Uţup utëbanţën wi Pawulu apiiŧuŋ banfiyaaruŋ
banfëţuŋ du uŧaak wi
Korinŧ
Uţup ujuni
Ulibra wi uwo kakaarta katëbanţën ki Pawulu apiiŧuŋ banfiyaaruŋ biki Korinŧ. Ţi kakaarta ki nul kaŧeek aţup baka aji aŋal pya kawin baka. Abi ji na baka kak bajunt, bajunt mënţ baţënkna banfiyaaruŋ biki Yeruŧalem, kë ul ţi uleeful akyaaŋ kayeenk bajunt mënţ. Kë aşë bi wo aanya da. Hënk di di awooŋ aanya da : Timote awo ţi bgah pya Korinŧ, aşë me ţi bgah iko yi banfiyaaruŋ biki da bakdoli. Kë uko mënţ uunlila. Aŧiink kë bayuday baloŋ baya Korinŧ ajukan da iko impaţi na Uţup Ulil Unuura wi Pawulu abiiŋ ajukan da. Baji baji na baka kë Pawulu aanwo nanjañan i Kriŧtu na manjoonan. Wi wi Timote aşaaŋ aţiiş aşë ţup Pawulu, kë ajooţan maakan. Uko mënţ ukaaŋ kë apiiŧ baka kaţup uko wi aşaluŋ na uko unkayi kë aanya du baka.
Pawulu aţup ţi kakaarta ki kë awo nanjañan i Kriŧtu aşë paţ jibi aklempi na bandukiiŋ bajaaŋ bajukan bgah. Uko mënţ ukaaŋ kë başoora. Pawulu akak aţëga aji aŋal ul na biki Korinŧ bawo ţi ploolan. Aji na baka bataman ţi bajunt baţënkna banfiyaaruŋ biki Yeruŧalem. Akak aţup aji aŋal kaya kawin baka kahilna kaţup bañaaŋ banwooŋ baanwut pjuban manjoonan. Woli Pawulu amëban aliinŧ aji awo nanjañan aŋal ŋal bañaaŋ bame Uţup Ulil Unuura bakuţ bame kë Yeŧu awooŋ Ajugun.
Hënk di ifah yi ulibra wi iwooŋ:
1. Pawulu awul baka mboş akuţ abeeb Naşibaţi (1.1-11)
2. Ulemp wi nanjañan du banfiyaaruŋ (1.12–2.17)
3. Pŋal ñaaŋ jibi Kriŧtu aŋaluŋ nja (3.1–7.16)
4. Pţen bajuuk (8.1–9.15)
5. Pawulu aţup aji awo nanjañan na manjoonan (10.1–13.10)
6. Pwul mboş pbaañşaani (13.11-13)
1
1 Nji Pawulu, i Naşibaţi aduuŋ pa nwo nanjañan i Yeŧu *Kriŧtu, ţiki aŋaluŋ wa, na Timote ayiţ nja, ŋpiiŧanaŋ an banfiyaaruŋ Kriŧtu biki ubeeka wi Korinŧ na bañaaŋ biki Naşibaţi bŧi banwooŋ ţi uŧaak wi Akayi* Akayi : Korinŧ dawo ţi uŧaak wi Akayi, dawooŋ ubeeka unwoonuŋ uweek da. bŧi. 2 Ŋñehan Naşibaţi Aşin nja na Yeŧu Kriŧtu Ajugun bawulan bnuura babot bajoobţënan ŋhaaş.
Pawulu abeeb Naşibaţi
3 Nawulën ŋbeeb Naşibaţi, Aşin Yeŧu *Kriŧtu Ajugun ţi uko wi añagiiŋ nja abot atëŋţën nja. 4 Aji tëŋţën nja wal wi ŋjaaŋ ŋwo ţi unoor undoli, kadolna nja ŋhil ŋdo katëŋţën bañaaŋ banwooŋ ţi unoor undoli na ptëŋţën pi Naşibaţi atëŋţënuŋ nja. 5 Na manjoonan, Kriŧtu akaaŋ kë ŋkhaj maakan, kë hënk di di akaaŋ aji tëŋţën nja maakan. 6 Woli ŋwo ţi unoor, uwo wo pa ptëŋţënan kabot kaţijan mbuur ; woli Naşibaţi atëŋţënun, uwo pa ptëŋţënan nahilna namiir mnhaj mi ŋhajuŋ. 7 Uhaţ wi ŋţuuŋ ţi an udëmi ; ŋme kë jibi nahajuŋ ji un, hënk kak di di Naşibaţi aktëŋţënanaŋ ji un.
