៨៩
ខ្ញុំនឹងប្រកាសអំពីព្រះហឫទ័យស្មោះស្ម័គ្ររបស់ព្រះអង្គ
សេចក្តីបង្រៀនរបស់អេថាន ជាពួកអេសរ៉ាគីត។
១ ទូលបង្គំនឹងច្រៀងពីព្រះគុណនៃព្រះយេហូវ៉ា
ជាដរាប
មាត់ទូលបង្គំនឹងសំដែងឲ្យស្គាល់សេចក្តីស្មោះត្រង់
របស់ទ្រង់ រហូតដល់អស់ទាំងដំណតទៅ
២ ដ្បិតទូលបង្គំបានពោលហើយ ថា
ព្រះគុណនឹងបានតាំងឡើង ឲ្យនៅអស់កល្បជានិច្ច
ទ្រង់ក៏នឹងតាំងសេចក្តីស្មោះត្រង់របស់ទ្រង់
នៅលើស្ថានសួគ៌ផង។
៣ ៙ អញបានតាំងសញ្ញានឹងអ្នកដែលអញបានរើសតាំង
អញបានស្បថនឹងដាវីឌជាអ្នកបំរើអញថា
៤ អញនឹងតាំងពូជពង្សឯង ឲ្យនៅអស់កល្បជានិច្ច
ក៏នឹងតម្កល់រាជ្យឯង ឲ្យនៅគ្រប់ទាំងដំណតទៅ។ បង្អង់
៥ ៙ ឱព្រះយេហូវ៉ាអើយ ផ្ទៃមេឃនឹងសរសើរការអស្ចារ្យ
របស់ទ្រង់
ព្រមទាំងសេចក្តីស្មោះត្រង់ទ្រង់ផង
នៅក្នុងជំនុំនៃអស់អ្នកបរិសុទ្ធ
៦ ដ្បិតតើមានអ្នកណានៅលើមេឃ
ដែលផ្ទឹមនឹងព្រះយេហូវ៉ាបាន
ក្នុងអស់ពួកខ្លាំងពូកែ តើមានអ្នកណាឲ្យដូចព្រះយេហូវ៉ា
៧ ជាព្រះដែលគួរស្ញែងខ្លាចណាស់
នៅក្នុងទីប្រជុំនៃអស់អ្នកបរិសុទ្ធ
ក៏គួរកោតខ្លាច លើសជាងអស់អ្នកនៅជុំវិញទ្រង់ផង
៨ ឱព្រះយេហូវ៉ា ជាព្រះនៃពួកពលបរិវារអើយ
តើមានអ្នកណាខ្លាំងពូកែដូចជាទ្រង់
ឱព្រះយេហូវ៉ាអើយ សេចក្តីស្មោះត្រង់របស់ទ្រង់
ក៏នៅព័ទ្ធជុំវិញទ្រង់
៩ ទ្រង់បង្ក្រាបការលើកកំពស់នៃសមុទ្រ
កាលណារលកកំរើកឡើង
នោះទ្រង់បន្ទ្រោមចុះ ឲ្យស្ងប់វិញ
១០ ទ្រង់បានកំទេចកំទីពួករ៉ាហាប
ដូចជាមនុស្សដែលគេវាយសំឡាប់
ទ្រង់បានកំចាត់កំចាយពួកខ្មាំងសត្រូវទៅ
ដោយព្រះពាហុដ៏មានឫទ្ធិ
១១ ផ្ទៃមេឃជារបស់ផងទ្រង់ ព្រមទាំងផែនដីផង
ឯលោកីយ៍ និងសព្វសារពើ ដែលនៅក្នុងលោកីយ៍
នោះគឺទ្រង់បានសង់ឡើងដែរ
១២ ទ្រង់បានបង្កើតទិសខាងជើង និងទិសខាងត្បូង
ឯភ្នំតាបោរ និងភ្នំហ៊ើម៉ូន
នោះក៏បានរីករាយចំពោះព្រះនាមទ្រង់
១៣ ទ្រង់មានព្រះពាហុខ្លាំងពូកែ ព្រះហស្តទ្រង់មានឫទ្ធិខ្លាំង
ព្រះហស្តស្តាំទ្រង់ក៏ខ្ពស់ណាស់
១៤ សេចក្តីសុចរិត និងសេចក្តីយុត្តិធម៌
ជាជើងថ្កល់នៃបល្ល័ង្កទ្រង់
សេចក្តីសប្បុរស និងសេចក្តីពិតត្រង់ ដើរនាំមុខទ្រង់
១៥ មានពរហើយ សាសន៍ណាដែលស្គាល់សំឡេង
រីករាយនោះ
ឱព្រះយេហូវ៉ាអើយ គេដើរនៅក្នុងពន្លឺនៃព្រះភក្ត្រទ្រង់
