Pweng Wo Ke Jesus Christ Ma Simla Sel
LUKE
Tukakinyen Book In LUKE
Book se inge, Pweng Wo Ke Jesus Christ Ma Simla Sel Luke, akkalemye lah Jesus el Mwet Lango nu sin mwet Israel oana ke orekla wulela kac, oayapa lah el Mwet Lango nu sin mwet nukewa. Simla in Luke lah Jesus el tuh pangonyuk sin Ngun lun Leum God in “fahkak pweng wo nu sin mwet sukasrup,” ouinge book se inge fahkak yohk ke kasru lun Jesus nu sin mwet su muta in kutena kain in enenu. Mwe engan uh srumunyuk yohk in book se inge — yokiya uh oasr ke mutaweyen book uh su fahk ke isusla lun Jesus, sifilpa ke saflaiya uh ke Jesus el sowak nu inkusrao.
Sramsram ke yokyokelik ac fahsrelik lun moul in lulalfongi lun mwet uh ke Christ, ma sikyak tukun Jesus el sowak nu lucng, simla pacna sin mwet se ma simusla book se inge uh, pa kalem ke book in Orekma.
Oasr kutu sramsram akkalemyeyuk in book se inge mukena — oana ke on lun lipufan, ac som lun mwet shepherd nu yen Jesus el isusla we, oayapa ke pacl se ma Jesus el tulik na som nu in Tempul, wi pac pupulyuk ke mwet Samaria sac, ac wen se ma tuhlac ah. (Liye ip akluo ac akonkosr ke Takla lun Koanon Book se inge.) In book se inge yohk na ma fwackyak ke pre, ke Ngun Mutal, ke ip kunen mutan nu sin Jesus ke el oru orekma lal, ac ke nunak munas lun God ke ma koluk.
Takla Lun Koanon Book Se Inge
Tukakinyen book uh 1:1–4
Isusla ac matuak lal John Baptais ac Jesus 1:5—2:52
Fahkak lal John Baptais 3:1–20
Baptais ac srifeyuk lun Jesus 3:21—4:13
Luti lun Jesus in acn Galilee 4:14—9:50
Som Galilee lac nu Jerusalem 9:51—19:27
Wik safla in Jerusalem ac acn apkuran nu we 19:28—23:56
Sifil moulyak lun Leum, sikyak lal nu sin mwet, ac sowak lal nu lucng 24:1–53
1
Tukakinyen Book Uh
Nu sum, Theophilus, su fal in akfulatyeyuk:
Pus mwet ma arulana oaru in orani ac simusla ma su sikyak inmasrlosr. Elos simusla ma su fwackme nu sesr sin mwet ma sifacna liye ma inge ac sulkakinelik ke tufahna mutawauk me. Ke ma inge, leum fulat luk, ke sripen nga liksreni na lohang in lutlut ke ma inge ke mutawauk me, nga sifacna nunku mu ac wona ngan takunla nu sum ma sikyak uh. Nga oru ma inge kom in mau etu na pwaye ke ma nukewa ma lutiyuk kom kac.
Fwackyak Isusla Lal John Baptais
In pacl se ma Herod el tuh tokosra in acn Judea, tuh oasr mwet tol se pangpang Zechariah, su ma in u lal Abijah, mwet tol. Mutan kial ah pa Elizabeth, su ma in fwilin tulik natul Aaron, mwet tol. Eltal kewa moulkin moul na suwohs ye mutun God, ac arulana oaru in akos ma sap ac oakwuk nukewa lun Leum God. Wangin tulik natultal, mweyen Elizabeth el tia ku in orek tulik, ac el ac Zechariah tukenina matuoh.
Sie len ah Zechariah el oru orekma in tol lal ke sun pacl lun u lal in kulansap in Tempul. In oana oakwuk nu sin mwet tol uh, srisrngiyuki ke fa mu ac ma kunal in akosak mwe keng fin loang uh. Ouinge el utyak nu in Tempul lun Leum God, 10 ac mwet puspis elos pre likinum uh ke ao in kisa mwe keng uh. 11 Sie lipufan lun Leum God sikyang nu sel, ac tu layen layot ke loang uh, yen mwe keng uh akokyak we. 12 Ke Zechariah el liyalak el arulana lut ac sangengla. 13 Na lipufan sac fahk nu sel, “Zechariah, nimet sangeng. God El lohng pre lom. Elizabeth, mutan kiom, el ac fah oswela sie wen nutum. Kom ac fah sang inel John. 14 Kom ac fah arulana engan, ac mwet puspis ac fah wi pac engan ke el ac isusla. 15 El ac fah sie mwet saok ye mutun Leum God. El ac fah tia nim wain, ku kutena mwe nim ku. El ac fah sesseslana ke Ngun Mutal, mutawauk ke el isusla me, 16 ac el ac fah forokla mwet puspis sin mwet Israel nu sin Leum God lalos. 17 El ac fah fahsr meet liki Leum God, ke ngunin ku lal Elijah, mwet palu. El ac fah akwoyela inmasrlon papa ac tulik uh; el ac fah oru tuh mwet seakos in sifil nunak oana mwet suwoswos; el ac fah oru tuh mwet lun Leum God in akola nu sel.”
