Uţup uŧeek wi Pawulu apiiŧuŋ
banfiyaaruŋ banfëţuŋ du uŧaak wi
Teŧalonika
Uţup ujuni
Ulibra wi uwooŋ kakaarta kaŧeek ki Pawulu apiiŧuŋ pnŧuk pi banfiyaaruŋ panwooŋ du ubeeka wi Teŧalonika. Pawulu abi ya da aţup Uţup Ulil Unuura wi Yeŧu Kriŧtu (natenan ţi Ulibra wi Ulemp wi Banjañan 17.1-10). Bañaaŋ banfëţuŋ da baţaş Kriŧtu. Wi ŋwal ŋloŋ ŋaţëpuŋ, kë bañaaŋ baloŋ başë wuuk bañaaŋ kë balaţ Pawulu na nanohul. Anaţara baka. Banfiyaaruŋ Kriŧtu bamen Pawulu na bangakandëruŋ na a. Na uŧejan kë başë pënan baka ţi ubeeka kë baya Bereya. Wi ŋşubal ŋtëb ŋaţëpuŋ, Pawulu ayil Timote aya aten jibi banfiyaaruŋ Kriŧtu banwooŋ Teŧalonika baduki awo. Wi ayaaŋ abi, aţup Pawulu aji bamëban te hënkuŋ, kë baloŋ ţi baka başë pok plemp kado kadeena. Baji baji Yeŧu abi hënkuŋ, kë baanuma plemp. Baloŋ ţi baka ŋhaaş ŋaanţoora na baka ţiki bayiţ baka na banoh baka baŧum bakeţi kë Yeŧu aambi. Uko mënţ ukaaŋ kë Pawulu apiiŧ baka katëŋţën baka abot aţup jibi ubi wi Yeŧu ukluŋ kawo na jibi akdoluŋ na banfiyaaruluŋ. Hënk, bahinan kahaţ kë bawo na Ajugun unuur undoli.
Hënk di ifah yi ulibra wi iwooŋ:
1. Pwul mboş (1.2–3.13)
2. Pfiyaar pi bañaaŋ biki Teŧalonika bafiyaaruŋ (1.2–3.13)
3. Ubida unliluŋ Kriŧtu. (4.1-12)
4. Phaţ kë Kriŧtu abi (4.13–5.11)
5. Pţaŋ na pwul mboş pbaañşaani (5.12-28)
1
Nji *Pawulu, na Ŧilwanuŧ* Ŧilwanuŧ: baloŋ baji badu'a kak Ŧilaŧ., na Timote ŋkpiiŧanaŋ, an banfiyaaruŋ nanwooŋ du Teŧalonika amëban Naşibaţi Aşin nja na Yeŧu Kriŧtu Ajugun. Ŋñehan baka bawulan bnuura babot bajoobţënan ŋhaaş.
Mnwo na pfiyaar pi biki Teŧalonika
Ŋënji ŋţañna pbeeb Naşibaţi ŋwal bŧi pa an bŧi, wi ŋjaaŋ ŋleşan woli ŋñehana. Na manjoonan ŋji ŋleş ţi kadun ki Naşibaţi anwooŋ Aşin nja jibi pfiyaar pi nan pawinaniiŋ ţi udo wi nan, jibi natamanuŋ ţi bŋalad na jibi namëbanuŋ aliinŧan ţi mnhaţ mi nahaţuŋ Yeŧu *Kriŧtu Ajugun.
An bayiţun biki Naşibaţi aŋaluŋ, ŋme kë nadatanaa. Na manjoonan, wi ŋbiiŋ du an adiimanan Uţup Ulil Unuura, ŋëndiimanan wa na mntum ţañ, name wa kak na mnhina mi udo wi Uhaaş wi Naşibaţi. Ŋwin nja bŧi kë uţup mënţ ujoonani. An name jibi ŋwoori ţi pŧoofan pa bnuura bi nan. Kë an, nakak awo ţi pdo ji un, na ji Ajugun. An nandooŋ awo wo ţi unoor uweek, nayeenk uţup wi Naşibaţi na mnlilan mi Uhaaş wi nul ujaaŋ uwul. Kë hënk di di nakakuŋ awo bankdiimanuŋ banfiyaaruŋ biki ŋŧaak ŋi Maŧedoniya na Akayi bŧi, bgah bi pţaş. Du an na manjoonan di di uţup wi Ajugun upënnuŋ, uŧiinkana du Maŧedoniya na Akayi. Mënţ dul da ţañ, baţup ţi dko bŧi jibi nafiyaari Naşibaţi, kë ŋëndo ka uko uţup. Hënk di uwooŋ, bukal ţi ŋleef ŋi baka baţup jibi namëbanuŋ un wi ŋbiiŋ du an, jibi nayaaŋ du Naşibaţi aduk ŋnŧoŋ alempar Naşibaţi anwooŋ najeb, anwooŋ Naşibaţi na manjoonan, 10 kayoonkna ubi wi Abukul Yeŧu ankluŋ kawoona baţi, i anaţanuŋ ţi pkeţ, ankbuuranuŋ nja ţi udeeb unkmbiiŋ.

*1:1 Ŧilwanuŧ: baloŋ baji badu'a kak Ŧilaŧ.