8 An bayiţun, ŋŋal name kë mnhaj mi ŋhajuŋ du uŧaak wi Aŧiya manţëp uţup† Mnhaj mi ŋhajuŋ du uŧaak wi Aŧiya : Ñaaŋ aamme mnhaj mi akţiiniyaanuŋ ţi. Manka pwo mnhaj mandëmuŋ mi aţiiniyaanuŋ ţi ulibra wi Ulemp wi Banjañan 19.23-40., kë ŋhaajala maakan adoo şal aji wi nun ubaa. 9 Na manjoonan ŋbi ji ji pkeţ pi nun pabani, ukaaŋ kë ŋënkak ahaţ ŋleef ŋi nun, ahaţ ţi Naşibaţi anjaaŋ anaţan bañaaŋ ţi pkeţ. 10 Ul abuuranuŋ un pkeţ mënţ, akak aluŋ kabuuranun. Aa, ŋţu mnhaţ mi nun ţi a, ame kë aluŋ kabuuranun kak. 11 An naţok ţi ulemp mënţ wi najaaŋ nañehandërun ; hënk, Naşibaţi aŧiink pñehan pi bañaaŋ baŧum, kawulun bnuura, uko mënţ ukaaŋ kë bañaaŋ baŧum baji babeeba.
Uko unkaaŋ kë Pawulu alutan bayaaş bi nul du Korinŧ
12 Hënkuŋ, uko wi uwooŋ mnlilan mi nun, uhaaş wi nun udiimanuŋ un kë mnwo mi nun ţi umundu wi na ţi kadun ki nan manwo mnwo mnŧool akuţ ajinţ ţi kadun ki Naşibaţi. Uko mënţ uwoona du Naşibaţi, mënţ uşal unŧuŋa wi bañaaŋ bajën ubiiŋ aţoŋun, bnuura bi nul babiiŋ aţoŋun. 13 Na manjoonan, ţi ikaarta yi ŋpiiŧanaŋ, ŋëmpiiŧan nin uko uloŋ umpaţi na wi nahiluŋ kaleyiir kakuţ kate, kë nşë me kë unuur uloŋ naluŋ kate. 14 Uka uko uloŋ wi nadooŋ abi yikrën : ţi unuur wi Ajugun Yeŧu akbiiŋ, ŋwo mnlilan mi nan nakuţ nawo mnlilan mi nun.
15-16 Dfiyaar uko mënţ, ukaaŋ kë mbi ŋal kaţëpna duna du an, kabaa kaya Maŧedoniya di nji kawoonuŋ kakak du an, kaşë kayeenk uko wi nji kanumiiŋ pyaana bayaaş du *Yuda, hënk nahilna nanuurandën uyaaş utëbanţën. 17 Wi njakuŋ aji ddo haŋ, dbeŋ beŋ i? Woli dji ddo uko, dji kawo na uşal wi ñaaŋ najën anwooŋ aanji ţijan ţi uţup uloolan i? 18 Na manjoonan, ţi katim ki Naşibaţi, uţup wi nun na an uunwo wi « aa » na « a-a. » 19 Uko wi Yeŧu *Kriŧtu Abuk Naşibaţi, wi nji na Ŧilaŧ na Timote ŋţupanaŋ, uunwo wi « aa » na « a-a » ubaa ţëp ţëp awo wi « aa » ţañ. 20 Yeŧu Kriŧtu awooŋ « aa » mënţ, iko bŧi yi Naşibaţi ahoŋuŋ idolana ţi a. Kë ţi ul i i ŋkţëpnuŋ kaji uwo haŋ, kadëmanaana. 21 Naşibaţi ajaaŋ atëŋţënun na an, ŋliinŧ ţi pfiyaar Kriŧtu. Ul ţi uleeful adatuŋ nja, 22 adiiman kë ŋwo biki nul wi aţuuŋ uhaaş wi nul ţi nja, wul uwooŋ uko ujuni ţi iko yi ahoŋuŋ aji aluŋ kawul nja.
23 Uko wi nji kaţupuŋ uwo manjoonan, Naşibaţi amee ; woli dţilani afiŋën : mënŋal ŋal pnooranan, ukaaŋ kë mënkak du Korinŧ. 24 Ŋënŋal pwo başih bankţu'anaŋ uko wi nawooŋ i pfiyaar ; namëban aliinŧ ţi pfiyaar pi nan kë ŋşë ŋal kaţënkan nawo na mnlilan.