Ɓataaki faade e
Ibaraninkooɓe
1
No Laamɗo haaldiri e men Ɓiyum
Laamɗo haaldiino e njaatiraaɓe men gila ko ɓooyi cili keewɗi e sifaaji keewɗi, o haaldiri e maɓɓe annabaaɓe. Kaa e ley ɗee ɲalaaɗe cakitotooɗe o haaldirii e men Ɓiyiiko mo o tagiri aduna oo fuu, mo o waɗi donoowo huunde fuu oo. Kaɲum woni jalbugol annoora teddeengal Laamɗo, kaɲum nanndi e Laamɗo jaati, omo tammborii huunde fuu konngol makko jogiingol semmbe. Caggal nde o tilii laɓɓinde luutti yimɓe ɗii ndee, o jooɗii ɲaamo Laamɗo Toowɗo oo to dow kammu too. Ɗum ɓurni mo malaa'ika'en teddude fotude e innde nde Laamɗo hokki mo ɓurnde inɗe maɓɓe ɗee.
Haala Ɓiɗɗo ɓurɗo malaa'ika'en
Fay gooto e malaa'ika'en ɓee Laamɗo wiyaali:
«Aan a Ɓiyam,
hannde laatii-mi baam maa.»* Jabuura 2.7
Naa kasen:
«Mi laatoo Baaba mum,
laatoo Ɓiyam.» 2 Samuyila 7.14
Kasen duu, nde o nelata hammadiijo makko oo e aduna oo ndee, o wii:
«Yo malaa'ika'en Laamɗo fuu cujidana ɗum.» Fillitagol Tawreeta 32.43
Laamɗo wii banngal malaa'ika'en ɓee:
«O waɗii malaa'ika'en makko kenuuli,
o waɗii kaadime'en makko lewle yiite.»§ Jabuura 104.4
Kaa banngal Ɓiɗɗo oo, mo wii:
«Laamu maa, aan Laamɗo, woodan faa abada abadin!
Fooccitaare yo tuugorde laamu maa.
Aɗa yiɗi fooccitaare,
aɗa waɲi ooɲaare,
saabe ɗum, Laamɗo Joomiraaɗo maa suɓori maa,
hokku maa seyo ɓurngo ngo wondiiɓe maa ngoo.»* Jabuura 45.7-8
10 O wii kasen:
«Gila e fuɗɗoode, Joomiraaɗo,
aan tabintini leydi,
juuɗe maa tagir-ɗaa kammuuji ɗii,
11 kanji ɗi timman, kaa aan, a heddoto,
ɗi fuu ɗi kiiɗɗiran no kaddule nii,
12 a sowiran ɗi no saaya nii,
ɗi mbattitoroo no neɗɗo wattitortoo e saayaaji mum nii.
Kaa aan, a wattitataako,
nguurndam maa duu timmataa.» Jabuura 102.26-28
13 Fay nde wootere, Laamɗo wiyaali gooto e malaa'ika'en:
«Jooɗa ɲaamo am,
faa mi waɗa njaɓɓaa wayɓe maa.» Jabuura 110.1
14 Malaa'ika'en ɓee fuu yo ruuhuuji gollanooji Laamɗo, ɗi mo nelata faa ngollana heɓooɓe kisindam ɓee.

*1:5 Jabuura 2.7

1:5 2 Samuyila 7.14

1:6 Fillitagol Tawreeta 32.43

§1:7 Jabuura 104.4

*1:9 Jabuura 45.7-8

1:12 Jabuura 102.26-28

1:13 Jabuura 110.1