18 Na Zechariah el fahk nu sin lipufan sac, “Nga ac etu fuka lah ac ouingan? Nga matuoh, ac mutan kiuk uh matuoh pac.”
19 Na lipufan sac fahk, “Nga pa Gabriel. Nga tu ye mutun God, su supweyume in tuh kaskas nu sum, ac fahkot pweng wo se inge nu sum. 20 Tusruktu kom tia lulalfongi kas luk, su ac fah akpwayeiyuk in pacl fal. Ke sripen selulalfongi lom, kom ac fah tia ku in sramsram. Kom ac mutana tia kaskas nwe ke na akpwayeiyuk ma nga fahk nu sum inge.”
21 In pacl se inge, mwet uh mutana soanel Zechariah, ac suk lah efu ku el utyak arulana pahtlac in Tempul. 22 Ke el oatula, el tia ku in kaskas nu selos, ouinge elos akilen mu el liye sie aruruma in Tempul. Ke el tia ku in kaskas nu selos, el orekmakin na paol ac srisrsrisr nu selos.
23 Ke safla pacl in kulansap lal Zechariah in Tempul uh, el folokla nu lohm sel ah. 24 Tia paht toko, Elizabeth, mutan kial, el pitutuyak ac tiana illa liki lohm sel ke malem limekosr. 25 Ac el fahk, “Inge nga etu tuh Leum God El kasreyu. El eisla mwekin luk likiyu ye mutun mwet uh.”
Fwackyak Isusla Lun Jesus
26 Ke Elizabeth el pitutu malem onkosr, God El supwalla lipufan Gabriel nu in siti srisrik se in acn Galilee pangpang Nazareth. 27 Oasr sap soko el us nu sin sie mutan fusr virgin, su ako in payuk nu sin mukul se pangpang Joseph, su ma in fwilin tulik natul Tokosra David. Inen mutan fusr sac pa Mary. 28 Lipufan sac tuku nu yorol ac fahk, “Paing kom! Leum God El wi kom, ac El arulana akinsewowoye kom!”
29 Mary el arulana fohsak ke kas lun lipufan sac, ac el suk na lah mea kalmen ma el fahk uh. 30 Na lipufan sac fahk nu sel, “Mary, nikmet sangeng, tuh kom ohi yurin God. 31 Kom ac fah pitutuyak ac oswela sie wen, ac kom fah sang inel Jesus. 32 El ac fah arulana fulat — ac fah pangpang el Wen nutin God Fulatlana. Leum God El ac fah oru tuh elan sie tokosra oana David, papa matu tumal, 33 ac el ac fah leum fin fwilin tulik natul Jacob nwe tok. Tokosrai lal ac fah wangin saflaiya!”
34 Na Mary el fahk nu sin lipufan sac, “Ma inge ac sikyak fuka, ke nga soenna etu mwet?”
35 Ac lipufan sac topuk ac fahk, “Ngun Mutal ac fah tuku nu fom, ac ku lun God ac fah oan fom. Ke sripa se inge, wen mutal se inge ac fah pangpang Wen nutin God. 36 Esamul Elizabeth, sie nina in sou lom an. Tuh fwack mu el tia ku in isus, a inge el pitutu malem onkosr lac, el finne arulana matuoh. 37 Mweyen wangin ma God El kofla in oru.”
38 Na Mary el fahk, “Nga mwet kulansap lun Leum God. Lela ma inge in orek nu sik oana ke kom fahk.” Na lipufan sac som lukel.
Mary El Som Nu Yorol Elizabeth
39 Tiana paht tukun ma inge, Mary el akola ac sulaklak na som nu in sie siti srisrik inmasrlon eol in acn Judea. 40 El utyak nu in lohm sel Zechariah ac paingul Elizabeth. 41 Ke pacl se Elizabeth el lohng kusen paing lal Mary, tulik se insial ah mokuikui, ac Elizabeth el sesseslana ke Ngun Mutal, 42 ac fahk nu sel Mary ke pusra lulap, “Kom pa insewowo emeet sin mutan nukewa uh, ac insewowo tulik se su kom ac oswela an! 43 Efu ku ouiya na yohk se inge in sikyak nu sik, tuh nina kien Leum luk in tuku nu yuruk? 44 Ke pacl se na nga lohngak ke kom paingyu ah, tulik se insiuk inge srosro ke engan. 45 Fuka lupan insewowo lom ke kom lulalfongi lah kas lun Leum God nu sum ac fah akpwayeyuk!”
