U BꞌAXA Uꞌ ITZꞌIBꞌA BꞌEN U PABLO XEꞌ U TIMOTEO
Yol tiꞌ u uꞌ tzaꞌ
Aatz u Timoteo vaꞌl kꞌulun u uꞌ tzaꞌ, u locholich tetz u Pablo tiꞌ ipax paal itziiul u bꞌaꞌnla chusbꞌal. Aꞌ ixeꞌt kꞌatz u Pablo tu u kaꞌpaj ibꞌen tiꞌ ipaxsal itziiul u bꞌaꞌnla chusbꞌal tuchꞌ u Silas tu u tenam Listra. Choktaj Qꞌu Bꞌaꞌnla Chaj Kam Bꞌanel (Hechos) 16.1-3; 17.14-15; 18.5; 19.22; 20.4. Aatzich u tatin u Timoteo kꞌatz u Pablo tziꞌ, echaꞌ maꞌj copastoor.
Aatz u U Bꞌaxa Uꞌ Xeꞌ U Timoteo tzaꞌ, aꞌ tzꞌibꞌan u Pablo utz, taqꞌ bꞌen tzixeꞌ tixoꞌl qꞌu yaꞌbꞌ 63 — 65 m.t.J. Kamal tu Macedoonia itzꞌibꞌava utz, taqꞌ bꞌen tu Eefeso, xeꞌ u Timoteo. Tan obreroich u Timoteo tu Eefeso.
Kam koj tokeꞌ itzꞌibꞌataꞌ, pek tiꞌ taqꞌax bꞌen itxumbꞌal u Timoteo tiꞌ aas kaniꞌch tiqꞌol qꞌu niman tetz u Jesuus siꞌaneꞌ. Tan nital tu u Timoteo aas kaniꞌch inukꞌit tibꞌ qꞌu niman tetz u Jesuus siꞌaneꞌ. Kam itxumbꞌal samotxiꞌaneꞌ sijununil utz, tibꞌilaj; kaniꞌch tiqꞌot tibꞌ samotxiꞌaneꞌ niyolonka.
Nital te majte aas samotxiꞌan kuenta tibꞌ tu qꞌu subꞌulla chaj chusul. Ayaꞌ unjolol qꞌu Israeel nichipaal xoꞌl qꞌu niman tetz u Jesuus, qꞌuꞌl nichtaleꞌ aas ministeer ankoꞌxh sanimal u oꞌtla mantaar kꞌuxh maꞌt tok tiꞌ u Jesuus. Aꞌ qꞌu yeꞌxtxojla chaj chusbꞌal qꞌuꞌl atich tek tixoꞌl.
Ech aꞌ vibꞌoꞌqꞌol nitaleꞌ viqꞌilal isikꞌle Tioxh tiꞌ qꞌu kam. Utz nital majte aas kam bꞌanel titxumbꞌal qꞌu qꞌesala qꞌuꞌl saoksal tu qꞌesalail xoꞌl qꞌu niman tetz u Jesuus. Utz nichus u Timoteo majte aas kam siꞌan tiꞌ itxꞌolax inujul junun kam xoꞌl qꞌu niman tetz u Jesuus.
Aꞌ u jatxbꞌal tibꞌ qꞌu yol tu u uꞌ tzaꞌ.
1) 1.1-2 Nitaqꞌ chajlichil u Pablo tu u Timoteo.
2) 1.3-11 Nitaleꞌ sauch kuentaibꞌ tu qꞌu yeꞌxtxojla chusbꞌal.
3) 1.12-20 Nital tiꞌ u tijleꞌm u Pablo.
4) 2.1-15 Nital tiꞌ viqꞌilal isikꞌlel Tioxh.
5) 3.1-7 Nital tiꞌ qꞌu kam sailax kꞌatz qꞌuꞌl saok tu ansianoil.
6) 3.8-13 Nital tiꞌ qꞌu kam sailax kꞌatz qꞌuꞌl saok tu diaakonoil.
7) 3.14-16 Nital tiꞌ vitxumbꞌal u Tioxh vaꞌl yeꞌich ootzajimal.
8) 4.1-5 Nital tiꞌ qꞌu aanima qꞌuꞌl saelka tiꞌ u Tioxh.
9) 4.6-16 Nital tiꞌ vitxumbꞌal u bꞌaꞌnla taꞌqonom u Jesuus.
10) 5.1—6.2 Nital tiꞌ qꞌu txumbꞌal sabꞌaꞌnbꞌel ibꞌilaj.
11) 6.3-10 Nitaleꞌ aas echen sakuꞌ kukꞌuꞌl tiꞌ u qetz atile.
