1 Chuaq Jêhowa doe ka Môise rameh: Drah pùng baiq capiac hmo tìah qmang ka baiq capiac ma adroe; khoe èh au achìh ta baiq capiac kô ƀài bàu ma khoe oe ta baiq capiac adroe, ìh ma khoe broq padah. 2 Hì da-èh, ep rap qmòe, jò bu qngah tŏc tawang Sina-i, yòng enh qngèa au ta aih. 3 Ùh i cabô tŏc pajùm ti ìh, jàp tawang ùh jah hnoq i mangai, yac ka trìu ƀo hadai ùh jah acaq nhat tawang kô hòm. 4 Môise hi pùng baiq capiac hmo, tìah qmang ka baiq capiac ma adroe; rìu sroeh, tì wê baiq capiac aih tŏc tawang Sina-i, wop troeq bàu Chuaq Jêhowa khoe thê.

5 Khoe aih Chuaq Jêhowa loh taqne yùc, yòng tìa Môise rai creo deh yiniq la Jêhowa. 6 Haq lam pagat ti ngèa Môise, rai creo: Jêhowa! Jêhowa! Aih la Boc Plình loq tamèt, ha-och, adia ka nòeh, bình bauq kan loq waq xam kan ùh tablòq manoh. 7 Wèq kan loq waq trùh bình ka muàn qnhòng, caqnaih kan ngang dù; yiniq lui kàn xam yiniq lui mahaq ùh doe mangai i yiniq lui aih ùh i ka yiniq lui, èh ajang yiniq lui da kan cadraq phŏc kon xau trùh piq pôn qnhòng. 8 Môise drah bla-op ta taneh đòeq kùh waiq, rai doe: 9 Waiq Chuaq tàng joq au jah đeh kan tamèt enh ngèa ìh, au cali calo ìh lam taqne nhèn, yac ka nang noe kô aih la nang noe cadoq ranŏng, cađac da nhèn kan dù xam yiniq lui, rai yŏc nhèn broq kùng hang ìh. 10 Chuaq Jêhowa doe rameh: Kô, au broq moeq tajao. Enh ngèa ka mangai da ìh, au broq bài kan halac qnhòq lah broq ta crŏng taneh, yac ka nòe mangai diac wì; xam dìq dŏng taqne xinoe kô ta aih i ìh, jah hnoq bìac da Chuaq Jêhowa, majah qmang aih trong au padon broq joq ramòt kàn. 11 Ep rabiaq haq oq trong au ma tanap thê ka ìh hì kô. Ngan kô èh au hnan qnoh enh ngèa ìh mangai Amôrit, mangai Cana-an, mangai Hêtit, mangai Phêrêsit, mangai Hêwit, xam mangai Jêbusit. 12 Ep rabiaq haq oq, apaq broq tajao ti xinoe mangai da gùng pì ma padon mùt, yùq èh wì haq loq wìa hlàp taqne pì. 13 Mahaq pì ep raliang đac prang tadreo, tùq padah radua qmù rai raliang qnìh đac ƀài kiac da wì haq. 14 Ìh paq bla-op enh ngèa ka kiac qnoeq, majah qmang Jêhowa yiniq haq la Boc Plình git trong dù. Haq joq Boc Plình tagit ka trong dù. 15 Ep rabiaq haq oq, paq broq tajao ka mangai tagùng aih, yùq èh jò wì haq tango dèh ti ƀài kiac da wì haq rai tadreo dèh ka ƀài kiac, i mangai adràc, èh ìh haqngui acaq dahwèq tadreo ti wì haq qmòh. 16 Èh hanoh apaq ban kon cadrì da wì haq am ka kon calô ìh broq mai, yùq èh jò kon cadrì da wì haq tango dèh ti ƀài kiac da wì haq, loq padô adràc kon calô ìh hanoh tango ti ƀài kiac da wì haq diq qmòh.

