1 Unhegeleze gweye Imulungu, kuiyalala kwangu,

ukalize ugima wangu kwa awo onihila.

2 Unifise kulawa kwa awo wehile ogelegeza vihile,

unike kutali na mting'hano wa iwanhu otenda gehile.

3 Onola milimi yao kamba sime,

olava mbuli za usede kamba misale.

4 Kulawa kuko kuwaifisile wamvamila munhu yelibule kitala,

omvamila kwa kusinhukiza bila kudumba.

5 Opanga kinhu kimoja kwa magesa gao gehile,

oilumba hanhu ha kufisa mitego yao.

Ogelegeza, “Haduhu yodaha kuyona.”

6 Otenda njama zao na kulonga,

“Tumambukiza mpango uno, nani yojuwa kinhu kino?”

Mipango ya kifiso ifisigwa mmoyo wa munhu.

7 Lakini Imulungu kowatowa kwa misale,

na bahaja olagazwa hasi.

8 Kowabananga kwa mbuli zao wenyego,

wose onda wawone ominula milomo yao kwa kuwabezeli.

9 Aho iwanhu wose odumba,

ogasimulila gayatendile Imulungu,

na ogagelegeza gaja gayatendile.

10 Wanhu wanogile wadeng'helele kwa Mndewa Imulungu,

na wamkimbilile heyo.

Wanhu wose wanogile omtogola heyo.