Ukanikorongi u Kagita̱ u
Bituru
Ukukpa̱ u kadyanshi
Bituru uza ɗa u korongi Tagara̱da u na vi, kasuki ka. U rongo ta̱ kaɓolo n Yesu. Aꞌayin a ɗa Yesu panai ikyamba u wene ta̱ n aꞌeshi a ne. A ukanikorongi u na vi, u yan ta̱ kadyanshi n Atoni a asu kau‑kau a kaci ka upana u ikyamba.
Bituru tonuko ta̱ Atoni u da, gba̱ a aꞌayin a ɗa baci upana u ikyamba u cina le, a yain maza̱nga̱. Cinda Yesu panai ikyamba aꞌayin a ɗa wa̱ri a likimba, nala dem atoni a ne u ka̱na̱ ta̱ a pana ikyamba. Upana u ikyamba u tsu zuwa ta̱ upityanangu u uza u doku u gbama. U tonuko le ta̱ ukuna u shinga u Kashila̱ wa̱ ta̱ n ele aꞌayin a ɗa baci dem a ka pana ikyamba.
Gogo‑na Atoni a ka pana ta̱ dem ikyamba. Kashila̱ ka̱ ta̱ pini tyoku ɗa wa̱ri. Ukanikorongi u na u na̱ka̱ tsu ta̱ ureve a kaci ka ukuna u mayun u kulu u ɗa wa ɓa̱nga̱ tsu aꞌayin a ɗa baci dem tsa pana ikyamba. U tonuko tsu ta̱ dem ukuna u shinga u shinga u ɗa tsa yan, aꞌayin a ɗa baci tsa pana kayanyan ko tsa pana ikyamba.
Ili iꞌya iꞌa̱ri a Tagara̱da u na vi
Idyani n kavasu (1:1-2)
Ili i maci i uzuwa u uma (1:3-12)
Kuryongo tyoku u ama a uwulukpi a Kashila̱ (1:13–2:17)
Iryoci i upana u ikyamba u Atoni (2:18-25)
Uwoko u katoni n upana u ikyamba (3:1–4:19)
Adooki ubana a asu u nkoshi n kuwa ku Atoni (5:1-11)
Idyani i makorishi (5:12-14)
1
Mpa Bituru kasuki ka Yesu Kirisiti Kawauwi ɗa ma sukunku ɗa̱ ukanikorongi u na vi. Ama ɗa Kashila̱ ka ɗanga̱sai alya ma koronku. Alya aza ɗa aꞌa̱ri ndishi yavu amoci a uyamba u Pontu, n Galatiya, n Kapadosiya, n Asiya, n Bitiniya.
Kashila̱ Tata u ɗanga̱sa ɗa̱ ta̱ caupa, kpam Kulu Keri ku wulukpe ɗa̱ ɗe. An u wokoi i na̱ka̱i Yesu Kawauwi karinga̱, mpasa n ne kpam n za̱ ɗa̱ ɗe. Kavasu ka va̱ ka i tsa̱ra̱ tsishinga tsu Kashila̱ ushani, na̱ ndishi n shinga n ne a uma u ɗe.
Atoni a yain n uzuwa u uma
Cikpalai Kashila̱ Tata u Asheku a tsunu Yesu Kawauwi. Wa̱ ta̱ n asuvayali cika hal u doku u matsa tsu ilimaci i savu. Adama a ilimaci i nala yi ɗa tsa̱ri n uzuwa u uma u ɗa wa̱ri n uma, kpam tsu tsa̱ra̱i ilimaci yi an a ꞌya̱nga̱sa̱i Yesu Kawauwi a ukpa̱. I na̱ka̱ tsu ta̱ dem agadu a ɗa bawu a ka namgba, n a ɗa aꞌa̱ri sarara kpam a ka kporo wa. Kashila̱ ka̱ ta̱ n agadu a ɗe a zuba, kpam wa a̱sa̱ka̱ ko i te i sawa a ɗa wa. I wushuku baci n Kashila̱, agadu a nala yi a ɗe a ɗa, kpam adama a ucira u ne, wa ka̱nku ɗa̱ ta̱ ili i cingi kotsu i sawa ɗa̱ wa, hal she u wenike iwauwi a aꞌayin a makorishi. Gba̱ ama a ka reve ta̱ n ukuna u iwauwi i nala yi.