១៦ គេមានចិត្តរីករាយ ដោយព្រះនាមទ្រង់ជាដរាបរាល់ថ្ងៃ
ហើយគេបានដំកើងឡើង
ដោយសេចក្តីសុចរិតរបស់ទ្រង់
១៧ ដ្បិតទ្រង់ជាសិរីល្អនៃកំឡាំងគេ
ហើយទ្រង់នឹងលើកអំណាចយើងខ្ញុំឡើងដោយព្រះគុណ
១៨ ដ្បិតព្រះយេហូវ៉ាទ្រង់ជាខែលរបស់យើងខ្ញុំ
ហើយព្រះដ៏បរិសុទ្ធនៃសាសន៍អ៊ីស្រាអែល
ទ្រង់ជាមហាក្សត្រនៃយើងខ្ញុំ។
១៩ ៙ គ្រានោះ ទ្រង់មានព្រះបន្ទូលដល់អ្នកបរិសុទ្ធទ្រង់
ដោយការជាក់ស្តែងថា
អញបានបន្ថែមសេចក្តីជំនួយដល់អ្នក១ដែលខ្លាំងពូកែ
អញបានរើសយកអ្នកមួយចេញពីរាស្ត្រតាំងឡើងហើយ
២០ គឺអញបានរកឃើញដាវីឌ ជាអ្នកបំរើអញ
ក៏បានចាក់ប្រេងតាំងឡើង ដោយប្រេងបរិសុទ្ធរបស់អញ
២១ ដៃអញនឹងទប់ទល់ ឯដើមដៃអញ នឹងចំរើនកំឡាំងឲ្យ
២២ ពួកខ្មាំងសត្រូវនឹងមិនដែលទារអាករ
ហើយពួកមនុស្សអាក្រក់ក៏មិនដែលសង្កត់សង្កិនឡើយ
២៣ អញនឹងវាយពួកតតាំងនឹងដាវីឌ ឲ្យដួលនៅចំពោះមុខ
ហើយនឹងវាយអស់អ្នកដែលស្អប់ផងដែរ
២៤ សេចក្តីស្មោះត្រង់ និងសេចក្តីសប្បុរសរបស់អញ
នឹងនៅជាមួយ
ហើយអំណាចរបស់ដាវីឌនឹងបានដំកើងឡើង
ដោយឈ្មោះអញ
២៥ អញនឹងតាំងឲ្យមានអំណាចនៅលើសមុទ្រ
ហើយឲ្យដៃស្តាំបានគ្រប់គ្រងលើអស់ទាំងទន្លេ
២៦ ដាវីឌនឹងអំពាវនាវដល់អញថា
ទ្រង់ជាព្រះវរបិតានៃទូលបង្គំ
គឺជាព្រះនៃទូលបង្គំ ហើយជាថ្មដាដ៏ជួយសង្គ្រោះ
ទូលបង្គំផង
២៧ ឯអញៗនឹងតាំងឡើង ឲ្យធ្វើជាកូនច្បងរបស់អញ
គឺជាមហាក្សត្រយ៉ាងខ្ពស់បំផុតនៅផែនដី
២៨ អញនឹងបំរុងទុកសេចក្តីសប្បុរសរបស់អញ
សំរាប់ដាវីឌនៅអស់កល្បជានិច្ច
ហើយសេចក្តីសញ្ញារបស់អញនឹងនៅជាប់ជាមួយ
២៩ អញនឹងធ្វើឲ្យពូជពង្សដាវីឌនៅជាប់ជាដរាប
ហើយឲ្យរាជ្យបាននៅអស់កាលដែលផ្ទៃមេឃ
មាននៅផង
៣០ បើកូនចៅរបស់ដាវីឌបោះបង់ចោលច្បាប់អញ
ឥតប្រតិបត្តិតាមបញ្ញត្តអញ
៣១ បើគេក្បត់ក្រឹត្យក្រមរបស់អញ
ឥតរក្សាសេចក្តីបង្គាប់ឡើយ
៣២ នោះអញនឹងធ្វើទោសចំពោះការរំលងរបស់គេ
ដោយដំបង
ហើយចំពោះការទុច្ចរិតរបស់គេដោយស្នាមរំពាត់។
៣៣ ៙ ប៉ុន្តែអញនឹងមិនដកសេចក្តីសប្បុរសរបស់អញចេញ
ពីដាវីឌឡើយ
ក៏មិនឲ្យសេចក្តីស្មោះត្រង់របស់អញខាតខានដែរ
៣៤ អញនឹងមិនក្បត់សេចក្តីសញ្ញារបស់អញ
ឬបំផ្លាស់បំប្រែសេចក្តីដែលបានចេញពីបបូរមាត់អញឡើយ
៣៥ អញបានស្បថម្តងហើយ ដោយនូវសេចក្តីបរិសុទ្ធ
របស់អញ ថា
អញមិនព្រមពោលកុហកដល់ដាវីឌឡើយ
