52
ZABULI YA 52
(Kwa kilanja, Zabuli ya Daudi mbuli ya kipindi Doegi Mwedomu viyamcholele Sauli na kumulongela, “Daudi kengila mng'anda ya Ahimeleki.”)*Lola kitabu cha 1 Samweli 21:7, 22:9-10.
1 Gweye zinhu, habali koigodela gehile?
Unogelo hawishaga wa Imulungu okala siku zose.
2 Gweye utendaga gehile,
lulimi lwako lopanga ubananzi,
kamba lwembe mkali.
3 Konogezwa na gehile kubanza ganogile,
na uvizi kubanza kulonga ukweli.
4 Konogezwa na ulonzi wa usede,
gweye lulimi lumemile uvizi.
5 Imulungu kokuhumulusa hasi milele,
kokuzomola na kokusegesa kulawa mkibanda chako,
kokung'ola kulawa mwiisi ya iwanhu weli wagima.
6 Wene haki okona na kudumba,
omseka na kulonga,
7 “Ino ayo munhu ija hamtendile Imulungu kamba ngome yake,
lakini katamanila utajili wake,
kakala galu kwa kuwabananga wayagwe.”
8 Lakini niye kamba biki da mzeituni,
dihandigwe mng'anda ya Imulungu,
noutamanila unogelo hawishaga wa Imulungu ukalaga siku zose na milele.
9 Go Imulungu, nokushukulu milele kwa gaja gautendile,
noditamanila twaga jako kwavija twaga jako dinoga.
Nokutogola kuulongozi wa iwanhu wako wang'alile.