ƖSƆ KƲYƆƔƆTƲTƲ TƐLƎSƲLƲ
OSEE
TƆM TAKƎLAƔA
Kʋtʋlʋtʋ
Ɩsɛɣɛlɩ tɛtʋ ilim ntɔɣɔŋ tɔɔ, timpi pɑ yɑɑ sɩ Sɑmɑlii tɔɣɔ Osee tɛlǝsɑɣɑ Ɩsɔ kʋyɔɣɔtʋtʋ kɛ yǝlɑɑ. Wɑɑtʋ ɩnɩ ɩ tɑɑ tɔ, tɛtʋ tɑ cɑɣɑ teitei. Yǝlɑɑ muɣuliɣi tǝmɑ, nɑ lɛlɑɑ nɑ́ɑ́ kʋlǝɣɩ tɛtʋ tɔkǝlɑɑ tɔɔ. Ɩsɔ sɛɛʋ mɑɣɑmɑɣɑ nɑ́ hɛɛwɑ nɑ Ɩsɛɣɛlɩ nyǝ́mɑ mǝlɩ lɑɑtʋ tɑɑ. Kʋpǝntǝŋ wei ɩ wɑhɑlɑ Osee tɔkɑɣɑ ɩ wɑɑtʋ tɑɑ tɔɣɔlɛ.
Ɩsǝnɑ pɑ fɑɣɑ Osee tɑkǝlɑɣɑ tɔ:
Osee ɑkpɑɣɑlɛ nɑ ɩ tǝyɑɣɑ pǝ tɔm, titite 1–3
Tɑcɑɑ kɑlǝɣǝnɑ Ɩsɛɣɛlɩ nyǝ́mɑ, titite 4–13
Ɩsɔ sɔɔlʋɣʋ nɑ ɩ nɔɔsɩ sɩɩʋ, titite 14
1
1 Tɑkǝlɑɣɑ kɑnɛ kɑ tɑɑ kɛ́ pɑ kɛɛsɑ tɔm. Tɑcɑɑ kɑ heelinɑ-tǝɣɩ Peeli pǝyɑlʋ Osee. Sowɑsɩ pǝyɑlʋ Solopʋwɑm wei ɩ kɑ kɛ Ɩsɛɣɛlɩ wulɑʋ tɔ ɩ pɔɔlɛ tɑɑ kɛ́ Tɑcɑɑ kɛɛsɑ Osee kɛ tɔm ntɩ. Wɑɑtʋ kʋlʋm ɩnɩ ɩ tɑɑ tɔtɔɣɔ, Osiyɑsɩ nɑ Yotɑm nɑ Ahɑsɩ nɑ Ɩsekiyɑsɩ, pɛlɛ pɑ tɔkɑɣɑ kɑwulɑɣɑ kɛ Yutɑ tɑɑ, nɑ pɑ́ kɑɑsǝɣɩ tǝmɑ.
Ɩsɔ kʋyɔɣɔtʋtʋ tɛlǝsʋlʋ Osee ɑlʋ nɑ ɩ piyɑ pɑ tɔm
2 Tɔm kɑncɑɑlɑɣɑ nyǝntʋ nti Tɑcɑɑ heelɑ Osee tɔɣɔlɛ sɩ:
Polo nɑ ń kpɑɣɑ ɑpɑlɑɑ tǝnɑ ɑlʋ nɔɣɔlʋ.
Ɩ piyɑ ɩ́ tǝŋ sɩ too ɩkpɑtɛ.
Mpi tɔ, Ɩsɛɣɛlɩ nyǝ́mɑ tǝnɑ kisɑ Tɑcɑɑ mɑɣɑ,
nɑ pɑ́ hɑ pɑ tǝɣɩ tɩɩŋ lɑɑʋ tɑɑ.
3 Ḿpʋ́ɣʋ́ Osee polɑɑ nɑ ɩ́ kpɑɣɑ Tipilɑyim pɛɛlɔ Komɛɛ. Ɩlɛnɑ ɑlʋ ɩnɩ ɩ lʋlɩ-ɩ ɑpɑlʋpǝyɑɣɑ. 4 Ḿpʋ́ɣʋ́ Tɑcɑɑ tɔmɑ Osee sɩ:
Hɑ-kɛ sɩ, Sisilee.
Mpi tɔ, pǝ kɑɑsɑ pǝcɔ mɑɑ lɛɛtɩ Yehu lʋlʋɣʋ nyǝ́mɑ
kɛ yʋlʋkʋlɛ nte pɑ lɑpɑ Sisilee tɔ tǝ tɔɔ.
Ɩlɛnɑ mɑ́ sɩɩ Ɩsɛɣɛlɩ kɑwulɑɣɑ tǝnɑɣɑ.
5 Mɑɑ wɑkǝlɩ pɑ yoolɑɑ toŋ kɛ
Sisilee tɛtɛkǝlɛ tɑɑ kɛ́ kʋyɑkʋ ŋkʋ.
6 Komɛɛ tɑsɑ hɔɣɔ hɑɣɑʋ, ɩlɛnɑ ɩ́ lʋlɩ ɑpɑlʋpǝyɑɣɑ, nɑ Tɑcɑɑ heeli Osee sɩ:
Hɑ-kɛ sɩ, Pǝtɔɔtǝlɛ fɛɩ.
Pǝ hʋwɛɛ ntɛ sɩ Tɑcɑɑ mɑ́ mɑ kɑɑ nyǝnɩ
pɑ pǝtɔɔtǝlɛ nɑ mɑ́ hʋlɩ-wɛɣɛ suulu.
7 Amɑ mɑ kɑɑ lɑ ḿpʋ́ɣʋ́ Yutɑ nyǝ́mɑ. Hɑlɩ pɑ Ɩsɔ Tɑcɑɑ mɑ́, mɑɑ wɑɑsɩ-wɛɣɛ. Mɑ pɑɑ fɛɩnɑ yoou yɑɑ tɔɔʋ, yɑɑ lɑɣɑtɛ, yɑɑ yoou kpɑɣɑnǝŋ, yɑɑ ɩ cɑɣɑlɑɑ.
8 Komɛɛ tisɑ Pǝtɔɔtǝlɛ fɛɩ, ɩlɛnɑ ɩ́ kpɑɣɑ hɔɣɔ nɑ ɩ́ lʋlɩ ɑpɑlʋpǝyɑɣɑ. 9 Ɩlɛnɑ Tɑcɑɑ heeli Osee sɩ:
Hɑ-kɛ sɩ, Pɑ tɑ kɛ mɑ nyǝ́mɑ.
Mpi tɔ, Ɩsɛɣɛlɩ nyǝ́mɑ tɑ kɛ mɑ yǝlɑɑ,
nɑ mɑ́ tɑ́ kɛ́ pɑ Ɩsɔ.