១៤៣
សូមកុំប្រកាន់ទោសទូលបង្គំឡើយ
ទំនុកនៃស្តេចដាវីឌ។
១ ឱព្រះយេហូវ៉ាអើយ សូមស្តាប់ពាក្យ
អធិស្ឋានរបស់ទូលបង្គំ
សូមផ្ទៀងព្រះកាណ៌ស្តាប់សេចក្តីទូលអង្វររបស់ទូលបង្គំ
សូមឆ្លើយតបមកទូលបង្គំផង
ដោយសេចក្តីស្មោះត្រង់ និងសេចក្តីសុចរិតរបស់ទ្រង់
២ សូមកុំឲ្យកើតក្តីនឹងអ្នកបំរើទ្រង់ឡើយ
ដ្បិតនៅព្រះនេត្រទ្រង់គ្មានមនុស្សរស់ណាមួយ
ដែលសុចរិតទេ
៣ ដ្បិតខ្មាំងសត្រូវបានបៀតបៀនព្រលឹងនៃទូលបង្គំ
គេបានវាយជីវិតទូលបង្គំចុះដល់ដីហើយ
ក៏ធ្វើឲ្យទូលបង្គំអាស្រ័យនៅក្នុងទីងងឹត
ដូចជាពួកអ្នកដែលបានស្លាប់ជាយូរមកហើយ
៤ ហេតុនោះបានជាវិញ្ញាណនៅក្នុងខ្លួន
ទូលបង្គំត្រូវអន់ថយទៅ
ហើយចិត្តនៅក្នុងទូលបង្គំ ក៏នៅតែលតោល
៥ ទូលបង្គំនឹកចាំពីអស់ទាំងថ្ងៃដែលកន្លងទៅហើយ
ក៏រំពឹងគិតពីអស់ទាំងកិច្ចការរបស់ទ្រង់
ហើយនឹងជញ្ជឹងពីអស់ទាំងស្នាដៃនៃព្រះហស្តទ្រង់ដែរ
៦ ទូលបង្គំលើកដៃប្រណម្យដល់ទ្រង់
ព្រលឹងទូលបង្គំស្រេករកទ្រង់ ដូចជាដីហួត
ហែងស្រេករកទឹក។ –បង្អង់
៧ ៙ ឱព្រះយេហូវ៉ាអើយ សូមប្រញាប់នឹងឆ្លើយមកទូលបង្គំ
ដ្បិតវិញ្ញាណទូលបង្គំអន់ថយហើយ
សូមកុំលាក់ព្រះភក្ត្រនឹងទូលបង្គំឡើយ
ក្រែងទូលបង្គំនឹងត្រឡប់ដូចជាពួកអ្នក
ដែលចុះទៅក្នុងរណ្តៅ
៨ សូមឲ្យទូលបង្គំបានឮសេចក្តីសប្បុរសរបស់ទ្រង់
នៅពេលព្រឹក ដ្បិតទូលបង្គំទុកចិត្តនឹងទ្រង់
សូមឲ្យទូលបង្គំបានស្គាល់ផ្លូវដែលគួរដើរ
ពីព្រោះទូលបង្គំបានលើកព្រលឹងទៅរកទ្រង់
៩ ឱព្រះយេហូវ៉ាអើយ សូមប្រោសទូលបង្គំ
ឲ្យរួចពីពួកខ្មាំងសត្រូវ
ទូលបង្គំរត់មកពឹងជ្រកនៅទ្រង់
១០ សូមបង្ហាត់បង្រៀនឲ្យទូលបង្គំបានប្រព្រឹត្តតាម
ព្រះហឫទ័យទ្រង់ ដ្បិតទ្រង់ជាព្រះនៃទូលបង្គំពិត
សូមឲ្យព្រះវិញ្ញាណដ៏ល្អរបស់ទ្រង់ នាំទូលបង្គំចូលទៅ
ក្នុងស្រុក ដែលប្រកបដោយសេចក្តីទៀងត្រង់
១១ ឱព្រះយេហូវ៉ាអើយ សូមចំរើនកំឡាំងដល់ទូលបង្គំ
ដោយយល់ដល់ព្រះនាមទ្រង់
សូមនាំព្រលឹងទូលបង្គំចេញពីសេចក្តីវេទនា
ដោយសេចក្តីសុចរិតរបស់ទ្រង់
១២ ហើយសូមកាត់ពួកខ្មាំងសត្រូវទូលបង្គំចេញ
ដោយសេចក្តីសប្បុរសរបស់ទ្រង់
ព្រមទាំងបំផ្លាញអស់អ្នកដែលសង្កត់សង្កិន
ព្រលឹងទូលបង្គំផង
ដ្បិតទូលបង្គំជាអ្នកបំរើទ្រង់ហើយ។