ZACARÍAS-GARDA
ZACARÍAS
GEBE-SOGLENAID
Garda-nug
Zacarías-Garda. Bab-Dummad-gayaburba-barsoged-Zacarías, Berequías-machid. E-dada, Iddoʼye nugad. Zacarías, Jerusalén-neggweburgi Bab-Dummad-gayaburba-barsogdii gusad. Bab-Jehová ebinsasye, Zacarías-nug obarileged.
Zacarías-Gardagi weyob sunmaklenaid
Zacarías, Bab-Dummad-gayaburba-barsoged-Hageo-ibagangi gudigusmogad. Zacarías, Hageo-sunmaked-balillasaale sunmaknaimogad.
Zacarías, Zorobabelʼba dule-gales-selesgusmalad-abargi gannar Jerusalén-neggweburse nonigusad. Zacarías bur bule negburgan-daksadgi sunmaknaid. We-negburgan-daksadgi dulemar-ogannonaid. Deginbali, Jerusalén-neggwebur-gannar-bukuoedgi, Bab-Dummadse-goled-neg-gannar-soblegoedgi, dulemar-e-isgusad-idualed-elilesadgi, degi, yoedse Mesías-negsenonikoedgi, sunmaknaibalid.
We-gardagine, weyob ilemakar sunmaklenaid:
1. Bab-Jehováʼse-gannar-walikguega gorlenaid (1:1-6).
2. Negburgan-daklesmalad (1:7–6:8).
3. Josuéʼga ologurgin silesad (6:9-15).
4. Mas-gunsulid-iba-sunsogedsulid (7:1-14).
5. Bab-Jehová, Jerusalén-neggwebur-obinogoye soged (8:1-23).
6. Dulemar-yar-baid-baidgi-bukwamalad sabsur-odurdaklegoed (9:1-8).
7. Sión-e-rey-megnonikoed (9:9-17).
8. Bab-Jehová, e-dulamar-ollor-imaknonikoed (10:1–11:3).
9. Sibad-wawaad-edarbemalad-ebogwad (11:4-17).
10. Jerusalén-neggwebur-ollorgunonikoed (12:1–13:9).
11. Bab-Jehová, Jerusalén-dulemar-nakwega imakoed (14:1-21).
Be itogua.
1. BAB-JEHOVÁʼSE-GANNAR-WALIKGUEGA GORLENAID
1
(1:1-6)
Rey-Darío birgabogus negsemaidgine, nii-walabaabakgine, Bab-Jehová Iddo-wagwa-Berequías-e-machi-Zacaríasʼga weyob sunmaknonikid:
“Ani Bab-Jehová be-dadgangi bela-bela urwemai gusad. Degisoggu, dulemarga be sogo, Bab-Jehová-Bela-Gangued-Nikad weyob sogye:
‘Be gannar an-amimala,
geb, an gannar bemarba gudii saoed.’ ”
Bab-Jehová-Bela-Gangued-Nikad weyob soged:
“Mer be be-dadgan-gudigusmaladyob gumala.
Be-dadgangala Bab-Dummad-gayaburba-barsogmalad,
Bab-Dummad-Bela-Gangued-Nikad weyob sogye sogsamalanad:
‘Mer bar galagwensuli-gudii gumarye.
Mer bar ibmar-isgana imakmarye.’
Degi-inigwele, gwen anba ibsassurmalad,
gwen an-itossurmalad.”
Bab-Jehová sogdebalid:
“Emide, be-dadgan, ¿bia nadmala?
¿Ar an-gayaburba-barsogmalad amba dula-gudidimala?
Ar an-maimar-an-gayaburba-barsogmaladga an-gayaburbamar, degi, an-igarmar-an-sogsagusadi,
¿be-dadgangi deyob gunonisursi? Deyob gunoniki.”
A-ulale, be-dadgan gannar Bab-Jehová-aminonimalad, geb weyob sogsamalad: “Ar anmar-daedbali, degi, anmar-ibmar-imakedbali, na igi Bab-Dummad-Bela-Gangued-Nikad anmar-imakoye sogsa-gusa, deyobi anmar-imaksad.”
2. NEGBURGAN-DAKLESMALAD
(1:7–6:8)
Sapimar-arrayánʼye-nugad-abargi, dule-wargwen gudiid
Rey-Darío-birgabogus-negsemaidgi, nii-warambe-gakagwensakgi, nii-Sebatʼye-bilegedgi, a-iba-dulagwen-gakabakegi, Bab-Jehová, e-gayaburba-barsoged-Zacaríasʼga gabgine ibmar oyosad. Zacaríasʼde Iddo-wagwad, Berequías-e-machid.
