2
Nina yoowaalompela atthu ooshi
1 Apho, ehinarettiwe hatha etthu, kinuuhirimizani olompa; lompa yookhola moolu, yoovekeleliwa anaatamu ooshi na lompa yooshukhurwela. 2 Mwiwaalompele afwalume na attunkhulu ooshi apale ariinaaye yenzi yoori fweeyo niiyane meekhazi a wiitthaala, a heeri, eemaani na hishima khuluyeene. 3 Epo pi ziiyiye zooshapweya na zontuvela Nnyizinku Namuusuru etthu. 4 Ye ontakha yoori eeye a wuusurukha atthu ooshi na ajuwe haakhi.
5 Nnyizinku ori mmote paasi,
na namasiilanisa wa atthu na Nnyizinku
na-ye ori mmote paasi,
Yinsa Al-Masiihu pinaatamu,
6 otu aleviyeeyo ohaayi awe
khuripha hisapu za twampi za atthu ooshi,
oshaahiti opu Nnyizinku enkha wakathi khwaamili.
7 Akintta ohata kinlupa khweele, keetta othawuliwa yoori kiiye namalaleya, kiiye aswihaapa na kiiye namanozela wa mattakhuzi apa a amini na a haakhi, khwa khapila zooshi.
8 Apho, alume ooshi kintakha yoori wakhula vahali ankusanyeyaavo alompe alansaka makhono na rooho y'eemaani woohikatipukhi na woohinyakulisani.
Aakha apale eeyiye anamalottela a Yinsa
9 Aakha na-yo kintakha yoori awale kuwo wa hishimavo, ajishapweyise woohijitayiti khwa nanna eneezelaazo, oshapweya waya ohiiye woofuka mattunttu oohifwayi wala owala thahapu wala osaka ama kuwo za waatta nzurukhu, 10 oshapweya waya wiiye wa khaazi zooshapweya nkhama aakha animwaaputwaaye Nnyizinku.
11 Aakha, amana anozeliwaka ana yoojiitthaaza na ojinyamaza. 12 Akiniwaatakhisa aakha onozela wala ojinkha yenzi vakatthi wa alume, ana yawiiya oonyamala. 13 Maana tthakuzi wa wumpiwa ti Adamu, aphano khumpiwa Haawa. 14 Aattettekhiweeyo khahiyo Adamu, muukha ti ye aattettekhiweeyo pi ohata wa Epiliisi, khusutukhwana akwelaka ntwampi. 15 Apho, aakha hatha nkhama awaapattha aana, anuusurukha eeyaru nkatthi wa epaata na pheta, na ottakatthifu na hishima.