១០៣
ខ្ញុំសូមសរសើរដំកើងព្រះនាមដ៏វិសុទ្ធរបស់ព្រះអង្គអស់ពីដួងចិត្ត!
ទំនុកនៃស្តេចដាវីឌ។
១ ឱព្រលឹងអញអើយ
ចូរសរសើរដល់ព្រះយេហូវ៉ា
ហើយគ្រប់ទាំងអស់ដែលរួមនៅក្នុងខ្លួនអញ
ចូរសរសើរដល់ព្រះនាមបរិសុទ្ធនៃទ្រង់ដែរ
២ ព្រលឹងអញអើយ ចូរសរសើរដល់ព្រះយេហូវ៉ាចុះ
ហើយកុំឲ្យភ្លេចបណ្តាព្រះគុណណាមួយរបស់ទ្រង់ឡើយ
៣ ដែលទ្រង់អត់ទោសចំពោះអស់ទាំងការទុច្ចរិតរបស់ឯង
ទ្រង់ប្រោសជំងឺទាំងប៉ុន្មានរបស់ឯងឲ្យជា
៤ ក៏ជួយជីវិតឯងឲ្យរួចពីរណ្តៅ
ហើយយកសេចក្តីសប្បុរស និងសេចក្តីមេត្តាករុណា
បំពាក់ជាមកុដឲ្យឯងវិញ
៥ ព្រមទាំងប្រោសប្រទានឲ្យសំបកកាយនៃឯង
បានស្កប់ស្កល់ដោយរបស់ល្អ
ប្រយោជន៍ឲ្យវ័យក្មេងឯង បានកែឡើងជាថ្មី ដូចជាឥន្ទ្រី
៦ ព្រះយេហូវ៉ាទ្រង់សំរេចកិច្ចការដ៏សុចរិត
ហើយនឹងសេចក្តីយុត្តិធម៌
ចំពោះអស់អ្នកណាដែលត្រូវគេសង្កត់សង្កិន
៧ ទ្រង់បានសំដែងឲ្យម៉ូសេស្គាល់អស់ទាំងផ្លូវរបស់ទ្រង់
ហើយឲ្យពួកកូនចៅអ៊ីស្រាអែលស្គាល់អស់ទាំងកិច្ចការ
របស់ទ្រង់ដែរ
៨ ព្រះយេហូវ៉ាទ្រង់មានសេចក្តីមេត្តាករុណា
ហើយនឹងអាណិតអាសូរ
ទ្រង់យឺតនឹងខ្ញាល់ ហើយមានសេចក្តីសប្បុរសដ៏បរិបូរ
៩ ទ្រង់នឹងមិនបន្ទោសជាដរាប
ក៏មិនប្រកាន់ជារៀងរាបតទៅដែរ
១០ ទ្រង់មិនបានប្រព្រឹត្តនឹងយើង
តាមអំពើបាបរបស់យើងទេ
ក៏មិនបានសងតាមអំពើទុច្ចរិតរបស់យើងដែរ
១១ ដ្បិតដែលផ្ទៃមេឃខ្ពស់ជាងផែនដីច្រើនប៉ុណ្ណា
សេចក្តីសប្បុរសរបស់ទ្រង់ក៏ធំច្រើនប៉ុណ្ណោះ
ចំពោះអស់អ្នកដែលកោតខ្លាចដល់ទ្រង់
១២ ឯទិសខាងកើតនៅឆ្ងាយពីទិសខាងលិចយ៉ាងណា
ទ្រង់បានដកយកអស់ទាំងការល្មើសនៃយើង
ឲ្យឃ្លាតឆ្ងាយពីយើងយ៉ាងនោះដែរ
១៣ ព្រះយេហូវ៉ាទ្រង់មានព្រះហឫទ័យអាណិតដល់អស់អ្នក
ដែលកោតខ្លាចទ្រង់
ដូចជាឪពុកមានចិត្តអាសូរដល់កូនរបស់ខ្លួនដែរ
១៤ ដ្បិតទ្រង់ស្គាល់រាងកាយរបស់យើង
ក៏នឹកចាំថា យើងគ្រាន់តែជាធូលីដីប៉ុណ្ណោះ
១៥ ចំណែកឯមនុស្ស ថ្ងៃអាយុរបស់គេធៀបដូចជាស្មៅ
គេរីកឡើងដូចជាផ្កានៅទីវាល
១៦ ដ្បិតកាលណាខ្យល់បក់មកត្រូវ នោះក៏សូន្យបាត់ទៅ
ហើយកន្លែងនោះមិនស្គាល់វាទៀត
១៧ តែសេចក្តីសប្បុរសនៃព្រះយេហូវ៉ាស្ថិតស្ថេរនៅ
តាំងពីអស់កល្បដរាបដល់អស់កល្បជានិច្ច
ចំពោះអស់អ្នកដែលកោតខ្លាចដល់ទ្រង់
សេចក្តីសុចរិតរបស់ទ្រង់ ក៏នៅរហូតដល់កូនចៅគេតទៅ
១៨ គឺដល់អស់អ្នកដែលកាន់តាមសេចក្តីសញ្ញាទ្រង់
និងពួកអ្នកដែលនឹកចាំពីអស់ទាំងសេចក្តីបញ្ញត្តទ្រង់
ដើម្បីនឹងប្រព្រឹត្តតាម
១៩ ព្រះយេហូវ៉ាទ្រង់បានតាំងបល្ល័ង្កទ្រង់នៅលើស្ថានសួគ៌
ហើយរាជ្យទ្រង់ក៏គ្រប់គ្រងលើទាំងអស់
២០ ចូរសរសើរដល់ព្រះយេហូវ៉ា អស់ពួកទេវតា
របស់ទ្រង់អើយ ជាអ្នកដែលមានឥទ្ធិឫទ្ធិខ្លាំង
ហើយក៏ប្រតិបត្តិតាមបង្គាប់ទ្រង់
ដោយស្តាប់តាមព្រះសូរសៀងនៃព្រះបន្ទូលទ្រង់
២១ ចូរសរសើរដល់ព្រះយេហូវ៉ា អស់ពួកពលបរិវារ
របស់ទ្រង់អើយ
ជាពួកអ្នកបំរើទ្រង់ដែលធ្វើតាមព្រះហឫទ័យ
២២ អស់ទាំងស្នាដៃរបស់ទ្រង់អើយ
ចូរសរសើរដល់ព្រះយេហូវ៉ា
នៅគ្រប់ទីកន្លែងទ្រង់មានអំណាច
ព្រលឹងអញអើយ ចូរសរសើរដល់ព្រះយេហូវ៉ាចុះ។