ታ ሲቁዋ ደማናዉ አሞታድ፤ ምንሳደ ኮያድ፤

ሽን ደማናዉ ዳንዳያበይከ።

ታ ሲቁዋ ደማናዉ ኮያድ፤ ምንሳደ ኮያድ፤

ሽን ደማናዉ ዳንዳያበይከ።

ታንካ፥ ታ ሲቁዋ በኤድቴ? ያጋደ ኡንቱንታ ኦቻድ።

እ ታፐ ከስ አከናዳን፥ ምንሳደ ኦይቃድ፤

ታ ዳይ ጎለ አካ አፋድ፤ ታ የለቴዳ ክፍልያ ገልሳድ።

ሲቁ ባረዉ ዶሲደ ደንዳና ጋካናዉ፥

አ ህንተ ቤጎና ማላ፥

ታን ህንተና ገንኤቱዋንነ ባዙዋ ዶገቱዋን ጫላይ ያጋዱ።

ፔኑካ ዛልአንቻ እጻናዳንነ ካዋራዳን፥

ሳዊያዌ እ ኦኔ?

ሄ ፓራ ጋሪ እስራኤልያፐ ዶረቴዳ ዎልቃማቱ፥

ኡሱፑን ታሙ ቶራንቻቱ አጃቤድኖ።

ኦላንካ ፓጨቴዳዋንታ።

ቃማን ጋካና መቱዋ ኤቀታናዉ፥

ኡንቱንቱ እቱ እቱ ማሻ ግጺደ ጊጌዳዋንታ።

ባረዉ ኡትያ ካዉተꬃ አራታ ጊግሴዳ።

እ አራታ ሊባኖሳ አሳፐ አሄዳ ምꬃፐ ኦስሴዳ።

ገዲ ዎርቃን አሌቀቴዳ፤

ኡትያሳይ የሩሳላመ ዎዶራቱ ኦቻ ቴራ ማላትያ ቃጭናን፥

ሲቁዋን ዳዴዳ አፍላን ካመቴዳ ያጌድኖ።

እ ሎይꬅ ናሸቴዳ፥ አ ቡላቻ ጋላስ አ አታ አ ሁጲያን፥

ዎꬄዳ ካላቻ ዎꬂደ ኡቴዳ ያጋዱ።