Uţup Ulil Unuura
wi Maci apiiŧuŋ
Uţup ujuni
Ulibra wi uwo Uţup Ulil Unuura wi Maci apiiŧuŋ. Maci awooŋ nakobraar daaşa i Yeŧu abiiŋ adu adola kë akak naţaşarul. Maci awo aloŋ ţi banjañan biki Yeŧu ajakuŋ aji baya bado kaţup Uţup Ulil Unuura babot baţooran pnŧuk pi banfiyaaruŋ du dko di bakyahaŋ. Maci aţup ţi ulibra wi jibi Yeŧu abukiiŋ, na uko wi adoluŋ ţi umundu wi na uko wi ajukanuŋ bañaaŋ, na pkeţ pi nul na pnaţa ţi pkeţ pi nul. Yeŧu aţup na bañaaŋ na mntëŋ, ajeban bamaakal, adook ŋnŧaayi, ado iko iŧum maakan iñoŋarënaan ţi kadun ki bañaaŋ. Maci aţup Uţup Ulil Unuura wi pa bayiţul bayuday kadiimanaan baka kë na manjoonan Yeŧu awooŋ nabuuran bañaaŋ i baţupar Naşibaţi baŧaruŋ aţiiniyaan ţi Ulibra wi Naşibaţi, kë iko yi baţupuŋ ţi a bŧi ji abi ado kabi, idolanaa. Ul awooŋ naşih ambiiŋ awo i kabi. Uko mënţ ukaaŋ kë bañaaŋ babi bawut katimul adola « Abuk Dayiţ », ţiki Dayiţ abiiŋ awo naşih naweek i bañaaŋ biki Iŧrayel, banwooŋ bañaaŋ biki Naşibaţi. Kë wi Yeŧu adooŋ adiiman bañaaŋ biki Iŧrayel uko wi Pşih pi Naşibaţi, baweek biki baka badooŋ apok pok Yeŧu. Wi Yeŧu akeţuŋ, badook baţaşarul aneenan baka bakak baneej du dko dñehanaani di baka. Bukal kë başë wayşër ţi umundu aţup bañaaŋ bŧi Uţup Ulil Unuura.
Hënk di ifah yi ulibra wi iwooŋ:
1. Pntaali pi Yeŧu na kabuka ki nul (1.1–2.23)
2. Yowan Nabatŧaar aţup uko unkluŋ kabi (3.1-12)
3. Batiŧmu bi Yeŧu na jibi Ŧatana akdooŋ na pguura ajuban (3.13–4.11)
4. Yeŧu aţup uko unkluŋ kabi, ajeban bamaakal, ado mlagre du Galilay (4.12–18.35)
5. Yeŧu apënna Galilay pya Yeruŧalem (19.1–20.34)
6. Kanëm kabaañşaani ki Yeŧu ţi umundu wi, pwayëş pi bawayşuluŋ na pkeţul (21.1–27.66)
7. Yeŧu anaţa ţi pkeţ (28.1-20)
1
Pntaali pi Yeŧu
1 Pntaali pi Yeŧu Kriŧtu, anwooŋ abab *Dayiţ naşih abot awo abab *Abraham pii pi : 2 Abraham abuk Iŧaak, Iŧaak abuk Yakob, Yakob abuk Yuda na babuk aşin* Yuda na babuk aşin : Biinţ iñeen na batëb biki bawo baweek biki kntaali ki Iŧrayel.. 3 Yud abuk Pereŧ na Ŧera. Tamar✡ Natenan ţi Ujuni 38.27-30. awooŋ anin baka, Pereŧ abukuŋ Heŧron, Heŧron abuk Ram. 4 Ram abuk Aminadab, Aminadab abuk Naaŧon, Naaŧon abuk Ŧalmon. 5 Ŧalmon abuk Booŧ. Anin Booŧ awo Rahab✡ Natenan ţi Yoŧuwa 2.. Booŧ abuk Obed. Anin Obed awo Rut✡ Natenan ţi Rut.. Obed abuk Yeŧe ; 6 Yeŧe abuk Dayiţ naşih.
