LUCAS JESUCRISTO ENƗRUEMO ILLA RAFUE CUIAFUE
1
Lucas Teófilomo cartana orede
1-4 Teófilo, cue isiruiga nabai. ¿Nɨgacɨno? Omo bie cartana oredɨcue. Caɨ motomo birui dɨga rafue jai suide. Jesucristo rafuena omo cuetɨcue. Naimɨe billa mei, dɨga comɨnɨ naimɨemo suide rafuena cɨodɨmacɨ. Iena llocana jɨaɨ jaidɨmacɨ. Naimacɨmona bie rafue raise uiñotɨcue. Bie rafuena fɨdɨanona, damɨerie iena jai cuetɨmacɨ. Bie rafuena jɨaɨ jai cacadɨo. Bie rafuena cue raise uiñua jira, uanaicɨnona o raise uiñollena, bie cartana jai cuetɨcue. Iese birui cue comecɨ jitaide.
Jusiñamui jaɨenicɨ Juan Bautista mɨcorɨ jeicɨllena llua rafue.
Jesucristo nia jeicɨñenia, Zacarías illa facaise Herodena mamecɨrede illaɨmadɨ. Judea railla enɨruena sedade. Zacarías Jusiñamui dɨga ñaɨraɨma. Abías raillasie facaimo duillamona, Jusiñamui jofomo maɨjɨuide. Naimɨe aɨdɨ Elisabet. Naiñaiño jaie ite usumadɨ Aarón mɨcorɨ. Aarón mɨcorɨdɨ Jusiñamui dɨga nano ñaɨraɨma. Jusiñamuimona iaɨmaiaɨ mare, nana naimɨe lloga uaina raise iaɨmaiaɨ ɨɨnua jira. Naiñaiño oɨniñona jira, uruenidɨaɨmaiaɨ. Jɨaɨ jai uaɨcɨma iaɨmaiaɨ.
Zacarías facai ite comɨnɨ maɨjɨa facaise ia, Jusiñamui jofo dɨne naimɨe maɨjɨaide. Nainomo naimɨe maɨjɨia, caɨmare soride ra fo jobaillena, naimɨena fetodɨmacɨ. Naimacɨ fɨnouilla isoi, jobaillanona danɨ Jusiñamui dɨga ñaɨraɨnɨ naimɨena fetodɨmacɨ. Iemei naimɨe fo jaide. 10 Fo jailla mei, naie caɨmare soride ra boa facaiseconi, Jusiñamui dɨga naimɨe ñaɨano, ailluena comɨnɨ Jusiñamui jofo ecɨmo itɨmacɨ. 11 Ieconi caɨ Nama Jusiñamui jaɨenicɨdɨ naie ra boano nabeimo Zacaríamo bairede. 12 Naimɨena cɨuanona, Zacarías jacɨnaite. 13 Jaɨenicɨ naimɨemo llote:
—Zacarías, jacɨnaiñeno. Jusiñamui o jɨɨacɨnona jai cacade. Iemona o aɨ uruesite. Ɨimana jocoite. Juan o jɨtalle naimɨe mamecɨdɨ. 14 Iemona o comecɨ caɨmare iite. Iobitɨo. Ailluena comɨnɨ naimɨe jeicɨari iobitɨmacɨ. 15 Jusiñamuimona naimɨe jamai bue isoiñeitɨmɨena jaite. Jɨfaitate rana jiroñeite. Naimɨe jeicɨamona Jusiñamui Joreño naimɨena namataite. 16 Caɨ Nama Jusiñamui dɨbeimo ailluena Israel comɨnɨna naimɨe itataite. 17 Jusiñamui jitaillacɨnona fɨnocana jaite. Elíamo Jusiñamui Joreño jaie siño uai illa isoi, naimɨemo iite. Jusiñamui rafuena naimɨe lluamona, damɨerie, naimacɨ jaiagaɨ isoi, Jusiñamuina ɨɨnoitɨmacɨ. Ailluena Jusiñamui uaina jai ɨɨnoñedɨmacɨ; ia damɨerie birui ɨɨnoitɨmacɨ. Naimacɨ comecɨaɨ Jusiñamui dɨbeimo meidoitɨmacɨ. Iemona caɨ Nama Jesucristo bia, naimɨena ɨɨnoitɨmacɨ.