12) 6.11-19 Nital tiꞌ u elaꞌokchil tiꞌ u atinchil kꞌatz u Tioxh.
13) 6.20-21 Nital unjolol txumbꞌal tu u Timoteo.
1
U BꞌAXA Uꞌ ITZꞌIBꞌA BꞌEN U PABLO XEꞌ U TIMOTEO
Ichajlichil u Timoteo
In Pablo, ichaj u Jesucristo titzii u Tioxh, u Chitol qetz. Utz titzii u kuBꞌaal Jesucristo majte vaꞌl nikuchꞌia tuchꞌ txuqꞌtxunchil tan, sataqꞌoꞌ tu bꞌaꞌnil. Nunqꞌilabꞌenaxh Timoteo tan, nojchit unkꞌaol aatin tiꞌ u kunimat u Jesuus. Utz u Tioxh, u kuTat tuchꞌ u kuBꞌaal Cristo Jesuus koj aqꞌon kuꞌl vibꞌaꞌnil saiꞌ. Itxum koj aatz. Utz atin koj u paas tavaanima taqꞌo majte.
Qꞌu yeꞌxtxojla chaj chusbꞌal
Aatz siꞌchtekbꞌenin tu Macedoonia, val see aas sakaaꞌaxh tu Eefeso. Ech samaj iatz qꞌu aanima qꞌuꞌl nichus unjot yeꞌxtxojla chaj chusbꞌal. Utz yeꞌk sabꞌen ikꞌuꞌl qꞌu niman tetz u Jesuus tiꞌ tabꞌil ok kam aas yol koꞌxhtuꞌ chulimal koꞌn. Nikoꞌxh sabꞌen ikꞌuꞌl tiꞌ qꞌu tachul qꞌul ikꞌuy imam qꞌul ibꞌenaꞌ ibꞌen koꞌxhtuꞌ. Tan kam koj itxaꞌk. Kam koj nilochonku tiꞌ qiqꞌot kuyakꞌil kꞌatz Tioxh. Pek aal yaayoliꞌbꞌ koꞌn nituch tiꞌ. Ech aꞌ vaꞌl niꞌxhval see cheel samaj iatz.
Tan aꞌ nital u kuchusbꞌal tzaꞌ aas nojchit xeꞌ taanima u aanima sakꞌaskuꞌl vibꞌantu tii tiꞌ imol. Tiira tinachbꞌal saꞌatinka aas bꞌaꞌn vaꞌl niꞌaneꞌ. Sikꞌucheꞌ aas nojchit suula kꞌujlel ikꞌuꞌl tiꞌ u Tioxh; yitꞌ nikoꞌnkoxhteesa ivatz. Tan atil unjolol aas elyuka tiꞌ ibꞌanax qꞌu kam nivaleꞌ tzaꞌ. Utz aꞌ tek nitzꞌejxik tiꞌ unjot chulin yol aas yeꞌk itxaꞌk. Nimotxtaqꞌ bꞌen tibꞌs mamaj chusul tetz u oꞌtla mantaar. Pek kꞌuxh ech nimotxtal jeꞌ tiꞌ, aal yeꞌ tootzaj. Utz yeꞌ nitel itxumbꞌal tu qꞌu kam qꞌuꞌl nitxakbꞌaꞌ talaxeꞌ.
Tan bꞌaꞌn u oꞌtla mantaar. Kankojtuꞌ, aas oj nojchit sanimali kam chit echaꞌ vaꞌl tal u Tioxh. Utz qootzajle aas tiꞌ koj qꞌu aanima jikom niꞌaneꞌ alaxku qꞌu mantaar tziꞌ. Pek txꞌolbꞌal tetz inujul qꞌu bꞌanol onkonil, qꞌu qelol, qꞌu aa paav, qꞌuꞌl kam koj itxaꞌk nima Tioxh te, qꞌuꞌl yeꞌk tatin u Tioxh siatz, qꞌu yoqꞌol Tioxh, qꞌu yatzꞌol itxutx ibꞌaal utz, tuchꞌ kajay qꞌu yatzꞌol, 10 tetz qꞌu eesanibꞌ tu bꞌey tuchꞌ aanima, qꞌu qꞌilan ok tetz vinajil, tetz ixojil, qꞌu elqꞌan aanima, qꞌu txubꞌaꞌlom, qꞌu txakbꞌaꞌn txubꞌaꞌl utz, tetz kajay qꞌuꞌl nixeꞌkꞌulan qꞌu jikomla chusbꞌal. 11 Ayaꞌ u techalla bꞌaꞌnla chusbꞌal tetz u Tioxh vaꞌl kaana bꞌaꞌnil tzixeꞌ, vaꞌl nunpaxsa paal itziiul.
