ODOEJE LIWAKATE JOÃO
João anakaaɡ̶ijo me idítini anodaaɡ̶ee lewiɡ̶a Jesus, odaa niɡ̶idiaaɡ̶idi jiɡ̶ijoa itiwatadiɡ̶idi eletidi liwakatedi.
João yalaɡ̶ata Jesus me Lionigi Aneotedoɡ̶oji, codaa midioka limedi miniwa miniwataɡ̶a Eliodi. Aneotedoɡ̶oji liciagi lokokena, odaa leeditibige mejonaɡ̶ateloco latalaɡ̶a, codaa me joleeɡ̶atibige me jaoɡ̶a ane iɡ̶enaɡ̶a. Nige jeloɡ̶otaɡ̶atalo ane ɡ̶obeyaceɡ̶eco, jaigo me ɡ̶odapitaɡ̶aditetema. Niɡ̶ina oko aneiteloco lokokena ailigoitice nioxoa. João yalaɡ̶atiogi niɡ̶ina ane micataɡ̶a daɡ̶a laxokodi, lionekadi, nigaanigipawaanigi leeɡ̶odi anodaaɡ̶ee meniwaɡ̶atakanaɡ̶a, odaa noxoɡ̶otiniwace me deɡ̶eneɡ̶egi oyemaateda oteɡ̶exaaɡ̶aɡ̶a odioteci lakataɡ̶a niɡ̶ina oko anida aneetege niɡ̶ina iiɡ̶o. Eo leemidi micota mina ane dakapetege Cristo, pida Aneotedoɡ̶oji Liwigo yakadi me nikeetoɡ̶owa anewi. Eo leemidi me doɡ̶oika diɡ̶ica ane ninaaletiniwace. Codaa yeloɡ̶oditiogi anodaaɡ̶ee moyowooɡ̶odi niɡ̶ica niwigo ane yaxawa oko me dotaɡ̶a domige icoɡ̶oticogi miniwataɡ̶a Aneotedoɡ̶oji, oɡ̶oa domige aicoɡ̶oticogi. Yalaɡ̶ata anodaaɡ̶ee niɡ̶ica lemaanaɡ̶aneɡ̶egitedoɡ̶odomi Aneotedoɡ̶oji. Eledi yalaɡ̶ata niɡ̶ina oko ane nakato Jesus, Lionigi Aneotedoɡ̶oji, niɡ̶ida gela lewiɡ̶a. Noɡ̶owidijedi lotaɡ̶a João yalaɡ̶ata niɡ̶ina oko ane nakato Ǥoniotagodi me iɡ̶eke loniciwaɡ̶a niɡ̶ina ane beyagi, ane dineetoɡ̶owa, codaa yalaɡ̶ata me leeditibige me joxaxinaɡ̶a niɡ̶inoa niwicidi noenataka.
1
Notaɡ̶a aneote ɡ̶odewiɡ̶a
Jidikonaɡ̶atibigaɡ̶ajitiwaji, ɡ̶odalaɡ̶atalo Niɡ̶ijoa anoditalo me “Notaɡ̶a”, aneote ɡ̶odewiɡ̶a, Niɡ̶ijoa anakaaɡ̶iniwa niɡ̶ijo maleekoka dinoe niɡ̶ina iiɡ̶o. Niɡ̶ida moko jajipaaɡ̶atalo Niɡ̶ijoa aneote ɡ̶odewiɡ̶a, codaa ijoa me jinataɡ̶a. Jatacoloɡ̶ojoɡ̶otece me jiwinaɡ̶a, codaa me jibaɡ̶atelogo. Niɡ̶ijo naɡ̶a dinikee Niɡ̶ijoa aneote ɡ̶odewiɡ̶a, odaa ja jinataɡ̶a. Odaa jeloɡ̶otaɡ̶atibece Niɡ̶ijoa ane jinataɡ̶a, Niɡ̶ijoa aneote oko midioka limedi me newiɡ̶a, ane ideite miniwataɡ̶a Aneotedoɡ̶oji ane Eliodi, Niɡ̶ijoa ane dinikeetedoɡ̶owa. Jatematiiɡ̶ataɡ̶awatiwaji niɡ̶ijoa ane jinataɡ̶a, codaa ane jajipaaɡ̶atalo, amaleeɡ̶aɡ̶a akaami eleditetiwaji ɡ̶adexocitoɡ̶ogi. Odaa ewi me ɡ̶odexogotege Ǥodiodi, codaa me Lionigi ane Jesus Cristo. Jidiiɡ̶atibigaɡ̶ajitiwaji naɡ̶adi notaɡ̶anaɡ̶axi jaoɡ̶atibige meliodi maniniitibecetiwaji.
Leeditibige me idejonaɡ̶a manitaɡ̶a nilokokena Aneotedoɡ̶oji
Natematigo ane natematitedoɡ̶owa Jesus, jatematiiɡ̶ataɡ̶awatiwaji. Niɡ̶ida natematigo yalaɡ̶ata Aneotedoɡ̶oji me liciagi lokokena, codaa aɡ̶ica nexocaɡ̶a miniwataɡ̶a. Nigejinaɡ̶a me ɡ̶odexogotege Aneotedoɡ̶oji, pida eidejonaɡ̶a nexocaɡ̶a miditaɡ̶a nibeyacaɡ̶a, odaa jiwitakaɡ̶a, ajaoɡ̶a niɡ̶ica anewi. Pida nige idejonaɡ̶a manitaɡ̶a lokokena liciagi Aneotedoɡ̶oji me ideite manitaɡ̶a lokokena, odaa okotawece ɡ̶odilaɡ̶atiwage, codaa lawodi Jesus, Lionigi Aneotedoɡ̶oji, napitaɡ̶adi inoatawece ɡ̶obeyaceɡ̶eco.
Nigejinaɡ̶a me diɡ̶ica ɡ̶obeyaceɡ̶egi, odaa okomoɡ̶okota idininaalenaɡ̶a, codaa aɡ̶ica mokotaɡ̶a niɡ̶ica anewi. Pida nige idineloɡ̶otaɡ̶atalo Aneotedoɡ̶oji niɡ̶ina mida ɡ̶obeyaceɡ̶egi, odaa eote micota niɡ̶ijo ane ligegi, codaa leeɡ̶odi me iɡ̶enaɡ̶a, odaa aɡ̶alee ɡ̶odiloikatidi leeɡ̶odi ɡ̶obeyaceɡ̶egi, pida iwilegitetema ɡ̶odaaleɡ̶ena inoatawece ane beyagi. 10 Nigejinaɡ̶a me diɡ̶ica ɡ̶obeyaceɡ̶egi, odaa jeɡ̶ejinaɡ̶atalo Aneotedoɡ̶oji me awitakegi (igaataɡ̶a Ijaaɡ̶ijoa yeloɡ̶odi minoa ɡ̶obeyaceɡ̶eco), odaa lotaɡ̶a Aneotedoɡ̶oji aɡ̶icoa mokotaɡ̶a.