18 Zacarías dɨnena jɨcanote:
—¿Nɨese o llua suillena uiñoitɨcue? Jai uaɨcɨmadɨcoco.
19 Jusiñamui jaɨenicɨ dɨnena uai ote:
—Gabrieldɨcue. Jusiñamuimona bitɨcue. Cuena oretate, bie mare rafuena omo llollena. 20 Ero, cue uaina o ɨɨnoñena jira, uainitɨo, o jito jeicɨlle dɨnori. Jɨaɨruido bie rafue suite.
21 Jusiñamui jofomo jino itɨno Zacarías jino billena sedadɨmacɨ. “¿Bue ñellena naimɨe are biñede?” comecɨaɨna facadɨmacɨ. Naimɨe jino are biñena jira, raijicaidɨmacɨ. 22 Naimɨe jino bitemo, naimacɨ dɨga jai ñaɨnide. Ie onollɨ dɨga facajamona, Jusiñamui jaɨenicɨ naimɨemo jai lluana uiñotɨmacɨ. Naimɨe ñaɨñeno ite. 23 Jusiñamui jofomo naimɨe maɨjɨa facaise fuilla mei, ie jofomo abɨdo jaide. 24 Dɨgarui illanona, ie aɨdɨ urueside. Ie jira jofomo naiñaiño cinco fɨvui fɨebide, comecɨna facajanona: 25 “Cue uruesilla jira, iena nia buna lloiacaiñedɨcue. Cue Nama cuena jai duenaillana uiñotɨcue. Navui cue urue iñena jira, meiruitɨcue. Jai meiruiñeitɨcue. Comɨnɨ cue joreñona jai ñaɨñeitɨmacɨ”.
Jusiñamui jaɨenicɨ Jesús jeicɨllena llua rafue
26-27 Elisabet seis fɨvui uruesilla mei, Jusiñamuidɨ Galileamo ie jaɨenicɨ Gabrielna orede. Nazaretmo María dɨne naimɨena orede. María nia ɨninide; ia jai José jɨcanogañaiño. Naimɨe usumadɨ David mɨcorɨ.
28 Rillanona, naiñaiñomo llote:
—Itɨo. Caɨ Nama Jusiñamui ona eo duenaite. Ona jai fetuamona, nana jɨaɨe rɨñonɨaɨ baɨfemo naimɨedɨ ona marena itatate.
29 Iena cacajanona, naiñaiño jacɨnaite. Iena naiñaiño raise cacaiñena jira, iemo comecɨna facade. 30 Gabriel dɨnena llote:
—Jacɨnaiñeno. Jusiñamui ona duenaite. 31 Birui uruesitɨo. Ɨimana jocoitɨo. Naimɨe mamecɨna jɨtaitɨo Jesúna. 32 Siño Jitona jaite. Nanoca Itɨmɨe Jitona jaite. Ie usuma David mɨcorɨ illaɨma illa isoi, Jusiñamuidɨ naimɨena illaɨmana itataite. 33 Illaɨmana illamona, Israel railla naɨraɨna jaca sedaite. Naimɨe ifomo jɨaɨmɨe jaca iñeite.
34 María uai ote:
—Ɨima dɨga nia iñedɨcue. ¿Nɨese bie nɨbaɨlle?
