8
Muukha aasikaniweeyo araruwaka
Attaaphale Yinsa khulankha khusala alawa omwaako wa Oluveera. Supuyeene khurutela Nnyupa Woosifwiwamo, atthu ooshi khusala alawa onkutthanana, ye khwiikhala khusala awaasomisa. Anamanozela a kano na mafwarizeewu khuntana muukha mmote ansikaniyeeyo eettaka oraruwa. Khumweemesa vakatthi wa atthu apale. Khuuziwa Yinsa yoori: “Mwaaliimu, muukha otu asikaniwa eettaka oraruwa. Muukha toowo, nkatthi wa kano za Munsa, enniruma onvonya na mawe. Khi weeyo onlupa ni?” Aari olupa toowo atakhaka yoori apatthe nanna yonlokoveza. Ila Yinsa khwiinama khusala aatikha vathi na yaala. Wiiya eetta okhanyarela omuuzela, Yinsa khulankha khuwooza yoori: “Otule khwa mweeyo, ahina twampi eeye wamwanzo omweeselela liwe muukha otu.” Khurutela wiinama khusala aatikha theenya vathi.
Noosiila mattakhuzi apale, ooshi khulaazavo mmote mmote, aaziye apale awulu. Khusalavo Yinsa na muukha otule eemeliye, attaaphale. 10 Aphano Yinsa khulankha khweemela khumuuzela yoori: “Muukha, ari vayi apale aya? Khina oohukhumwiyeeyo?”
11 Ye khujipu yoori: “Khina mmote, Mbwana.” Aphano Yinsa khumuuza yoori: “Na miiyo akinuuhukhumu. Olawe na ottharuwe oretta twampi.”
Yinsa nuuru ya olumwenku
12 Yinsa khurutela owooza theenya yoori: “Miiyo ki nuuru ya olumwenku; otule anikilottaye khaneettetta n'yiiza, ila oniiyana nuuru ya ohaayi.”
13 Mafwarizeewu khusala amuuza yoori: “Weeyo ojilawela oshaahiti omwenyeweru. Apho oshaahiti awo khahiyo wa khweele.”
14 Yinsa khuwaajipu araka: “Hatha nkhama kintta ojilawela oshaahiti, oshaahiti aka pi wa okhweele, maana kinjuwa ohali kilankhiyeewo na ohali kineettaawo. Ila mweeyo khamwinjuwa ohali kilankhiyeewo wala ohali kineettaawo. 15 Ophuka wenu mweeyo pi wa phantte ya onaatamu; ila miiyo akinimphuka hatha ntthu. 16 Hatha nkhama kintta ophuka, ophuka waka pi wa khweele, maana akiri otthome. Kina Paapa otule akiperekhiyeeyo. 17 Nkano zenu mweeyo yaatikhiwa yoori oshaahiti wa atthu awiri pi wa khweele. 18 Miiyo kinjilawela oshaahiti na Paapa otule akiperekhiyeeyo onikilawela oshaahiti.”
19 Aphano khumuuzela yoori: “Papaawo aya ori vayi?” Yinsa khuwaajipu yoori: “Mweeyo khamwinikijuwa miiyo na khamwininjuwa Paapa, eriwaka mwaari okijuwa, mweetta onjuwa Paapa.” 20 Ye aalupiye mattakhuzi apa eettaka osomisa Nnyupa Woosifwiwamo, kharipu ya puuro etile entthiwaamo zaakha. Ila khina mmote ankholiyeeyo, maana waari ohinafiye wakathi aya.
Yinsa onaakisela khaazi yawe na ofwalume
21 Yinsa khurutela olupa theenya yoori: “Miiyo kintta olawa, mweeyo mwinlawa mwakeekese na mwinfwa na twampi zenu. Ohali kineettaawo mweeyo khamwineettawo.”
22 Aphano mayaahuuti khuuzelana yoori: “Talili ye onttela ojuula? Tiito anlupaaye yoori: ‘Ohali kineettaawo mweeyo khamwineettawo?”
23 Yinsa khurutela olupa theenya yoori: “Mweeyo mwa atthu a vathi attaapha; miiyo ki wa otulu. Mweeyo mwa voolumwenku; ila miiyo akiiyo wa olumwenku. 24 Tiito kinlupaaye yoori mwinttela ofwa ntwampi mwenu. Nkhama mweeyo khamwinkhupali yoori Miiyo Ti Miiyo, weekhweele mwinttela ofwa ntwampi mwenu.”
25 Aphano khumuuzela Yinsa yoori: “O paani weeyo?” Yinsa khujipu yoori: “Tokhiya omwanzo kawuuzani. 26 Kinaaye vitthu zawaatta zoolupa na ophuka monkoni weenu mweeyo. Ila otule akiperekhiyeeyo ti wa khweele na kinuuza olumwenku epile kinsiliyeeyo paasi.”
27 Yo khuhiweeleyi yoori Yinsa aari owuuza monkoni wa Paapa. 28 Aphano Yinsa khuri: “Amana mweeyo mwinsifu Mwaana wa Pinaatamu, mwintta ojuwa yoori Miiyo Ti Miiyo na akinretta hatha etthu ya matakhelo aka, ila kinlupa etile Paapa akisomisiyeeyo. 29 Otule akiperekhiyeeyo ori vamote na-miyo, ye khakilikheeni wiiya otthome, maana wakhula wakathi kinretta etile enintuvelaaye.” 30 Alupiyeevo mattakhuzi apale, atthu awaatta khumkhupali.”