On In Kaksak Lal Mary
46 Mary el fahk,
“Insiuk kaksakin Leum God;
47 Ngunik engan ke sripen God, Mwet Lango luk,
48 Tuh El esamyu, mutan kulansap pusisel lal!
Ingela mwet in fwil nukewa ac fah pangonyu insewowo,
49 Ke sripen orekma yohk su God Kulana El oru nu sik.
Inel mutallana;
50 Liki fwil nu ke fwil
El akkalemye pakoten lal nu selos su sunakunul.
51 El asroela po kulana lal,
Ac kunauselik pwapa lun mwet inse fulat.
52 El akpusiselye tokosra kulana liki tron lalos,
Ac El akfulatye mwet pusisel.
53 El akkihpye mwet masrinsral ke ma wo,
Ac supwalik mwet kasrup uh pisinpo.
54 El sruokyana wulela lal nu sin mwet matu lasr,
Ac tuku in kasru Israel, mwet kulansap lal.
55 El esam in akkalemye pakoten lal nu sel Abraham
Ac fwilin tulik nukewa natul nwe tok!”
56 Mary el muta yorol Elizabeth malem tolu, na el folokla nu yen sel.
Isusla Lal John Baptais
57 Sun pacl lal Elizabeth in isusla, ac el oswela sie wen. 58 Mwet tulan lal ac sou lal lohngak lah Leum God El arulana akinsewowoyal, ac elos welul engan.
59 Ke tulik sac el sun len oalkosr matwal, elos tuku in tuh kosreyukla el, ac elos akoo in sang inel Zechariah, in folokin inen papa tumal ah. 60 Tusruktu nina kial ah fahk mu, “Mo! Inel pa John.”
61 Ac elos fahk nu sel, “Wangin sou lom ma us ine sacn!” 62 Na elos kaskas srisrsrisr nu sin papa tumal ac siyuk sel lah ac su inen tulik sac.
63 Zechariah el siyuk sie ma elan sim kac, ac el simusla mu, “Inel pa John.” Elos nukewa arulana lut. 64 In pacl sacna Zechariah el sifilpa ku in kaskas, ac el mutawauk in kaksakin God. 65 Mwet tulan lalos nukewa arulana sangeng, ac pungen ma inge fahsrelik nu infulan eol nukewa in acn Judea. 66 Mwet nukewa su lohng ke ma inge elos nunku kac ac siyuk, “Tulik se inge fin kapak el ac mau mwet fuka se?” Mweyen kalem na lah ku lun God oan facl.
Fahkak Lal Zechariah
67 Zechariah, papa tumal John, el sessesla ke Ngun Mutal, ac el fahkak kas inge sin God me:
68 “Lela kut in kaksakin Leum God lun Israel!
El tuku tari in kasru mwet lal ac aksukosokyalosla.
69 El ase nu sesr sie Mwet Lango kulana,
Sie sin fwilin tulik natul David, mwet kulansap lal.
70 El nuna wulela sin mwet palu mutal lal oemeet mu
71 El ac molikutla liki mwet lokoalok lasr,
Liki ku lalos nukewa su kwase kut.
72 El tuh fahk mu El ac akkalemye pakoten lal nu sin mwet matu lasr somla,
Ac esam pac wulela mutal lal.
73 Ke sie wulela oa su El orala nu sel Abraham, papa matu tumasr,
El wuleang in
74 Tulekutla liki inpoun mwet lokoalok lasr,
Tuh kut in kulansupwal ac tia sangeng,
75 Ac tuh kut in mutal ac suwoswos ye mutal
Ke lusenna moul lasr.
 
76 “Wen nutik, ac fah pangpang kom mwet palu lun God Fulatlana.
Kom ac fah fahsr meet liki Leum
In akoela inkanek lal,
77 In fahkak nu sin mwet lal lah elos ac fah moliyukla
Mweyen El ac nunak munas nu selos ke ma koluk lalos.
78 God lasr El pakoten ac mongfisrasr.
El ac fah oru tuh kalmen molela lal in takak ac srekuti,
79 Ac in tololosyak nukewa su muta in lohsr ac ngunin misa,
In kol niasr nu ke inkanek lun misla.”
80 Tulik sac kapak ac kui in manol ac in ngunal. El muta yen mwesis nwe ke pacl se el sikyang nu sin mwet Israel.