2 San Juan
1
Ciertoniiba, undag købiiba
Na, Tiusweimburabelan pera marøb pasrabig i kilgawan pørar, Tius lawa wesrua tøgagúig ishuumisagwan nui ureemeranba, tru na newan ciertonigu undaarailan. Katø natø kømøtø, mayeeløba tru newan ciertonigwan nebua ashibeløbe truiløgucha ñimune undaaran. Nambe ñimun undaarappe, tru newan ciertonig namui manrrau pasraikkurrin køn. Inchen tru ciertoniibe namba managatig pasrønrrun. Tius Møskaweimba, katø Señor Jesucristo, tru Møskawei Nusrkaweimba, nui ka yandø tab indig køben, namun lastima asig køben, chi isumgaig tab købig køben namuim pala pønrrønrrun, tru newan ciertoniguba, undag købiguba.
Undaguelø kømigwan karua pasrig
Nabe truba truba kasraarar ñimui ureemerai utu møiløgøben Tiuswei newan ciertonigu amønain kuimba, Tius Møskai namun maig karua pasrig køben, treekke. Ñi, ishug misagwan, na møi ñun pørigwan, martrai kan srøig karua pasra pørig kuig lataig inchimørrunrrig chinrrainchar. Treeg kømøtø, tru srøsrøgurri namun maig karua pasrigwan trunundøweim pørar, tru kangurrin kangurri undaarayagun taigwan. Iig køn nam tru undag købigwan tøga pønrramibe, Tius tru maig maramigwan martrai pønsrailan trunun møra marøb amønamig. Inchen tru martrai karua pasrigwan ñim srøsrøgurri møriibe undag købigu amøñinrrain taig, truig kuig køn.
Namui isubigwan Cristoinug pønsra amønaig
Pøs yu piraube isa may wamincha kegørrøsrkøbelø truba truba webambin køn ‘Jesucristobe yu piraumay møg lataig misra arrumuig køn’ chibelø. Øyeeg inchibiibe tru may wamincha kegørrøsrkøbig, tru Criston ashig kømui inchib tsalø ashibig, truig kønrrun. Ñimasiitøwei tab asha melay, ñim chigøben tabig marøb melailan kaptøasha pønrrømønrrappe. Treeg kømøtø, ñimui utamigwan kerrigu newan utamig kønrrai melay.
Møikkøben Cristo kusrenanigutø pasrønrrab inchimøtø, nuinetø nemarøb purab kusrennrrab inchibiibe, Tiuswane chigaig køn. Trune Cristo maig kusrenanigutø pasrabig pasrabiibe, truibe si, Møskawanba, Nusrkawanba tøgaig køn. 10 Møikkøben ñimuinug arrua, tru treeg kusrenanigwan kømø kusrenanene, ñimui yau ‘amø’ cha, kebermøwei, ni katø ‘manguen arrin køn’ tamig kømøwein køn. 11 Kaguende ‘manguen arrin køn’ chibiibe tru nø kaig mariiløyu nøgucha tøgatø marøb pasran.
Srabe wamindiilø
12 Nabe ñimun truba truba pøramig tøgagøbendø, kilgayu tintatøga pørmøtø, nabe ñimuimay attrab isur, malaugue ñimba waminchab namui kasrag købigwan newan tøgagønrrab.
13 Tru ñui lawa wesruig numøsrawei ureemerabe ñun ‘tab ka uñguh’ chib wam øran.