Aana a Eburahiima na aana a sheethwani
31 Yinsa khuwooza mayaahuuti apale ankhupaliyeeyo yoori: “Amana mweeyo mwijilipisana nttakhuzi laka, mwinttela wiiya anakhiyoni aka khweele; 32 na mwinttela ojuwa haakhi, na haakhi ethiito entta wuutaphulani.”
33 Yo khunjipu yoori: “Fweeyo na peewu ya Eburahiima wala khanineeyeke viitthwaana za ntthu nkina. Weeyo onlupa toovi yoori ninttela wiiya wootaphuliwa?”
34 Yinsa khuwaajipu araka: “Miiyo kiniwuuzani khweele yoori, wooshi otule ankosaaye mwiitthwaana wa twampi. 35 Mwiitthwaana khaniiyana puuro ya mileele vakatthi wa ajaama, ila mwaana oniiyana puuro ya mileele. 36 Amana Mwaana ootaphulani, weekhweele mwiniiya wootaphuwa. 37 Miiyo kinjuwa saaneene yoori mweeyo mwa peewu ya Eburahiima, ila mwineekesa okuula, maana khwa mweeyo nttakhuzi laka khalina puuro. 38 Miiyo kiniwuuzani epile kooniyeezo wa Paapa, na mweeyo mwinretta epile mwisiiliyeezo wa papeenu.”
39 Aphano yo khunjipu yoori: “Papeetthu ti Eburahiima!” Yinsa khuwooza theenya yoori: “Nkhama mwa aana a Eburahiima, mwikhole khaazi epile Eburahiima akholiyeezo. 40 Ila mweeyo mwintakha okuula, kiri miiyo kiwuuziyeenini haakhi etile kisiiliyeeyo wa Nluku. Eburahiima kharetteeni toowo. 41 Mweeyo mwinretta etile papeenu arettiyeeyo.” Yo khujipu yoori: “Fweeyo khaniiyo aana pure, ninaaye Paapa mmote paasi Nluku.”
42 Yinsa khuwooza yoori: “Eriwaka Nluku aari Papeenu, mweetta okipheta, maana miiyo kalankha wa Nluku tiito kiriiyo apha. Miiyo akijitiiseeni otthome, ila ye ti akiperekhiyeeyo. 43 Mwaasa wa niini mweeyo ehiweeleyakani hapari zaka? Ama mwintta woona olipa nttakhuzi laka.
44 Mweeyo mwinaaye papeenu, sheethwani, na mwintakha oretta etile enintuvelaaye. Ye namahusuti waaza omwanzweene wala khanalotteleke haakhi, maana ye khana haakhi. Amana ahataka onlupa mattakhuzi awe, maana namahata, paapa wa ohata. 45 Maana mwaasa wa miiyo olupa haakhi khamwinkitakha! 46 Paani wa mweeyo anwahaaye okilokoveza oretta twampi? Nkhama kinlupa haakhi, khi mwaasa wa niini mwihikikhupalaka? 47 Otule eeyiyeeyo wa Nluku onsiila mattakhuzi a Nluku; mweeyo khamwininsiileza maana khayi mwa a Nluku.”
Yinsa na Eburahiima
48 Mayaahuuti khumuuza Yinsa yoori: “Fweeyo khanivonyeleeni olupa yoori weeyo o nsamariiya na onaaye sheethwani.”
49 Yinsa khuwaajipu yoori: “Miiyo akina hatha sheethwani; olikha toowo, kininshitahi Paapa, ila mweeyo mwinkitarawu. 50 Miiyo akineekesa ojisifu, ila owaapho anekesaaye khwa miiyo na namaphuka. 51 Miiyo kiniwuuzani khweele yoori, otule anshututelaaye nttakhuzi laka khanteela woona ofwa.”
52 Mayaahuuti khujipu araka: “Aphano ninjuwa yoori khweele onaaye sheethwani! Eburahiima afwa, na manapiyu, ila weeyo onlupa yoori: ‘Ntthu amana ashututela nttakhuzi aka khanteela ofwa.’ 53 Weeyo onwulweene zayita papeetthu Eburahiima? Ye afwa na manapiyu afwa, khi weeyo onjoona nkhama paani?”
54 Yinsa khuwaajipu yoori: “Nkhama kintta ojisifu, ojisifu waka khuna maana. Paapa otule mweeyo mwinraaye ‘Nluku etthu,’ ti ankisifwisaaye. 55 Mweeyo khamwininjuwa, ila miiyo kininjuwa. Eriwaka keettiye olupa yoori akininjuwa, kaari wiiya namahata nkhama mweeyo, ila miiyo weekhweele kininjuwa na kinshututela nttakhuzi lawe. 56 Eburahiima papeenu aari woofurahi paata ya woona siikhu ya ota waka; khoona na khufurahela.”
57 Mayaahuuti khumuuzela yoori: “Weeyo nalelo khuneeyane nyaakha hamusiini, wamoona toovi Eburahiima?”
58 Yinsa khuwaajipu yoori: “Miiyo kiniwuuzani khweele yoori, Eburahiima ahinavokoliwe Miiyo Ti Miiyo.” 59 Aphano mayaahuuti khuthuula mawe yoori anvonye, ila Yinsa khujivitha na khusaruwamu Nnyupa Woosifwiwamo.