18
Baabilooni Kunddethaa
1 Hewaappe guyyiyan, wolqqaama maatay de7iyaa hara kiitanchchay saluwaappe wodhdhishiina, taani be7aaddi. He kiitanchchaa bonchchuu sa7aa poo7isseedda.
2 He kiitanchchay bare kooshshaa dhoqqu udiide,
“Iza kunddaaddu!
Wolqqaama Baabiloona kunddaaddu!
Baabiloona xalahatuu aqiyaasaa gidaaddu;
iita ayyaanatuu ubbatuunne
ixettiyaa iita kafatuu ubbatuu
iini de7iino. Isa 13:21; 21:9; Erm 50:39; 51:8; Sax 14:8
3 Ayissi gooppe,
asaa zariyaa ubbaa
bare mathoyiyaa woyiniyaa eessaa
ushshina
izinna woshummeeddino.
Qaykka sa7aa kaatatuu
izinna woshummeeddino.
Izi ishalo wolqqaa gaasuwan
sa7an de7iya
zali77anchchatuu duretteeddino”
yaageedda. Isa 23:17; Erm 51:7
4 Hewaappe guyyiyan,
taani saluwaappe
hawaadan yaagiyaa
hara kooshshaa sisaaddi;
“Ta asaw, iippe kesite!
Izi nagaraa izinna koxxoppite!
Izi muraa gishettoppite.
5 Ayissi gooppe,
izi nagaray
saluwaa gakkanaw dooretti utteedda.
Xoossay izi iita bayizzuwa
hassayeedda. Dom 18:20-21; Erm 51:9
6 Iza immeeddawaa keenaa zaariide,
iziw immite.
Iza ootheeddawoo
laa77u kushiyaa
iziw qanxxite.
Iza hinttenttussi giigisseedda ushshaappe
laa77u kushiyaa ushshaa
izi burccukkuwaa kunthite. Maz 137:8; Erm 50:29
7 Iza bonchchetteeddawaanne
ishaleeddawaa keenaa
izo tuggayitenne kayyoyite.
Iza bare wozanaan,
‘Taani kaatattiidan uttay;
taani asinay baynna maccawunno gidikke;
qassi ubbaakka kayyottikke’
yaagaw. Isa 47:7-9
8 Hewaa diraw,
izi boshaa ubbay
harggii, kayyuunne koshay
izo itti gallassi oyqqana.
Qassi iza taman guudettana;
ayissi gooppe,
izi bolla pirddiyaa
Godaa Xoossay Wolqqaama”
yaageedda.
9 Sa7aa kaatatuu, izina woshummiidde ishaleeddawanttu he katamatta guudettina, kesiyaa cuwaa be7eedda wode, katamattiw unttunttu waassananne yeekkana. Hiz 26:16-17 10 Unttunttu he katamatti ugaw yayyeedda diraw, haakki eqqiide, “Ha wolqqaama katamattee! Wolqqaama katamattee! Baabiloonee, new aayyeero! Neeni ay mala tuggattaniishsha. Neeni itti saatiyaa giddon ne pirddaa akkaadda” yaagana.
11 Unttunttu markkabiyaa caanaa hawaappe sinthanaw shammiyaabay baynna diraw, sa7an de7iya zali77anchchatuu he katamattiw waassananne kayyottana. Hiz 27:31,36 12 Unttunttu worqqaa, biraa, bonchcho shuchchaa, inqquwaa geetettiyaa al77o shuchchaa, teera oochcha malatiyaa mayuwaa, suufiyaa mala mayuwaa, hariya geetettiyaa mayuwaa, zo7o mayuwaa, ubba qommo sawiyaa mithaa, ubba qommuwan ootheedda danggarssaa achchaa, al77o mithaappe medhetteeddabaa, nahaasiyaa, birataa, ibineberediyaa geetettiyaa shuchchaa, Hiz 27:12,13,22 13 qarafaa, qimaamiyaa, ixaanaa, shittuwaa, sawiyaa ixaanaa dhiilliyaa, woyiniyaa eessaa, wogaraa zaytiyaa, liiqeedda dhiilliyaa, zarggaa, miizzaa, dorssaa, paraanne paray goochchiyaa gaariyaa, unttunttu aylletuwanne haray atto asaa shemppuunne shammiyaabaykka baawa.
14 Zali77anchchatuu mishirattiw,
“Neeni amotteedda
lo77obay ubbay neeppe halidiggeedda.
