CARTA ALAXTO TET ANMA HEBREO AYXACO YUL ISKꞌAB COMAM DIOS
1
Tzotel Comam Dios tet anma yu Iscꞌahol
1 Yet yalan̈tocanoj txꞌiꞌal el yeb nanantan̈e yu istzotel Comam Dios tet ebnaj jichmam yu ebnaj ischejab Comam. 2 Yajaꞌ wal yin̈ islahobal tiempo tiꞌ tzotel Comam Dios jet yu Iscꞌahol, haꞌ xin yul iskꞌab Iscꞌahol tuꞌ yacanico sunil tzettaj ye tuꞌ; yuto yu Iscꞌahol tuꞌ yuxin iswatxꞌe Comam sunil tzet ay yul sat yiban̈kꞌinal tiꞌ. 3 Haꞌ Iscꞌahol Comam tuꞌ chiyenilo iskꞌakꞌal yip Comam Dios yeb yechel Comam yehi. Haꞌ xin yip Istzotiꞌ Iscꞌahol tuꞌ ikꞌn̈e sunil tzettaj ay yul sat yiban̈kꞌinal tiꞌ. Lahwi con̈issajn̈encano Comam Cꞌahole yin̈ comul, yoc tzꞌon̈no yin̈ iswatxꞌkꞌab Comam Dios yul satcan̈.
Caw ecꞌbal yelapno Iscꞌahol Comam Dios yiban̈ ebnaj ángel
4 Iscꞌahol Comam Dios, caw ecꞌbal yelapno ye yiban̈ ebnaj ángel; yuto haꞌ ismunil Comam ecꞌbal yelapno ye yiban̈ ismunil ebnaj. 5 Wal xin machi hunu ebnaj ángel bay yal Comam Dios hacaꞌ yu yalni Comam tet Comam Cristo:
Hach tiꞌ, hach Incꞌaholan, chiwakꞌcanojan hacawil yin̈ huneꞌ tzꞌayic tiꞌ,* Sal 2:7; Hch 13:33 ẍi Comam.
Maẍtaj yin̈ hunu ebnaj ángel bay yalpaxo Comam hacaꞌ tiꞌ:
Haninan Ismam naj. Incꞌaholan ye naj, ẍi.
6 Chalnipaxo yin̈ yet yaniti Comam Dios hunpilan Iscꞌahol yul sat yiban̈kꞌinal tiꞌ:
Yikꞌabayo isba sunil ebnaj yángel Comam Dios tet naj,* Dt 32:43; Sal 97:7 ẍiayoj.
7 Walpaxo yin̈ ebnaj ángel chal hacaꞌ tiꞌ:
Chuteco Comam Dios ebnaj ángel hacaꞌ jakꞌekꞌ cat yutenpaxico Comam ischejab hacaꞌ xaj kꞌa kꞌaꞌ,* Sal 104:4 ẍi.
8 Walpaxo yin̈ Iscꞌahol Comam tuꞌ chala:
Hach Dios, yahaw hach yin̈ sunilbal tiempo. Haꞌ istoholal xin chawatxꞌe yet ayachico Yahawiloj.
9 Caw chachtzala yin̈ iscꞌulal, wal istxꞌojal xin chayaha. Yuxin sicꞌbilachilo yu Comam Dios haDiosal. Caw ecꞌbal tzalahilal yakꞌ tawet sata ebnaj hawetbi,* Sal 45:6-7 ẍi.
10 Chalnipaxoj:
Hach tiꞌ Mam Wahawil yet yichebanil hawatxꞌe txꞌo txꞌotxꞌ, hawatxꞌenpaxo satcan̈.
11 Sunil tzet watxꞌebil hawu tuꞌ chitan̈caniloj. Walach tiꞌ xin ayachn̈eticꞌa yin̈ sunilbal tiempo. Sunil tzet watxꞌebil tuꞌ chiichambiloj hacaꞌ chu isxilbilo hunu xilkꞌape.
12 Chapajtzoyo hacaꞌ chu ispajtzolaxayo hunu kꞌap kꞌap, cat hahelni hacaꞌ chu ishelni hunu mac xil iskꞌap, yajaꞌ walach xin huneꞌn̈eticꞌa haꞌ hach yin̈ sunilbal tiempo, machi bakꞌinal chachtan̈iloj,* Sal 102:25-27 ẍiayoj.
13 Machi hunelo tiꞌ yal Comam Dios tet ebnaj yángel hacaꞌ yu yalni tet Iscꞌahol:
Ayan̈ tzꞌon̈no yin̈ inwatxꞌkꞌaban masanta chiwakꞌacojan macta ayco ishowal tawin̈ yalan̈ hawoj,* Sal 110:1 ẍi Comam.
14 Sunil ebnaj ángel espíritu ebnaj, ayco ebnaj ischejabo Comam Dios yu iscolwa ebnaj yin̈ macta chischah iscolbanil.