17 Ìh paq broq ƀài radua qmù kiac. 18 Ìh ep wèq ramènh ƀênh ùh wàt blo. Wop jò khê qmau sròc, ep acaq ƀênh ùh wàt blo ta tapèh hì, wop qmang ka au khoe tanap thê ìh, majah qmang aih khê aih raq ìh loh khoe ka gùng Êdip. 19 Ƀài kon calô ramua aih dìq da au, xam ƀài ramua calô ta calùh ngè aban da ìh, yac ka ƀo yac ka trìu hanoh qmang aih. 20 Mahaq ìh ep rùp moeq toq trìu calô qnì loq bubi calô qnì đòeq hu baxon kon lùa ma ramua. Tàng ùh baxon haq, ìh ep goh ranŏng haq. Ìh ep baxon deh ƀài kon ramua calô; èh hadai apaq i cabô lam tì dech trùh hàu enh ngèa au.

21 Ta tadràu hì ìh abroq achap beq, mahaq trùh hì tapèh ep padài, yac ka jò abèq yac ka jò gat dua ìh ep padài. 22 Gàu jò gat qmau mì, ìh ep wèq ranenh da ƀài tuàn ramènh, cloh hanam wèq ramènh gat.

23 Moeq hanam piq yàng, taqne pì, rìm ngai calô ep lam yòng enh ngèa Chuaq Jêhowa, aih la Boc plình da Isorali. 24 Majah qmang aih au hnan đac ƀài mangai ta aih loh khoe ka mat ìh, parùng aniang ka ìh, èh jò ìh loh yòng enh ngèa Chuaq Jêhowa Boc Plình ìh, moeq hanam piq yàng, aih èh ùh i ka cabô ma enh blah yŏc taneh ìh 25 Ìh paq dèch mahim da ngè tadreo au xam ƀênh i tah blo; jam ngè tadreo da ramènh Pancwa paq đòeq trùh qngah sroq èh 26 Ìh ep aràng dèch dahwèq ma yeo lem dŏng da riang plì ma ramua enh taneh ruàng ìh mùt ta hnim Jêhowa, aih la Boc Pình ìh.

Ìh paq pai jam bubi ta diac tôh kan haq.

27 Chuaq Jêhowa hanoh doe ka Môise qmang kô: Drah achìh ƀài bàu kô; majah qmang aih tiaq ƀài bàu kô raq au ma hubroq tajao ti ìh xam Isorali. 28 Môise oe ta aih ti Chuaq Jêhowa pôn jàt hì pôn jàt mang, ùh acaq ƀênh, hadai ùh ôq diac; Chuaq Jêhowa achìh ta baiq capiac hmo ƀài bàu tajao, aih la mòeq jàt ranenh.

29 Jò Môise loh enh wang Sina-i tì haq wê baiq capiac tajao, ùh qnì dèh hadrò rađeh qngah ma ca-ah ca-iang majah qmang aih đeh hatuàng ka Chuaq Jêhowa 30 Jò Arôn xam mangai Isorali ngan Môise hnoq hadrò haq qngah ca-ah ca-iang, loh ka yùq ùh hùa thia haten. 31 Mahaq Môise creo ka wì, qmang aih Arôn xam ƀài gucraq hi thia haten; khoe èh haq hatuàng ti wì. 32 Khoe aih, dìq ka mangai Isorli thia haten diq, haq anoe ka wì loq dìq dŏng ƀài ranenh da Chuaq Jêhowa khoe am ka haq tawang Sina-i 33 Jò Môise khoe hêq ka capoch tuàng ti wì, haq hi yŏc bai clùp dèh hadrò. 34 Mahaq jò leq Môise mùt enh ngèa ka Chuaq Jêhowa đòeq hu hatuàng ka haq, aih dèch deh bai clùp hadrò trùh jò leq haq loh; đòeq lam anoe ka mangai Isorali rìm nà Chuaq Jêhowa khoe tanap ka rađeh. 35 Mangai Isorali ngan Môise hnoq akia hadrò haq qngah ca-ah ca-iang, aih èh Môise yŏc bai bàng dèh hadrò trùh jò leq haq mùt hu hatuàng ka Chuaq Jêhowa.