Ili i nala yi mayun ɗa, yanyi maza̱nga̱ adama a ili yi. Shegai gogo‑na ya pana ta̱ ikyamba icun kau‑kau a ukondo aꞌayin kenu. Upana u ikyamba vi wa tuwa̱ ta̱ tsa̱ra̱ u wenike upityanangu u ɗe u mayun u ɗa. Upityanangu u ɗe wa̱ ta̱ n kalen cika, u la ta̱ zinariya kalen. Akina a tsu zuwa ta̱ zinariya u woko sarara, shegai gba̱ n nala u tsu namgba ta̱. Aꞌayin a ɗa baci a ka wenike Yesu Kawauwi a asu u ama, ya tsa̱ra̱ ta̱ icikpali, n tsupige, n karinga̱ adama a ukuna u mayun u upityanangu u ɗe. Ya ciga ta̱ Kawauwi ko an bawu kotsu i wene yi. Ko an u wokoi bawu ya wene yi gogo‑na, i wushuku ta̱ n eyi. Kpam ko gogo‑na ya pana ta̱ kayanyan n i yanyi maza̱nga̱ ma gba̱m bawu ya fuɗa ya dana. Adama a ɗa i wushuki n eyi, ya tsa̱ra̱ ta̱ kune ku iwauwi i uma u ɗe.
10 Ntsumate n yan ta̱ kadyanshi ka tyoku ɗa Kashila̱ ka wenike ukuna u shinga u ne ara ɗe. A vece ta̱ ben tsa̱ra̱ a reve ureve u iwauwi iꞌya wa na̱ka̱ ɗa̱. 11 Kulu ku Kawauwi ka̱ ta̱ a asuvu a le, kpam ku yan ta̱ kadyanshi ka upana u ikyamba u Kawauwi n tsupige tsa tsa tuwa̱ ara ne aꞌayin a ɗa baci u panai ikyamba yi. Ntsumate ma̱ri ma ciga ta̱ n reve ko nwere ɗa, ko kpam niɗa ukuna u na wa gita̱. 12 Kashila̱ ka wenike le ta̱ ili iꞌya a ka yan kadyanshi a kaci ka ili iꞌya ya gita̱, shegai a aꞌayin a le a ɗa ya gita̱ wa. Ukuna u mayun u ɗa a danai vi adama a ɗe a ɗa. Gogo‑na Kashila̱ ka suku ta̱ Kulu Keri tsa̱ra̱ ku ɓa̱nga̱ ama an a yanka ɗa̱ Kadyanshi ka Shinga ka kuɓari. Ko atsumate a zuba a ciga ta̱ dem a reve ikuna i na yi.
U ka̱na̱ ta̱ vuma rongo uwulukpi
13 Adama a ili i na yi gba̱, yawunsai mai i rotsongusu tyoku ɗa ya ka̱na̱ kaci ka ɗe. Yawunsai tyoku ɗa Kashila̱ ka wenike ukuna u shinga u ne ara ɗe aꞌayin a ɗa baci Kawauwi ka gonoi. Aꞌayin a ɗa baci ya yawunsa a ikuna i na yi, ya tsa̱ra̱ ta̱ uzuwa u uma. 14 Na̱ka̱i Kashila̱ karinga̱, kpaci eɗa̱ mmuku n ne ɗa. Kotsu i gono i kpatala i yain ili iꞌya bawu i gain tyoku ɗa i yansai a uma u cau u ɗe wa. A aꞌayin a nala yi, iꞌa̱ri i reve ili iꞌya i gain i yain wa. 15 Kashila̱ ka ɗanga̱sa ɗa̱ ta̱ i woko mmuku n ne. U ka̱na̱ ta̱ i woko uwulukpi a ili iꞌya dem ya yan, tyoku ɗa Kashila̱ ka̱ri uwulukpi. 16 Kpaci Kashila̱ ka dana ta̱ n kaci ka ne, “U ka̱na̱ ta̱ i woko uwulukpi, kpaci mpa ma̱ ta̱ uwulukpi.” Aɗkp. 11:44-45; Aɗkp. 19:2; Aɗkp. 20:7.