Ne de7uunne
alleeqqettiyaabay ubbay dhayidiggeedda.
Neeni laa7entho
unttuntta ubbaakka demmakka”
yaageeddino.
15 He katamattin zali77iide duretteedda zali77anchchatuu izi ugaw yayyiide, iippe haakkiide eqqana. Unttunttu yeekkananne kayyottana. Hiz 27:31,36 16 Qassi,
“Suufiyaa geetettiyaa
kiriyan dadetteedda mayuwaa,
teera ochchaa malatiyaa
mayuwanne zo7o mayuwaa mayyaade,
worqqaa alleeqquwan,
bonchcho shuchchaaninne
inqquwaa geetettiyaa
al77o shuchchan alleeqqeedda,
he wolqqaama katamattiw aayyeero! 17 Hawaa keena
wolqqaama maxuu ubbay
itti saatiyaa giddon
dippi gi dhayi aggeedda”
yaageeddino.
Markkabiyaa laaggiyaa ubbatuu, markkabiyan biya ubbatuu, markkabiyan oothiyaa ubbatuunne abbaan oothi go77ettiyaa ubbatuu haakki eqqeeddino. Isa 23:14; Hiz 27:26-30 18 He katamatta guudettina kesiyaa cuwaa be7eedda wode barenttu kooshshaa dhoqqu udiide, “Ha wolqqaama katamatto malatiyaa katamay ubbaakka baawa” yaageeddino. Hiz 27:32
19 Unttunttu barenttu huuphiyaan baana qoliide, waasseeddinonne kayyotteeddino;
“Abbaan markkabetuu de7iyaa ubbaa
bare maxuwan dureyeedda
wolqqaama katamattiw aayyeero!
Qassi iziw de7iyaabay ubbay
itti saatiyaa giddon
dhayi ageedda. Hiz 27:30-34
20 He katamatta dhayeedda diraw,
saloo, nashetta!
Geeshshatoo, Yesuusi kiitteeddawanttoo,
nabatoo, nashettite!
Ayissi gooppe,
iza hinttentta ootheeddawaa
diraw Xoossay izo pirddeedda” yaageedda. Zar 32:43; Erm 51:48
21 Hewaappe guyyiyan,
wolqqaama kiitanchchay
woxaa malatiyaa wolqqaama shuchchaa
denthi abbaan oliide hawaadan yaageedda;
“Wolqqaama katamatta
Baabiloona sugina,
hawaadan kunddana;
iza hachcheppe sinthaw
ubbaakka beettukku. Erm 51:63-64; Hiz 26:21
22 Diithaa diixxiyaawanttunne
mazimuriyaa yexxiyaawanttu,
suusulliyaanne malakataa punniyaawanttu
kooshshay hawaappe hini baggan
ne giddon ubbakka siseettenna.
Kushiyaa hiilla eriyaa ooninne
laa7etho ubbakka de7enna.
Woxaa kooshshaykka
hawaappe sinthaw ne giddon sisettenna. Hiz 26:13; Isa 24:8Erm 7:34; 25:10
23 Xomppiyaa poo7uukka
laa7ethuwa ne giddon poo7enna.
Akkiyawaa kooshshaynne
gelewunni kooshshay
sinthaw ne giddon siseettenna.
Ne zali77anchchatuu sa7aa
ubbaan eretteedda wolqqaamatuwaa.
Ne bitiyaawan asaa zariyaa ubbay
cimetteedda.
24 Nabatuwaa suuthay,
geeshshatuwaa suuthaynne
sa7an hayqqeedda ubbatuwaa suuthay
izin beetteedda diraw,
Baabiloona
murettaaddu”
yaageedda. Erm 51:49
18:2 Isa 13:21; 21:9; Erm 50:39; 51:8; Sax 14:8
18:3 Isa 23:17; Erm 51:7
18:5 Dom 18:20-21; Erm 51:9
18:6 Maz 137:8; Erm 50:29
18:7 Isa 47:7-9
18:9 Hiz 26:16-17
18:11 Hiz 27:31,36
18:12 Hiz 27:12,13,22
18:15 Hiz 27:31,36
18:17 Isa 23:14; Hiz 27:26-30
18:18 Hiz 27:32
18:19 Hiz 27:30-34
18:20 Zar 32:43; Erm 51:48
18:21 Erm 51:63-64; Hiz 26:21
18:22 Hiz 26:13; Isa 24:8
18:22 Erm 7:34; 25:10
18:24 Erm 51:49