Vikꞌamabꞌel u Tioxh
12 Niꞌxhunkꞌama tu u kuBꞌaal Cristo Jesuus tan, vetitxaaꞌin; kꞌujlebꞌal kꞌuꞌl in siatz, vettoksaꞌin tiꞌ ipaxsal itziiul viyolbꞌal. Utz niꞌxhtaqꞌ unyakꞌil tiꞌ ibꞌanaxeꞌ. 13 Kꞌuxh aal inich yoqꞌol Tioxh. Inich yoqꞌol tetz qꞌu niman Tioxh. Nichunbꞌan unkꞌuꞌl tiꞌ, nichvojcha. Utz aal txꞌanel munkꞌulaxeꞌ, txumax unvatz tan, yeꞌxhkamich vootzaj utz, yeꞌ nichunnima.* Choktaj Qꞌu Bꞌaꞌnla Chaj Kam Bꞌanel (Hechos) 8.3; 9.4-5. 14 Ech sibꞌ u bꞌaꞌnil vettaqꞌ u kuBꞌaal ve. Tii viꞌ utz, nikꞌujeꞌ unkꞌuꞌl tiꞌ u Cristo Jesuus taqꞌo.
15 Jikomla yol vaꞌl savaleꞌ tzaꞌ utz, tiira bꞌaꞌn aas kajay aanima saniman. Kꞌuxh ul u Cristo Jesuus tu u vatz amlika txꞌavaꞌ tzaꞌ, tiꞌ ichitpul qꞌu aa paav ulka. Aꞌ chit unmaꞌl in tan, tiira in aa paav majte. 16 Pek kꞌuxh mam paav bꞌanel vaqꞌo, vetitxum unvatz u Tioxh. Utz tu vikuytꞌin u Jesucristo, maꞌl kꞌuchbꞌal vettaqꞌa aas tiira yeꞌk iyaꞌebꞌal vikuyuneꞌ. Ech in kꞌuchbꞌal vatz qꞌu aanima oj sinima, sikꞌul u atinchil tu bꞌenqꞌii bꞌensaj. 17 Ech tokeꞌ aatz u mam tokebꞌal qꞌii utz, kajay u mam techalil, tetz u Tioxh. Ayaꞌ u qꞌesal ijlenal vaꞌl ech koꞌxh ibꞌen u tijleꞌm, u Tioxh vaꞌl yeꞌk tokebꞌal u kamchil tiꞌ, vaꞌl abꞌil koj maꞌj ilonnaj iatz. Niꞌxhikꞌuloꞌk tiꞌ saoksal iqꞌii. Tan taꞌxh maꞌl aa txumbꞌalla Tioxh bꞌenamen. Ech koꞌxh ibꞌen u tatineꞌ. Aꞌi.
18 Unkꞌaol chiꞌin Timoteo, tii aabꞌi u chusbꞌal nival see tzaꞌ. Ankoꞌxhtuꞌ u yol kꞌasuꞌl xeꞌ Tioxh, vaꞌl alax see aas axeꞌt chituꞌ. Kꞌuxh nival see, aꞌ unsaꞌ siiqꞌo ayakꞌil tiꞌ imajax u yeꞌxtxoj. Ech saꞌaneꞌ vaꞌl niꞌan maꞌj aa chꞌaꞌo tiꞌ imajax ivatz u koontra. 19 Tii kꞌujloj akꞌuꞌl tiꞌ u Tioxh utz, iqꞌo ayakꞌil; oksa tetz vabꞌaꞌnla nachbꞌal vatz Tioxh. Tan atil unjolol aanima yeꞌt ibꞌan qꞌu kam nival see tziꞌ. Yeꞌ nitiqꞌo iyakꞌil tu vaꞌl nital u bꞌaꞌnla chusbꞌal. Elyuka tiꞌ; kuꞌya. Vetiꞌanlu tetzan u vaarko vaꞌl nikoꞌp jaqꞌ aꞌ. 20 Antu tixoꞌl qꞌu aanima tziꞌ u Himeneo tuchꞌ u Alejandro. Utz vetveesal xoꞌl qꞌu niman tetz u Jesuus, vaqꞌluka vatz u txꞌiꞌliꞌinaj; ech satootzaji aas ech koꞌn koj u qelonchil.

*1:13 Choktaj Qꞌu Bꞌaꞌnla Chaj Kam Bꞌanel (Hechos) 8.3; 9.4-5.