35 Gabriel llote:
—Jusiñamui Joreño omo iite. Ie siño uai dɨga iena fɨnoite. Jusiñamui marena isoi naimɨe jɨaɨ marenite. Naimɨedɨ Jusiñamui Jito. 36 O comɨnɨ iñaiño, Elisabet, ie uaɨcɨtailla facaise jɨaɨ jai urueside. Naiñaiño jai jionaide; ia jai seis fɨvui naiñaiño uruesilla ite. 37 Jusiñamui nana bie isoide rafuena fɨnorede.
38 María uai ote:
—Jee. Jusiñamui anamo itɨcue. O lluacɨno cuemona mare.
Ie facaise Gabriel naiñaiñomona oni jaide.
Maríadɨ Elisabet dɨne jailla rafue
39 Ie facaiseconi María aneduaɨ dɨne Judea railla enɨruemo Zacarías illanomo raɨre jaide. Elisabetna cɨoillena, jaide. 40 Zacarías jofomo rillano:
—Itɨo —raillanona, Elisabetna uaidote. 41 Elisabet naiñaiño uaina cacajano, ieconi naiñaiño jeraimo ite urue iena jɨaɨ uiñuamona, niraɨde. Ie facaise Jusiñamui Joreño anamo Elisabet jai ite. 42 Iese illamona, María uruesillana uiñote. Naiñaiño ado llote:
—Jusiñamui ona eo marena canoite. O uruena marena itataite. 43 Jamai bue isoidɨcue; ia, odɨ cue Jilloitaraɨma ei illanona, cue dɨne bitɨo. Iena cuemo nia lloñedɨo; 44 ia, cuena o uaiduanona, iobillamona cue jeraimo ite uruedɨ niraɨde. 45 Caɨ Nama omo llotataga uaina suillana o ɨɨnua jira, Jusiñamui ona eo marena canoite. —Jusiñamui Joreño naiñaiñomo illamona, iena llote.
46 María dɨnena uai ote:
Caiñaɨ Nama eo mare. Naimɨemo iobillacɨnona fecaacadɨcue.
47 Naimɨedɨ cue Jilloitaraɨmana jira, naimɨeri iobidɨcue.
48 Jamai bue isoidɨcue; iadedɨ cuena fetode.
Ie jira biruimona nana comɨnɨ cuena marena ñaɨtɨmacɨ.
49 Naimɨedɨ siño. Naimɨedɨ mareuidɨmɨe. Cue facaina eo mare rafuena fɨnode.
50 Naimɨena ɨɨnotɨnona jaca duenaite. Caɨ jaiagaɨna jaca duenaite. Caɨna birui jaca duenaite. Ua nana naimɨena ɨɨnotɨnona duenaite.
51 Dɨga siño rafuena fɨnoite. Abɨ ɨedotɨno comecɨaɨ facajacɨnona llɨɨcaitaite.
52 Naimɨedɨ illaɨcomɨnɨna oni dotaite; ia jamai bue isoidɨnona jamai bue isoiñedɨnona itataite.
53 Dueredɨnona eo canoite; ia duenidɨnomo buena fecañeite.
54 Duenaillamona, caɨ Israel comɨnɨna feitañeite.
55 Caɨ jaiagaɨmo naimɨe jaie llua isoi, birui caɨna canoite.
Abraham mɨcorɨmo jaie llote: “Ona duenaitɨcue. O comɨnɨna jaca duenaitɨcue”
María llote. 56 Elisabet dɨga davui amani naiñaiño fɨebide. Ie mei ie jofomo abɨdo jaide.
Zacarías jito jeicɨa rafue
57 Elisabet jocuarui jai ridemo, ɨimana jocode. 58 Naiñaiño ecɨmo ite comɨnɨ, naiñaiño comɨnɨ dɨga, iena fɨdɨamona, caɨ Nama naiñaiñona eo duenaillana uiñotɨmacɨ. Naiñaiño dɨga iobidɨmacɨ. 59 Ocho dɨgarui jeicɨa mei, naimacɨ fɨnouilla isoi, urue abɨna dia rafuemo bitɨmacɨ. Ie moo mamecɨna jɨtaacadɨmacɨ; 60 iadedɨ Elisabet llote:
—Dama ite. Jitaiñedɨcue. Naimɨe mamecɨdɨ Juan caɨ jɨtalle.
