១៥
មនុស្សដែលព្រះសព្វព្រះហឫទ័យ
ទំនុកនៃស្តេចដាវីឌ។
១ ឱព្រះយេហូវ៉ាអើយ តើអ្នកណានឹងនៅក្នុង
រោងឧបោសថរបស់ទ្រង់
តើអ្នកណានឹងនៅលើភ្នំបរិសុទ្ធនៃទ្រង់បាន
២ គឺជាអ្នកណាដែលដើរដោយទៀងត្រង់
ហើយប្រព្រឹត្តសេចក្តីសុចរិត
ព្រមទាំងពោលសេចក្តីពិតពីក្នុងចិត្តផង
៣ ជាអ្នកដែលមិនពោលបង្កាច់ដោយអណ្តាត
ឬធ្វើអាក្រក់ដល់មិត្រសំឡាញ់
ឬយករឿងបកកេរ្តិ៍ពីអ្នកជិតខាងខ្លួនឡើយ
៤ ជាអ្នកដែលមានភ្នែកមើលមនុស្សពាល
ដោយសេចក្តីស្អប់ខ្ពើម
តែលើកមុខអស់អ្នកដែលកោតខ្លាចដល់ព្រះយេហូវ៉ាវិញ
ជាអ្នកដែលហ៊ានទាំងស្បថដល់បង់ប្រយោជន៍ខ្លួនផង
ឥតប្រែប្រួលឡើយ ៥ ជាអ្នកដែលមិនបញ្ចេញប្រាក់ខ្លួន ដើម្បីយកការសោះ
ក៏មិនទទួលសំណូក ទាស់នឹងមនុស្សឥតមានទោស
អ្នកណាដែលប្រព្រឹត្តយ៉ាងដូច្នេះ
អ្នកនោះនឹងមិនត្រូវរង្គើឡើយ។