5
Ovonisiwa wa namarakala
Ziviriyeevo vitthu epile, Yinsa khulawa Yeruzaleemu mwaasa wa njampo la mayaahuuti. Ewaakho Yeruzaleemu, kharipu ya Vanlako wa Pwittipwitthi, kulaathayini khwa luuka ya meepereewu eniitthiwa Betezita, eriina mapantta mathaanu oovikhiwa. Attaapho aari orapalelakaavo anamarati enkeene; anamarakala, anahooni na anasupiyaani awejaka nziko wa maati* , maana nlayikha la Mbwana laari wiishukhaka swaafu kiina na wunttula maati apale. Otule aari wiiyaaye wa mwanzo weetta nkulaathayini noovona marati awe. Attaaphale aarivo mwinyi aariina nyaakha talaathiini na minaane arina supiyaani. Yinsa khumoona mwinyi otule ari woorapalela ajuwiyeevo yoori aaza raku olwaaziwa, khumuuzela yoori: “Weeyo ontakha ovonisiwa?”
Nlwele otule khujipu yoori: “Mbwana aka, akina hatha ntthu wookaawuni okittha nkulaathayini amana maati onttuliwa. Kitakhaka weettamo, akina antta weettamo miiyo kihineettemo.”
Aphano Yinsa khumuuza yoori: “Olankhe, othuule nrepa lawo weettette!” Nasaapiru mwinyi otule khwiiya woovona, khuthuula nrepa lawe khwaaza weettetta.
Siikhu yaya etile yaari saapatu. 10 Mwaasa wa ethiito mayaahuuti khumuuza otule aavonisiweeyo yoori: “Leelo saapatu, enikhattaziwa weeyo othuula nrepa lawo.”
11 Ye khuwaajipu yoori: “Ntthu akivonisiyeeyo ti akuuziyeeyo yoori: ‘Othuule nrepa lawo na weettette.”
12 Khumuuzela theenya yoori: “Paani mwinyi aya oto awuuziyeeyo: ‘Othuula nrepa lawo na weettetta?”
13 Mwinyi otule aavonisiweeyo khaari onjuwa paani otule aya, maana Yinsa khaari wooneya mwaasa wa wawaattiwavo.
14 Paata ya vitthu epile, Yinsa khukutthanana Nnyupa Woosifwiwamo khumuuza yoori: “Woone, weeyo wavonisiwa! Ohirutele ntwampi yoori ehuurettikhanele etthu yooziti.” 15 Mwinyi otule khulawa khuwooza mayaahuuti yoori aari Yinsa anvonisiyeeyo. 16 Aphano mayaahuuti khwaaza onlupattha Yinsa, maana ye eetta ovonisa saapatu. 17 Ila Yinsa khuwooza yoori: “Paapa ontta okhola khaazi mpakha leelo, na-miyo kintta okhola.” 18 Mwaasa wa ethiito mayaahuuti khusala atakha omuula, woohiiyi paasi mwaasa wa ohishututeli kano monkoni wa saapatu, ila theenya eetta olupa yoori Nluku ti Paapa na ajilikanisanaka Nluku.
Yinsa oneeleza khaazi yawe
19 Aphano Yinsa khuwooza yoori: “Miiyo kiniwuuzani khweele yoori, Mwaana khanretta etthu yawe, ila onretta etile animoonaaye Paapa arettaka. Maana zooshi epile anrettaaye Paapa, Mwaana onretta etthiipo. 20 Maana Paapa onimpheta Mwaana na oninthonyeza zooshi anrettaazo, onteela onthoonyeza khaazi kiina zooziti epi yoori mweeyo mwishanke. 21 Maana etthiipo Paapa aniwaasisimulaaye ananfwa na khuwinkha ohaayi, Mwaana naye oniwinkha ohaayi apale ye aniwatakhaaye. 22 Paapa khanimphuka hatha ntthu, ila Paapa amwinkha Mwanawe ophuka wooshi, 23 yoori ooshi anshitahi Mwaana nkhama aninshitahaazo Paapa. Otule ahininshitahaaye Mwaana khaninshitahi Paapa otule anrumiyeeyo.
