1 Ãcõrẽba mãwã quĩrã djuburiad̶ara Jonába ab̶ed̶a biẽ́ unusia. Maʌ̃ bẽrã bio quĩrũsia. 2 Idjia Ãcõrẽa nãwã jarasia:

–Mʌ̃ Boro Ãcõrẽ, wad̶ibid̶a mʌ̃ druad̶e b̶asid̶e ¿mʌ̃a jaraẽ́ basica ara maʌ̃ quĩrãca mãwãida? Maʌ̃ carea mʌ̃ra Tarsi druad̶aa mĩrũ wã quĩrĩãsia. Mʌ̃a bio cawa b̶ʌa bʌ biad̶eba ẽberãrãra carebabarida. Bʌra quĩrã djuburiaid̶a b̶ʌa. Isabe quĩrũcaa. Bʌ quĩrĩãra bio waib̶ʌa b̶ʌ bẽrã ẽberãrãba cadjiruada idu b̶ʌsid̶ara bʌa ãdjirãa cawa oi jarad̶ara quĩrãdoabaria. 3 Maʌ̃ carea mʌ̃ Boro Ãcõrẽ, mʌ̃a bʌ́a quĩrã djuburia iwid̶iya ab̶ed̶a mʌ̃ra beamãrẽã. Zocai b̶ei cãyãbara biara b̶ʌa mʌ̃ra beuida.–

4 Baribʌrʌ Ãcõrẽba jarasia:

–¿Bʌmaarã bia b̶ʌca bʌ jãwã quĩrũ b̶ʌra?–

5 Maʌ̃be Jonára puru dajadaa wãped̶a ʌ̃mãdau odjabariare de zaqueda osia. Maʌ̃ de zaque edre chũmeped̶a jʌ̃ã b̶esia Ninive purura sãwãi cawaya. 6 Mãwã b̶ʌd̶e Ãcõrẽba Joná caita jʌ̃cara quedua joub̶ʌa b̶ʌda tunubiped̶a waribisia.* Wãrãda cawad̶aẽ́ panʌa cãrẽ quedua basida, hebreo bed̶ea cawa b̶ea bid̶a cawad̶aẽ́ panʌ bẽrã. Maʌ̃ jʌ̃carara Joná chũmʌ ʌ̃rʌ̃ bʌrá wãna bẽrã Jonára cũrãsad̶e necai b̶esia. Idjira capipia b̶esia maʌ̃ jʌ̃cara carea.

7 Baribʌrʌ nurẽma diaped̶a Ãcõrẽba caragada diabuesia maʌ̃ jʌ̃cara comãrẽã. Maʌ̃ba jʌ̃carara beusia. 8 Besea odjad̶acarea Ãcõrẽba ʌ̃mãdau odjabariareba nãũrã jʌ̃wʌ̃rʌ̃ãda puábisia. Maʌ̃ne beseaba Jonára bá nũmesia. Mãwã b̶ʌd̶e Jonára cacua norrab̶ari nũmesia. Maʌ̃ carea idjira wetara beu quĩrĩãsia. Nãwã jarasia:

–Zocai b̶ei cãyãbara biara b̶ʌa mʌ̃ra beuida.–

9 Baribʌrʌ Ãcõrẽba idjía iwid̶isia:

–¿Naʌ̃ jʌ̃cara beud̶a carea bia b̶ʌca bʌ jãwã quĩrũ b̶ʌra?–

Jonába panusia:

–Mãẽ. Wãrãda mʌ̃maarã bia b̶ʌa jãwã quĩrũ b̶aira. Mʌ̃ra quĩrũbid̶eba ab̶ed̶a beu quĩrĩã b̶ʌa.–

10 Maʌ̃ carea Ãcõrẽba idjía jarasia:

–Jʌ̃cara bʌ caita tununara bʌa uẽ́ basía idjab̶a waribiẽ́ basía. Diamasi tunuped̶a nurẽma diamasi beusia. Baribʌrʌ maʌ̃ jʌ̃cara beud̶a carea bʌra sopua b̶ʌa. 11 Bʌda maʌ̃ jʌ̃cara carea sopua b̶ʌbʌrʌ, ¿Ninive puru droma cawa oida b̶ad̶a carea aud̶uara sopua b̶aped̶a mʌ̃a quĩrã djuburiaiẽ́ b̶asica? Wãrãda jãʌ̃ purud̶e cadjirua o panʌ adua b̶eada 120 mil aud̶u panʌa.† Cadjirua o panʌ adua b̶ea. Maʌ̃ bed̶eara idjab̶a nãwã traducida b̶ʌa: “Warrarã adua qued̶ea.” Hebreo bed̶ead̶e nãwã b̶ʌ́ b̶ʌa: “Jʌwa arara idjab̶a jʌwa acʌra cawaẽ́ b̶ea.” Maʌ̃ awara animarã sid̶a baraa.–