61 Uai otɨmacɨ:
—¿Bue ñellena iese raitɨo? O comɨnɨmona jaca bu Juan mamecɨredɨmɨena iñede.
62 Jefona cacaiñena jira Zacaríamo onollɨ dɨga jɨcanotɨmacɨ, ie jito mamecɨna jɨtallena. 63 Onollɨ dɨga Zacarías faɨriuano, rabena jɨcade. Cuete: “Naimɨe mamecɨdɨ Juan”. Ieri raijicaidɨmacɨ. “¿Bue ñelle iena jɨtade?” comecɨaɨna facadɨmacɨ. 64 Ieconi Zacarías jai dane ñaɨte. Ie jira Jusiñamuimo iobillacɨno fecade. 65 Nana iaɨmaiaɨ ecɨmo itɨno raijicaidɨmacɨ.
—Jusiñamui muidona naie rafue suide —llotɨmacɨ. Bie rafuena fɨdɨano, nana Judea railla aneduaɨmo itɨnodɨ iena ñaɨoidɨmacɨ. 66 Iena cacajano, comecɨaɨna facadɨmacɨ: “Bimɨe jamai bue isoiñeitɨmɨena jaite”. Caɨ Nama naimɨena marena jaca canua jira, iese llotɨmacɨ.
Zacarías Jusiñamuimo iobillacɨnona fecaja rafue
67 Ie facaise Jusiñamui Joreño Zacaríana llotatajanona, Zacarías llote:
68 Caɨ Nama Jusiñamuidɨ mare.
Caɨ Israel comɨnɨ dɨne biite, caɨna jilloitallena.
69 David mɨcorɨ Jusiñamuina jaie sedade.
David mɨcorɨ comɨnɨmona siño Jilloitaraɨmana caɨ dɨne oretaite.
70 Ie facaina lloraɨnɨdo naimɨe jaie llua isoi, caɨ Jilloitaraɨmana oretaite,
71 Taɨfemona, Janabamona caɨ jilloillena.
72-73 Caɨ usumatɨaɨ mɨcorɨaɨmo: “Omoɨna duenaitɨcue” llote.
Caɨ usuma Abraham mɨcorɨmo jaie llogacɨnona feitañede.
74-75 Taɨfemona caɨ jilloillena, caɨ Jilloitaraɨmana oretaite.
Nana caɨ ille dɨnori Jusiñamuina jacɨruiñeno sedajana jitaide.
Naimɨe jitailla isoi caɨ illena, naimɨe jitaillacɨnona caɨ fɨnollena, caɨ Jilloitaraɨmana oretaite.
76 Cue jito, ona lloitɨcue. Jusiñamui ie lloraɨmana jaitɨo.
Caɨ Nama uicomo jaitɨo, comɨnɨ comecɨaɨ o raise fɨnollena.
77 Ie comɨnɨmo jeacɨnomona jilluacɨnona lloitɨo.
Iena naimacɨ ɨɨnoia, Jusiñamui naimacɨ jeacɨnona feitaite.
78-79 Jeacɨno anamo jai caɨ illa jira, jitɨredɨnomo itɨcaɨ isoidɨcaɨ.
Jusiñamuina caɨ nia ɨɨnoñenia, fiodaillana jacɨruitɨcaɨ.
Naimɨe caɨna duenaillamona, caɨ Jilloitaraɨma billena o llofuellena, ona oretaite.
Naimɨena caɨ ɨɨnoia, jitɨredɨnomo iñeitɨcaɨ; ia Jusiñamui dɨga caɨ comecɨaɨ uri iite.
80 Zacarías jito sairide. Jusiñamuina ɨɨnocana jaide. Comɨnɨmo naimɨe nia marefodo lloñenia, jofue iñenanomo ite.