Uţup utëbanţën wi Pawulu apiiŧuŋ
banfiyaaruŋ banfëţuŋ du uŧaak wi
Teŧalonika
Uţup ujuni
Ulibra wi uwooŋ kakaarta katëbanţën ki Pawulu apiiŧuŋ pnŧuk pi banfiyaaruŋ panwooŋ du Teŧalonika. Akak aţup baka kak ubi wi Kriŧtu na jibi banwooŋ baanfiyaara bakbaañşaanuŋ. Baloŋ ţi ubeeka mënţ baji Kriŧtu adobi bi bi, kë baloŋ baji kë uundobi wo, kë unuur uşë ñog. Banjakuŋ aji unuur uñogi baankak adi plemp, baji baannuma plemp wi Kriŧtu akbiiŋ hënkuŋ. Kë başë ji baya kade du banjaaŋ balemp. Uko mënţ ukaaŋ kë Pawulu apiiŧ baka kadiimanaan baka kë ñaaŋ aji wo kadeena ujënk wi nul. Akak aji na baka bamëban baliinŧ woli bawo ţi mnhaj babot bado kado bnuura wal undoli.
Hënk di ifah yi ulibra wi iwooŋ:
1. Pwul mboş (1.1-2)
2. Ubi wi Kriŧtu ukakan iko bŧi ţi bgah (1.3-12)
3. Ajugun Yeŧu Kriŧtu aandobi kak (2.1-12)
4. Pmëban kaliinŧ ţi pfiyaar (2.13-17)
4. Pñehan Naşibaţi na Ulemp (3.1-15)
5. Pwul mboş pbaañşaani (3.16-18)
1
Nji *Pawulu, na Ŧilwanuŧ* Ŧilwanuŧ: Baloŋ baji badu'a kak Ŧiluŧ., na Timote ŋkpiiŧanaŋ, an banfiyaaruŋ nanwooŋ du Teŧalonika amëban Naşibaţi Aşin nja na Yeŧu *Kriŧtu Ajugun. Ŋñehan Naşibaţi Aşin nja na Yeŧu Kriŧtu Ajugun bawulan bnuura babot baţooranan ŋhaaş.
An bayiţun ţi Kriŧtu, ŋwo i kado kabeeb Naşibaţi ŋwal bŧi ţi uko wi nan. Uŧaaŋ na ŋdo haŋ, ţiki pfiyaar pi nan padëma dëm pya kë an bŧi nabot aŋaladaara ŋalad maakan. Uko mënţ uţu kë ŋji ŋţup uko wi nan ţi kadun ki banfiyaaruŋ Naşibaţi bŧi na mnlilan. Ŋji ŋdo haŋ ţiki baji bahajanan kë an naşë mëbanaara mëban aliinŧan ţi pfiyaar pi nan aji namiir ţi unoor bŧi. Uko mënţ bŧi uyuuj kë pwayëş pi Naşibaţi pawo pŧool : uwoo nahilna nawo bañaaŋ banŧaaŋuŋ na pneej du pşih pi Naşibaţi pi nakhajaruŋ hënk. Kë jibi Naşibaţi ajaaŋ ado uko uŧool, aţu bankhajananaŋ mnhaj ; an nankhajuŋ hënkuŋ, naluŋ kanoorfën na un. Uko mënţ udolana wal wi Yeŧu Ajugun akwinaniiŋ kapënna baţi na ŋwanjuŧ ŋi nul ŋanwooŋ na mnhina, kawo ţi bdoo bweek. Abi pweţan banwooŋ baamme Naşibaţi abot awo baanji baţaş Uţup Ulil Unuura wi Yeŧu Ajugun. Bakoba kakob kanwooŋ kaankba, kalow kaara di Ajugun, kalow mndëm na mnhina mi nul. 10 Wal wi akbiiŋ, ţi unuur mënţ, bañaaŋ banwooŋ biki nul bŧi Bañaaŋ banwooŋ biki nul : Baloŋ baji baţiiniyaan ŋwanjuŧ. badëmana, banfiyaaruluŋ bŧi bamaţa. An nawo ţi bukuŋ mënţan ţiki nafiyaar uko wi ŋţupanaŋ ţi a.
11 Uko mënţ ukaaŋ kë ŋji ŋñehandëran Naşibaţi ŋnuur bŧi, nahilna nawo bañaaŋ banŧaaŋuŋ na mnwo mi adu'anaŋ. Ŋji ŋñehan ado na mnhina mi nul naŧum na uşal wi pdo bnuura abot ado pfiyaar pi nan pawinana ţi udo wi nan. 12 Hënk, nadëman Yeŧu Ajugun, abot adëmanan. Uko mënţ ukyuujuŋ kë nayeenk bnuura bi Naşibaţi na bi Yeŧu Kriŧtu Ajugun.

*1:1 Ŧilwanuŧ: Baloŋ baji badu'a kak Ŧiluŧ.

1:10 Bañaaŋ banwooŋ biki nul : Baloŋ baji baţiiniyaan ŋwanjuŧ.