1 Mndewa Imulungu yakwidike mna isiku ya magazo.

Twaga da Imulungu wa Yakobo dikukalize.

2 Yakutaze kulawa hanhu hong'ala,

na yakutaze kulawa kulugongo lwa Sayuni.

3 Yazikumbuke sadaka zako zose,

na yazitogole nhosa zako za kusoma moto.

4 Yakugwee gaja goulonda mmoyo wako,

na ugavikize gose gougelegeza kutenda.

5 Todeng'helela kwa ukombola wako,

tokwinula bendela kuditogola twaga da Imulungu wetu.

Mndewa Imulungu yakugwee gose guupula.

6 Nojuwa Mndewa Imulungu komkombola imndewa iyamsagule,

komwidika kulawa hanhu hong'ala ako kuulanga,

kwa mkono wake wa kudila komgwaa mhumo.

7 Iwanhu wayagwe oitapa kwa mituka ya ng'hondo,

na iwanhu wayagwe oitapa kwa falasi wao.

Lakini siye toigodela Mndewa Imulungu, Imulungu wetu.

8 Hewo oikwala na kugwa,

lakini siye tokwinuka na kwima.

9 Gweye Mndewa Imulungu,

umuhonye imndewa!

Utwidike twahakukema.