24 Miiyo kiniwuuzani khweele yoori, otule ansiilaaye nttakhuzi laka na aninkhupalaaye otule akiperekhiyeeyo onaaye ohaayi wa mileele, wala khamphukiwa, ila avirela ofwa yoori eeyane ohaayi. 25 Miiyo kiniwuuzani khweele yoori ontta ofiya wakathi, na wafiya, ananfwa anttelaaye osiila huula ya Mwaana wa Nluku na otule anttelaaye osiila oniiya haayi. 26 Nkhama etthiipo Paapa eeyiyeeyo mweenyewe ohaayi, amwinkha mwanawe wiiya mweenyewe ohaayi, 27 na amwinkha ofwalume yoori aphuke, maana ye Mwaana wa Pinaatamu.
28 Mwihiiye wooshankela epo zaya, maana ontta ofiya wakathi wa ooshi apale ari nkhapuri anttelaaye osiila huula yawe 29 anlawa asisimuwe nkhapuri. Apale aari orettaaye zooshapweya anttela osisimuwa eeye haayi, apale aari orettaaye zootakhala anttela osisimuwa eeye ophukiwa. 30 Otthome akinwahi oretta hatha etthu. Miiyo kimphuka khwa nanna Paapa akuuziyeeyo, na ophuka waka pi wa shariya maana akineekesa ojituvelisa, ila matakhelo a otule akiperekhiyeeyo.
Oshaahiti monkoni wa Yinsa
31 Nkhama kinjilawela oshaahiti kimweenyewe, oshaahiti aka khahi wa khweele. 32 Ila owaapho nkina anlawelaaye oshaahiti monkoni wa miiyo na miiyo kinjuwa yoori oshaahiti aya opo alupiyeeyo monkoni wa miiyo haakhi.
33 Mwawaarumiye atthu olawa omuuzela Yaahaya, yo khulaza oshaahiti wa khweele. 34 Miiyo akininhithajiya hatha ntthu okilawela oshaahiti, ila kinlupa vitthu epo yoori mweeyo mwiiye wa wuusurukha. 35 Yaahaya aari nkhama likhompe laari okholelaaye nuuru yaya nawuumwasikhelani, mweeyo khukhupalela khwa wakathi vattitthiiru ofurahela nuuru yaya eto. 36 Ila miiyo kinaaye oshaahiti nwulweene zayita Yaahaya, mwaasa wa khaazi akinkhiyeeyo Paapa yoori kikhole. Ethiito oshaahiti yoori Paapa ti akirumiyeeyo. 37 Paapa otu akiperekhiyeeyo, onlaza oshaahiti monkoni wa miiyo. Mweeyo khamwina siile huula yawe, wala khamwina moone nanna ariiyo, 38 theenya khamwina nttakhuzi lawe nroho, maana khamwinkhupaleeni otule amperekhiyeeyo. 39 Mwasoma zawaatikhiwa ttakatthiifu, maana mwinoona yoori khwa yo mwinaaye ohaayi wa mileele, ila pi etthiipo zinikilawelaaye oshaahiti, 40 ila mweeyo khamwintakha okiteela miiyo yoori mwiiyane ohaayi.
41 Miiyo akinkhupalela siifwa za anaatamu. 42 Maana miiyo kajuwa yoori mweeyo khamwina pheta ya Nluku nkatthi mwenu. 43 Miiyo kata khwa nzina la Paapa, ila khamwikipwekhereleeni. Nkina amana ata khwa nzina lawe mweenyewe, weekhweele mwintta ompwekherela. 44 Mwinttela okhupali toovi mwitakhaka osifwiwa pi atthu, mwihitakhaka siifwa ya Nluku mmote paasi?
45 Khwa etthiipo mwihaakanyere miiyo wuulokovezani mmakhono wa Paapa. Anttelaaye wuulokovezani ti Munsa, othuuto mwiriinaaye nroromelo enu. 46 Eriwaka mwaari okhupalela epile Munsa alupiyeeyo, mweetta okikhupalela na-miyo, maana ye aatikha vitthu monkoni wa miiyo. 47 Ila amana mwihikhupalaka etile aatikhiyeeyo, nanna-ni mwinttelaaye okhupalela etile miiyo kinlupaaye?”

*5:3