Dayiţ abuk Ŧalomoŋ, anin Ŧalomoŋ abiiŋ awo ahar Uriye✡ Natenan ţi 2 Ŧamiyel 12.. 7 Ŧalomoŋ abuk Roboham, Roboham abuk Abiya, Abiya abuk Aŧaf. 8 Aŧaf abuk Yoŧafat, Yoŧafat abuk Yoram† Yoŧafat abuk Yoram : Na manjoonan Yoŧafat awo ateem aşin Yoram., Yoram abuk Oŧiyaŧ ; 9 Oŧiyaŧ abuk Yohaŧam, Yohaŧam abuk Akaŧ, Akaŧ abuk Heŧekiyaŧ ; 10 Heŧekiyaŧ abuk Manaŧe, Manaŧe abuk Amon, Amon abuk Yoŧiyaŧ ; 11 Yoŧiyaŧ abuk Yekoniya na babuk aşin ţi wal wi bamobuŋ bañaaŋ biki *Iŧrayel añooţ uŧaak wi Babilon.
12 Wi bamobuŋ bañaaŋ biki Iŧrayel ayaanaan Babilon, Yekoniya abuk Ŧalaŧiyel, Ŧalaŧiyel abuk Ŧorobabel. 13 Ŧorobabel abuk Abiyud, Abiyud abuk Eliyakim, Eliyakim abuk Aŧor. 14 Aŧor abuk Ŧadok, Ŧadok abuk Akim. Akim abuk Eliyud, 15 Eliyud abuk Eleyaŧar, Eleyaŧar abuk Mathan, Mathan abuk Yakob‡ Kajunna ţi Ŧorobabel te Yakob, Maci alut iwuuŋ iŧum.. 16 Yakob abuk Yoŧef, ayin *Mariya, ambukuŋ Yeŧu i bajaaŋ badu Kriŧtu.
17 Iwuuŋ injunuŋ du Abraham te Dayiţ iwo iñeen na ibaakër ; injunuŋ du Dayiţ te wal wi bamobuŋ bayuday ayaanaan Babilon, iwo iwuuŋ iñeen na ibaakër, injunnuŋ du wi bamobnuŋ baka ayaanaan Babilon te ubuka Kriŧtu, iwo iwuuŋ iñeen na ibaakër.
Kabuka ki Yeŧu
(Luk 2.1-7)
18 Yeŧu abuka hënk : Mariya anin ajokar na Yoŧef. Kë, wi bawooŋ baandobi niimar, kë Uhaaş wi Naşibaţi uşë do kë Mariya awo na kayiŋ. 19 Yoŧef anjokuluŋ, anwooŋ ñiinţ naŧool abot awo aanŋal ppeeţa ţi kadun ki bañaaŋ, aji ţi uşalul agar baniw na a bë aankţup bañaaŋ. 20 Jibi awooŋ na uşal waŋ, kë uwanjuŧ wi Ajugun uloŋ uşë pën awinana ţi ŋţaafi aji na a : « Yoŧef, abuk Dayiţ, kkali pyeenk Mariya du katohu, awo aharu. Uhaaş wi Naşibaţi ukaaŋ kë awo na kayiŋ. 21 Aluŋ kabuk napoţ ñiinţ, i ikţuuŋ katim ki Yeŧu§ Yeŧu : dawooŋ: « Ajugun abuuran. », ţiki ul akluŋ kabuuran pntaali pi nul ţi ipekadu yi pa. »
22 Iko mënţ bŧi iyuuj kë uko wi Ajugun abiiŋ aţup aţëpna ţi *naţuparul idolanaa, aji : 23 « Ñaaţ anwooŋ aamme ñiinţ aluŋ kawo na kayiŋ, kabuk napoţ ñiinţ, baluŋ kaţu'a katim ki Emanuwel »✡ Iŧayi 7.14. uwooŋ: « Naşibaţi awo ţi pŧoofun. »
24 Wi Yoŧef atenuŋ, ado jibi uwanjuŧ ujakuluŋ: ajej Mariya kë awo aharul 25 aşë wo aanwinar na a kë adoo buk napoţ ñiinţ i aţuuŋ katim ki Yeŧu.
*1:2 Yuda na babuk aşin : Biinţ iñeen na batëb biki bawo baweek biki kntaali ki Iŧrayel.
✡1:3 Natenan ţi Ujuni 38.27-30.
✡1:5 Natenan ţi Yoŧuwa 2.
✡1:5 Natenan ţi Rut.
✡1:6 Natenan ţi 2 Ŧamiyel 12.
†1:8 Yoŧafat abuk Yoram : Na manjoonan Yoŧafat awo ateem aşin Yoram.
‡1:15 Kajunna ţi Ŧorobabel te Yakob, Maci alut iwuuŋ iŧum.
§1:21 Yeŧu : dawooŋ: « Ajugun abuuran. »
✡1:23 Iŧayi 7.14.