1  2  3 

4 Kanan Yahweh ay Diyos ko, “Waday laydek ay amagem ay kaman pangarig. En ka manpastol si sinkabeweg ay karnero ay nakeddengan ay mapalti. 5 Pinalpaltin di nanlaklako en daida ngem adi da madosa. Kanan din nangilaklako en daida, ‘Madaydayaw si Diyos tan nay binmaknangak.’ Olay din nangipaspastol en daida et adi da naseg-angan en daida.

6 “Tan enggay adiak seg-angan din ipogaw sin ili ay sana. Sak-en ay mismo di mangipolang en daida sin panakabalin di turay ya ari da. Dadaelen din tuturay ay nay din ili et maga di isalakan ko,” kinwanin Diyos.

7 Idi siya di, linmagbo da din nanlako si kakarnero et inpastol ko din kakarnero ay natodingan ay mapalti. Nan-aak si dowa ay sokod ay nginadanak si Seg-ang ya Timpoyog et inayowanak din kakarnero. 8 Sin oneg di esay bowan, kinaan ko di tolo ay manpaspastol. Ngem enggay naabos abe di anos ko sin kakarnero yan malmaliget da abe en sak-en.*Di esa abe ay kaiologan nina sin Hebreo et: kinaan ko di tolo ay manpaspastol tan enggay naabos di anos kon daida yan malmaliget da abe en sak-en. 9 Idi siya di, kanak sin kakarnero, “Manipod ed wani, baken sak-en di mangayowan en dakayo. Mo waday matey, bay-ak ay matey. Mo waday malitaw, bay-ak ay malitaw. Din mabay-an, olay man-asiabos da.”

10 Inak din sokod ko ay manngadan si Seg-ang et ginotlok ta mangipaila ay nawaswas din intolag Diyos sin amin ay ipogaw. 11 Isonga sin isdi ay agew, naokas din tolagan. Omiila din man-ilaklako ya manlaklako si kakarnero yan ammo da ay si Diyos di nankalkali babaen sin inam-amag ko. 12 Kanak en daida, “Mo layden yo, idawat yo din lagbok, mo sigaan yo et olay maga.” Pag dan idawat di tolonpo ay palata ay say lagbok.

13 Kanan Diyos en sak-en, “Itep-am sin kad-an di man-am-amag si banga.”†Din kanana sin Syriac et: “Itep-am sin pan-idoldolinan si gameng sin Timplo.” Et intep-ak sin Timplo sin kad-an di man-am-amag si banga din sana ay kalalasoy ay kanan da en banol ko. 14 Idi makdeng di, ginotlok din maikadwa ay sokod ay makwani en Timpoyog. Say nangipaammo ay madadael di timpoyog di Juda ya Israel.

15 Pag kanan Diyos en sak-en, “Ed wani, manbalin ka si manpaspastol ay magay silbi na. 16 Tan nay mandotokak isnan ili si mangipastol sin kakarnerok, ngem baybay-ana din nalitaw. Adi na anapen din nasangaw, adi na agasan din nasogatan ya adi na pakanen din napigsa pay laeng, mo adi et isida na din kalamsan ay karnero et loksobena din kokob da. 17 Madosa din manpaspastol ay sana ay mamaybay-an sin kakarnero. Sapay koma ta madoyok din kannawan ay mata na si kampilan ta maboldingan ya mabetbet abe din takkay na ta makingking.”