Mokoĩa kuaxia Samuel 'epyre oĩa
Mokoĩa kuaxia Samuel 'epyre oĩa
Kova'e kuaxia ma Davi rekokue oĩa, huvixa oĩ jave guare. Jypy ma Judá regua kuery ruvixa oĩ. Ha'e rire ma Israel kuery ha'e javi ju oipota huvixa oĩ aguã.
Davi ma Nhanderuete re ojerovia ete va'e. Ha'e ramo ojapo ngovaigua kuery ha'e javi re ipo'aka aguã rami. Ijyvate ete, ha'e heta va'e kuery ha'e javi ombojepokuaapa ojee. Ha'e rami teĩ itavy reia py ojapo vai guive. Ha'e ramo ixupe profeta Natã ijayvu ramo Davi onhemombe'u: “Ajejavy raka'e Senhor pe.” Natã ombovai Davi pe: “Senhor ndeperdoa rejejavyague gui. Ndee ma neremanoi 'rã. Ha'e rami avi rejapo vaiague káuxa ma Senhor rovaigua kuery ijayvu rei okuapy. Ha'e gui ndera'y oiko rire omano 'rã”, he'i (12.13-14). Nhanderuete ombopaga rã Davi ojou porã ha'e ogueropo'aka. Ha'e rami teĩ Davi ro pygua kuery ojapo jepi iporiau aguã rami.
Davi ma Israel pygua huvixa ikuai va'e gui yvateve va'e oiko raka'e. Ha'e nunga rupi nhandereraa jepearã Nhanderuete ombou va'ekue pe ma “Davi ra'y” e'ỹ vy “Davi ramymino” 'ea. Davi ma heta salmo ojapo raka'e Nhanderuete pe oporai vy.
1
Israel kuery oitypa ha'e Saul omano aviague Davi pe omombe'uague
1 Saul omano ma rire Davi ojevy ju Amaleque kuery oitypaague gui. Ha'e vy mokoĩ ára re oiko Ziclague tetã py.
2 Mboapy araa py, Saul pegua kuery ijaty okuapya gui ou peteĩ ava ijao xoropa rei va'e, oakã áry yvy omoĩmba rei reve.* Oao omondoropa rei ha'e oakã re yvy omoĩ Saul omanoague re ipy'a vai vy (Gênesis 37.29,34, 1 Samuel 4.12, 2 Samuel 1.11). Davi oĩa py ha'e va'e ovaẽ vy ojero'a, yvy re oĩ guenapy'ã re.
3 Ixupe Davi oporandu:
— Magui tu reju?
Ombovai:
— Anha ajuvy Israel kuery ijaty okuapya gui — he'i.
4 Davi oporanduve ju:
— Mba'e tu oiko ha'e py? Emombe'u ke xevy.
Ombovai:
— Joguero'aa gui ore kuery ronhamba, heta ho'a vy omano rã, Saul ha'e ta'y Jônatas guive — he'i.
5 Ha'e rami rã Davi aipoe'i kunumi imombe'ua va'e pe:
— Mba'exa tu ha'vy reikuaa Saul ha'e ta'y Jônatas omanoa?
6 Ha'e rã kunumi imombe'ua va'e aipoe'i:
— Avaẽ xapy'a rei Gilboa yvyty re. Ha'e rã Saul ojeko oiny guembiporu hu'y re. Ha'e gui karóxa ha'e kavaju árygua kuery ojokove tema okuapy.
7 Guakykue katy oma'ẽ vy xerexa vy xerenoĩ. Ha'e ramo xee “Apy ma aĩ” ha'e ixupe.
8 Xevy pe oporandu “Mava'e tu ndee?” he'i ramo xee ambovai: “Xee ma Amaleque regua”, ha'e.
9 Ha'e ramo aipoe'i xevy: “Eju ha'vy, xe'áry epu'ã he'amy ha'e xejuka, mba'eta xerajyjeapa rei va'eri xerekovea oime teri”, he'i.
10 Ha'e ramo hi'áry apu'ã ha'amy vy ajuka, mba'eta xee aikuaa porã ndoikovei 'rãa ho'a ma rire. Ha'e vy coroa oĩ va'ekue ajopy ha'e ipoapy regua, ha'e gui aru apy ndevy xeruvixa — he'i.
