías-machi, angi-ibmar-gusad an narmaksiid. Rey-Artajerjes birga-durgwengus (20) negdakmaidgi Nii-Quisleuʼye-nugad gwichidgi, deunni, an Susa-neggwebur-gandikidgi gudiid. We-Susaʼgi reyneg-siid. 2 Agi, deunni an-urba-Hanani, dule-Judá-yarginmaladba anse nonikid. Geb degi, a-dulemarse an egichided, Judío-dulemar-abonolesmaladi, igi gubukye, degine, Jerusalén-neggwebur, igi gusimoye.
3 Degidgine, anga sokarmalad: “Judío-dulemar-abonolesa Jerusalén-neggweburse gannar-nonimaladi, bela-bela wilebukmalad, degi, binged-dummad-abargi gudidimalad. Jerusalén-neggweburdina, e-galumar bela omukulesad, e-yawagakmardi soogi ogumaklesad.”
4 An deyob itosgua, an bosii gualid. Degine, ibagan undarsaar an bela-bela ulubgi nunmak-itodigusad. Geb degi, gwen mas-gunsuli an Bab-Dummad-Nibneggi-Maidse gornaigussunnad. 5 Geb agi, an ega sogded:
“Bab-Jehováʼye, Bab-Dummad nibneg-e-ibedye, be, be bela-bela gangued nikad. Dule-be-sabmalad, degi, be-igar-mamaidba-nanamalad be sabdaed. Degi, be amar-ebo igar-mesisadba be imakedsedaed. 6 Bab-Dummad, bese an wilesagwa egissun, wis be an-itogena gadin, degi, an, be-maiga-gued, bitigi nued be dakena yeerban. An be-maigan-Israel-dulemarga bane-bane mutikidba, ibginedba an bese gornaid. Anmar-Israel-dulemar begi nue-nosad. A-ular, nunmak-itogedgi an na bega na barsogsunnad. Deginbali, ani, geb bela an-gwenadgan, anmar begi nue-nosmalad. 7 Degi, anmar bela-bela begi isgusmalad, degine, be-Igar-Mesisadba, degi, be-sorda-Moisés-sogsadba anmar nanassurmarbalid.
8 ”Emisgi be ebinsao, be-sorda-Moisésʼga be-ibmar-sogsad: ‘Bemar angi nosmardibe, ani dule-yar-baid-baid-bukwadgi an be-oaisakioye. 9 Degi-inigwele, bemar gannar anba nanamalale, geb an-Igar-Maidba bemar damalale, degi, aba bemar innikii gudimarbalile, gannar an bemar-suoed. Ar bemar dikasur mimilesdibe, an gannar bemar-suoed. Geb bia bemarga an neg nasiksa, a-negse an bemar-sedagoed, agi, angi nue binsadii gumalagar.’
10 ”Bab-Jehová, anmar be-maiganad, degi, be-dulamarbalid, ar bela-bela be-ganguedba be anmar-abonosad. 11 Bab-Jehováʼye, bese an wilesakwaa egissun, wis be, be-maiga-an-gued, be itogena gadin, degi, be-maimar bese-wilesagwa-gornaid be itogena gadin. Ar amardi bela be-nug-odummobimalad. An bese egisbardo, bitigi rey-asabin igar-nueganbi be anga uksana gadin.”
Deunni a-ibagangine, an reyga nog-dakedid.