Ani Zacarías mutikidbali negburgan dakalid. Dule-gwensak moli-gisigwad-birgi-sii-daniki an dakalid. We-dule, neba-naidgi, sapimar-arrayánʼye-nugad-imbaba nagunonikid. We-dule-yarganbali dulemar-bukidar molimar-gisigwad-birgi-sii, molimar-goro-goro-dakleged-birgi-sii, degi, molimar-sipugwad-birgi-sii an daksad. Geb an dulese egichided: “Dummad, we-dulemar-moli-birgi-bukwamalad, ¿wede ibu obare?” Agine, baliwitur-anbo-sunmaknaid an-abin-imakded: “An bega sogoed, wede ibu obare.” 10 Dule-sapimar-arrayánʼye-nugad-imbaba-gwichid anga sogded: “Bab-Jehová we-dulemar-moli-birgi-bukwamaladi, bela we-napneggi-bipirmakega barmialid.”
11 Geb dulemar-moli-birgi-bukwamaladi Bab-Jehová-e-baliwitur-sapi-arrayánʼmarye-nugad-abargi-gwichidga sogdemalad: “Anmar bela we-napneggi bipirmaksad. Anmar napneg bogidik-nai daksamalad, bonisuli an daksamarbalid.”
12 Bab-Jehová-e-baliwitur weyob-itosgua, sogded: “Bab-Jehová-Bela-Gangued-Nikadye, birga-dulapaa-gakambegusa (70) be Jerusalén-dulemargi-urwedanikid, degi, be Judá-dulemargi-urwedanikid, ¿wede, we-neggweburmar be gannar wiledakega birgabigwa napi?”
13 Bab-Jehová, baliwitur-anga-sunmaknaidga nuekwaa sunmaksad, mer bukib-binsaed-gayaburba ega sogsad. 14 Geb baliwitur anga sogded: “Weyob be sogo: ‘Bab-Jehová-Bela-Gangued-Nikad weyob sogye:
An bela-bela Sión-yar-sabedbali, an nue egi nobed.
An bela-bela Jerusalén-neggwebur-sabedbali, an nue egi nobed.
15 Ar dulemar-yar-baid-baidgi-bukwad-san-dummarba-imakdimaladgindi, an urwemaid.
An bela-bela urwemaisulinad,
ar emar bela-bela-an-ourwega an-imaksamalad.
 
16 ” ’Degisoggu, Bab-Jehová weyob soged:
An gannar Jerusalén-neggwebur wiledaknonikoed.
Agine, anse-goled-neg gannar soblenonikoed,
an gannar neggwebur nue-ilemaknai imakoed.’ ”
Bab-Jehová-Bela-Gangued-Nikadi weyob soged: 17 “Aginbali, Bab-Jehová-Bela-Gangued-Nikad-e-nuggi be weyob sogbali:
‘Gannar an-neggweburmar ibmar-nuegan-nikuega an imakoed.
Gannar Bab-Jehová Sión-yar-wiledaknonikoed.
Gannar Jerusalén-neggwebur egadga imaknonikoed.’ ”
Moli-bebemar, degi, dule-esgorogi-arbamalad
18 An niba-atakdegua, an-asabin walabake moli-bebemar nodaniki an daksad. 19 Geb an baliwitur-anbo-sunmaknaidsega egisded: “We-bebemarde, ¿ibu obare?” Baliwitur anga weyob sogded: “We-moli-bebemar reymar-gangued-nikamalad oyoged. We-reymar e-gangued-nikadbali Judá-dulemar, Israel-dulemar, degi, Jerusalén-dulemar-oaisakiega imaksamalad.”
20 Geb sorbali, Bab-Jehová anga walabake dule-esgorogi-arbamalad oyosad. 21 Geb Bab-Jehováʼse an egisded: “Wemardi, ¿ibu imakega danimala?” Geb Bab-Jehová anga sogded: “We-moli-bebemar, reymar-gargangued-nikamalad oyoged. We-reymar Judá-dulemar-oaisakiega imaksamalad. Dule-wargwensaale e-abin gwisgussulid. We-dule-esgorogi-arbamaladi, we-bebemar-walabakegwad ogwayega nonimalad. Deginbali, dulemar-yar-baid-baidgi-bukwamalad-e-gangued-nikad-obelogega nonimarbalid. Ar we-bebemar Judá-dulemar-oaisakis gusmalad.”