Davi ojuka ukaague Amaleque regua
11 Ha'e rami rã Davi oao ae ojopy vy omondoro, avakue hexeve ikuai va'e ha'e javive Davi ojapoa rami avi ojapo okuapy.
12 Iporiaupa, ojae'opa okuapy, ha'e va'e ára okaru e'ỹ re ikuai ka'aru peve, Saul ha'e ta'y Jônatas omano ramo, ha'e Senhor pegua Israel kuery re guive, kyxe py ho'apa rire.
13 Davi aipoe'ive ju kunumi imombe'ua va'e pe:
— Maguigua tu ndee?
Ombovai:
— Xee tu amboae guigua ra'y, Amaleque regua — he'i.
14 Davi aipoe'i ixupe:
— Mba'exa tu nderekyjei ri ra'e Senhor oiporavo va'ekue rovai ndepo reupi aguã?
15 Ha'e gui ma Davi oenoĩ peteĩ kunumi va'e. Ha'e vy aipoe'i:
— Eju, epu'ã peva'e ava re — he'i. Ha'e ramo oipyxo rã omano.
16 Davi aipoe'i va'ekue:
— Ndere ae toĩ nderuguy moẽague repaga aguã, mba'eta ndejuru py ae nderovai remombe'u vy “Ajuka Senhor oiporavo va'ekue”, 're va'ekue.
Saul ha'e Jônatas re Davi ipy'a vaia rupi oporaiague
17 Ha'e gui Davi ojae'o Saul ha'e ta'y Jônatas re. Po rami oporaei iporiaua rupi.
18 Judá ra'y kuery ha'e javi ombo'e uka avi kova'e mboraei guyrapa regua, kuaxia para heko porã va'e kuery rekokue oĩa va'e re.
19 — Israel kuery, perovy'a rei va'ekue ho'a ma pendeyvy re yvy'ã oĩ va'e re!
Mba'exa tu ipy'a guaxukueve ho'apa!
20 Ha'e rã Gate tetã py ma pemombe'u eme,
peikuaa uka eme guive Asquelom tetã py tape ikuai va'e rupi,
filisteu kuery rajy kuery oguerovy'a rei e'ỹ aguã,
opire omboi uka e'ỹ va'e rajy kuery ovy'a rei reve opo-opo e'ỹ aguã.† Gate ha'e Asquelom ma Israel rovaigua kuery filisteu va'e retã.
21 Ha'e gui Gilboa yvy'ã peiko va'e,
pende'áry to'ave eme yxapy neĩ oky,
pendere toikove eme mba'emo aju,
mba'eta ha'e py ma ipy'a guaxukueve mba'e hu'y jokoa ojeatypa yvy re,
Saul mba'e hu'y jokoa voi ho'a rire nomboveraavei ma 'rã azeite py.
22 Jônatas peteĩgueve ma voi ndogueropytu'ui va'ekue guapa,
neĩ Saul ndogueru jevy rivei va'ekue okyxe,
ojuka va'ekue ruguy ha'e ipy'a guaxukueve kyrakue oĩ e'ỹ re.
23 Saul ha'e Jônatas ma ija'ea ha'e oayvuve pyre,
oikovea ja ha'e omano ma teĩ nomboja'oai!
Taguato gui ipojavave,
ha'e guary gui imbaraeteve va'ekue.
24 Peẽ Israel rajy kuery, pejae'o Saul re,
ajukue pytã va'e py pemonhemonde,
ha'e ouro guigua py pendeao ombojegua va'ekue re.
25 Mba'exa tu ipy'a guaxukueve ho'apa raka'e joguero'aa py!
Jônatas voi ojukaa yvy'ã re!
26 Xeryvy Jônatas, xeporiau aikovy ndere!
Ndee xerayvu vaipa va'ekue!
Xerayvu ete vy
kunhague gui voi ndee xerayvuve va'ekue.
27 Mba'exa tu ipy'a guaxukueve ho'apa,
ha'e hembiporu joguero'aa pygua okanhymba! — he'i.