NEHEMIAH
Tukakinyen Book In NEHEMIAH
Book in Nehemiah ku in kitakatelik nu ke ip akosr: (1) Folok lal Nehe­miah nu Jerusalem, acn ma supweyuk el nu we sin tokosra fulat lun Persia in tuh karingin Judah. (2) Sifilpa musaiyuk pot Jerusalem. (3) Ezra el riti Ma Sap lun God nu sin mwet uh, ac elos fahkak orekma koluk lalos. (4) Kutu pac orekma lal Nehemiah ke el governor lun Judah.
Sie mwe asmak yohk ke book se inge pa ke lulalfongi yohk lal Nehemiah ke God, ac pre fusus lal nu sin God.
Takla Lun Koanon Book Se Inge
Nehemiah el folok nu Jerusalem 1:1—2:20
Pot Jerusalem sifil musaiyuk 3:1—7:73
Ma Sap ritiyuk, ac wuleang aksasuyeyuk 8:1—10:39
Kutu pac orekma lal Nehemiah 11:1—13:31
1
Pa inge takinyen orekma yohk su Nehemiah, wen natul Hacaliah, el orala.
Nunak Lal Nehemiah Ke Jerusalem
Ke malem in Kislev in yac aklongoul ma Artaxerxes el tokosra fulat lun Persia, nga, Nehemiah, muta Susa, siti fulat lun acn Persia. Hanani, sie sin tamulel luk, el wi u se tuku Judah me, ac nga siyuk selos ke acn Jerusalem ac ke mwet Jew wiasr su folokla liki sruoh in acn Babylonia. Elos fahk nu sik lah mwet su painmoulla ac folokla muta yen selos ah, arulana upa moul lalos, ac mwetsac su muta apkuran nu yorolos elos aklusrongtenyalos. Na elos fahk pac nu sik lah pot Jerusalem srakna musalla oan, oayapa mutunpot uh soenna orekla tukun pacl se firiryak ah. Ke nga lohng ma inge nukewa, nga putati ac tung.
Nga asor ke len na pus, ac nga tiana mongo. Nga pre nu sin God ac fahk, “LEUM GOD lun Kusrao! Kom fulat, ac kut arulana sangeng sum. Kom oaru na in karingin wuleang lom nu selos su lungse kom ac oru ma kom sapkin. Ngetma liyeyu, LEUM GOD, ac porongo pre luk, ke nga siyuk len ac fong ke mwet kulansap lom, mwet Israel. Nga fahkak lah kut, mwet Israel, orekma koluk. Nga ac mwet matu luk orekma koluk. Kut arulana aktoasrye kom, ac tia oru ma kom sapkin. Kut tia liyaung ma sap lom ma kom sang nu sel Moses mwet kulansap lom elan ase nu sesr. Inge, esam ke kom fahk nu sel Moses, ‘Kowos mwet Israel fin tia pwaye nu sik, nga ac akfahsryekowoselik inmasrlon mutunfacl ngia. Tusruktu kowos fin foloko nu yuruk ac oru ma nga sapkin nu suwos, nga ac folokinkowosme nu yen nga sulela tuh mwet uh in alu nu sik we, kowos finne fahsrelik nu yen saflaiyen faclu.’
10 “O Leum, mwet inge elos mwet kulansap lom ac mwet lom sifacna. Kom molelosla ke ku yoklana lom. 11 Lipsre mwe siyuk luk inge, oayapa pre lun mwet kulansap lom nukewa ngia su kena akfulatye kom. Ase wo ouiya nu sik misenge, ac oru tuh tokosra fulat elan pakoten nu sik.”
In len ingo, nga tuh mwet okwok wain lun tokosra fulat.