17 Ciɓai i tsu yan ta̱ kavasu a asu u Tata ɗa wa̱ri a zuba. Aya uza u afada, kpam u tsu wenike ukuna u shinga a asu u vuma te kapala n uza roku wa. Wa yanka ɗa̱ ta̱ afada a una̱ u ili iꞌya i yain. U ka̱na̱ ta̱ i na̱ka̱ Kashila̱ karinga̱ aꞌayin a ɗa ya yan tsumoci pini naha a likimba. 18 I reve ta̱ gai Kashila̱ ka tsupa ta̱ ili i pige tsa̱ra̱ u wauwa ɗa̱ a uma u cingi u ɗe, an u wokoi isheku i ɗe i yansai dem nala. Kpam ili iꞌya u tsupukai vi tyoku u zinariya ko azurufa ɗa iꞌa̱ri wa, kpaci zinariya ko azurufa u tsu ɓa̱ra̱kpa̱ wa. 19 U tsupuka ɗa̱ ta̱ na̱ mpasa n Yesu Kawauwi n ɗa ma̱ri n kalen cika. Aya Maku ma Kondom ma Kashila̱† uza ɗa bawu u nusukai ko uza, kpam wa̱ n ashinda̱ wa, ko kenu. 20 Kashila̱ ka ɗanga̱sa yi ta̱ adama a ukuna u nala vi caupa kahu a yain likimba, kpam a aꞌayin a makorishi a na yi Kashila̱ ka suku yi ta̱ a likimba tsa̱ra̱ ya dem wene. Kashila̱ ka yan ta̱ ukuna u nala vi gba̱ adama a ɗe. 21 Gogo‑na i wushuku ta̱ n Kashila̱ adama a Kawauwi. Kpam adama a ɗa Kashila̱ ka ꞌya̱nga̱sa̱ yi a ukpa̱ u na̱ka̱ yi kpam tsupige, ya wushuku ta̱ kpam i zuwa uma a asu u Kashila̱.
22 Gogo‑na u gan ta̱ i cigi atoku a ɗe n uciga u mayun, tyoku ɗa aza ɗa aꞌa̱ri ilimaci i te a tsu cigamgbana. A wulukpe ɗa̱ ta̱ an i wushuki n Kadyanshi ka Shinga, ukuna u maci u ɗa. Adama a nala, i cigamgbana cika, n ucira u atakasuvu a ɗe. 23 Kashila̱ ka zuwa ta̱ a doku a matsa ɗa̱ ilimaci i savu. Uma u savu u ɗe a asu u isheku i ɗe u ɗa u wuta̱i wa, kpaci uma u ɗa ele a na̱ka̱ ɗa̱, wa kotso ta̱ a ukpa̱. Shegai uma u savu u na wa rongo ta̱ pini bawu makorishi, kpaci u wuta̱ ta̱ a asuvu a kadyanshi ka uma u Kashila̱, uma u nala vi kpam u ɗa wa kotso wa. 24 Matsumate ma korongu ta̱:
“Ama gba̱ aꞌa̱ ta̱ tyoku u mete ma ma tsu laza ma kuwa̱;
tsulobo tsu le kpam tsu laza tsu kotso
tyoku u tsulobo tsu apa̱lu a kakamba.
Mete mi ma ekpe,
aku apa̱lu a rukpa̱ a iyamba.
25 Shegai kadyanshi ka Magono ma Zuba ka kotso wa.” Isha. 40:6-8.
Kadyanshi ka Magono ma Zuba ka nala ki, ka gai Kadyanshi ka Shinga ka tsa tonuko ɗa̱ na vi.

1:16 Aɗkp. 11:44-45; Aɗkp. 19:2; Aɗkp. 20:7.

1:25 Isha. 40:6-8.