៣៦ ពូជពង្សដាវីឌនឹងស្ថិតស្ថេរនៅជារៀងរាបដរាប
ហើយរាជ្យនឹងជាប់នៅចំពោះអញដូចជាព្រះអាទិត្យដែរ
៣៧ រាជ្យនោះនឹងបានតាំងនៅជាប់អស់កល្បជានិច្ច
ដូចជាព្រះចន្ទ
គឺដូចជាទីសំគាល់ស្មោះត្រង់ដែលនៅលើមេឃ។ បង្អង់
៣៨ ៙ ប៉ុន្តែទ្រង់បានបោះបង់ចោល ហើយបណ្តេញទៅ
ទ្រង់មានសេចក្តីក្រោធនឹងអ្នកដែលទ្រង់ចាក់ប្រេងតាំងឲ្យ
៣៩ ទ្រង់បានលើកចោលសេចក្តីសញ្ញានៃអ្នកបំរើទ្រង់
ក៏បានបង្អាប់មកុដ ដោយបោះចុះទៅដី
៤០ ទ្រង់បានរំលំរបងចេញ
ហើយបានបំផ្លាញទីមាំមួនអស់រលីង
៤១ អស់អ្នកដែលដើរតាមផ្លូវក៏ប្លន់
អ្នកបំរើទ្រង់បានត្រឡប់ជាទីត្មះតិះដៀល
ដល់ពួកអ្នកជិតខាង
៤២ ទ្រង់បានលើកដៃស្តាំនៃពួកតតាំងឡើង
ក៏បានឲ្យពួកខ្មាំងសត្រូវមានសេចក្តីរីករាយសាទរ
៤៣ ទ្រង់បានធ្វើឲ្យមុខដាវត្រឡប់មកវិញ
ហើយមិនបានឲ្យអ្នកបំរើទ្រង់
ឈរមាំនៅក្នុងទីចំបាំងឡើយ
៤៤ ទ្រង់បានផ្តាច់សេចក្តីរុងរឿងចេញ
ព្រមទាំងទំលាក់បល្ល័ង្កទៅដី
៤៥ ទ្រង់បានបំព្រួញវ័យក្មេងរបស់អ្នកបំរើទ្រង់ឲ្យរួញជាខ្លី
ហើយបានបង្គ្រប ដោយសេចក្តីខ្មាសផង។ –បង្អង់
៤៦ ៙ ឱព្រះយេហូវ៉ាអើយ តើដល់កាលណាទៅ
តើទ្រង់នឹងពួនអង្គទ្រង់នៅជានិច្ចឬ
សេចក្តីក្រោធរបស់ទ្រង់នឹងឆួលឆេះដូចជាភ្លើង
ដល់កាលណាទៀត
៤៧ ឱសូមទ្រង់នឹកចាំពីអាយុទូលបង្គំ ដែលខ្លីម៉្លេះនេះ
ហើយពីជីវិតនៃអស់ទាំងមនុស្សជាតិ
ដែលឥតប្រយោជន៍ជាយ៉ាងណា
៤៨ តើមានមនុស្សឯណា ដែលនឹងរស់នៅឥតឃើញ
សេចក្តីស្លាប់ឡើយ
ឬដែលដោះព្រលឹងខ្លួន ឲ្យរួចពីអំណាចនៃស្ថាន
ឃុំព្រលឹងមនុស្សស្លាប់ទៅបាន។ –បង្អង់
៤៩ ៙ ឱព្រះអម្ចាស់អើយ អស់ទាំងសេចក្តីសប្បុរស
ដែលទ្រង់ប្រោសកាលពីដើម
ជាសេចក្តីដែលទ្រង់បានស្បថដល់ដាវីឌ
ដោយសេចក្តីស្មោះត្រង់របស់ទ្រង់នោះ
ឥឡូវនេះតើនៅឯណា
៥០ ឱព្រះអម្ចាស់អើយ សូមទ្រង់នឹកចាំពីសេចក្តីដែល
គេត្មះតិះដៀលដល់ពួកអ្នកបំរើទ្រង់
ហើយពីទូលបង្គំទ្រាំរងសេចក្តីដំនៀលរបស់បណ្តាជន
ទាំងឡាយនៅក្នុងទ្រូងផង
៥១ ឱព្រះយេហូវ៉ាអើយ
ពួកខ្មាំងបានយកសេចក្តីដំនៀលនោះឯង
មកត្មះតិះដៀលដល់ទូលបង្គំដែរ
គឺគេបានត្មះតិះដៀលដល់អស់ទាំងជំហាននៃអ្នក
ដែលទ្រង់បានចាក់ប្រេងតាំងឲ្យ។
៥២ ៙ សូមឲ្យព្រះយេហូវ៉ាបានប្រកបដោយព្រះពរ
នៅអស់កល្បជានិច្ច អាម៉ែន ហើយអាម៉ែន។