RUTH
Tukakinyen Book In RUTH
Sramsram se kacl Ruth inge, su sie sramsram ke misla, sikyak ke pacl in mweun ac keok lulap ma srumunyuk ke book in Mwet Nununku ah. Ruth, sie mutan Moab, el payuk sin mukul Israel se. Ke mukul sac misa, Ruth el akkalemye nunak na pwaye lal nu sin nina talupal* Talupal: Nina ku papa tuman tulik ma payukyang nu in sie sou. ac oayapa lulalfongi yohk lal ke God lun Israel. Tok, Ruth el konauk pac mukul sasu se tumal inmasrlon sou lun mukul se tumal meet ah. Na ke sripen payuk sasu se lal inge, oru el pa nina matu se kial David, su el pa tokosra se ma pwengpeng emeet inmasrlon tokosra nukewa lun mwet Israel.
Sramsram ke book in Mwet Nununku srumun ke ongoiya lulap ma mwet Israel elos sun ke sripen elos forla liki God. Na book in Ruth akkalemye ke mwe insewowo ma tuku nu sin sie mwetsac su forla nu sin God lun Israel ac ekla sie selos su oaru nu sel.
Takla Lun Koanon Book Se Inge
Naomi el folokla nu Bethlehem ac Ruth el welul 1:1-22
Ruth el osun nu sel Boaz 2:1?3:18
Boaz el payukyak sel Ruth 4:1-22
1
Elimelech Ac Sou Lal Elos Som Nu Moab
ln pacl ma mwet nununku tuh kol fin acn Israel, oasr sie sracl lulap sikyak. Ouinge, sie mwet Beth­lehem in acn Judah, wi mutan kial ac wen luo natul, elos som nu Moab in tuh muta we kitin pacl. Inen mukul sac pa Elimelech, mutan kial pa Naomi, ac inen wen luo natul ah pa Mahlon ac Chilion. Elos mwet Ephrath, ac elos muta in acn Bethle­hem lun Judah. Na elos som nu Moab in tuh muta we. Ke elos muta we Elimelech el misa, ac Naomi ac wen luo natul ah mukena muta. Tok, eltal payukyak sin mutan Moab luo—sie pa Orpah ac sie pa Ruth. Elos muta we apkuran in yac singoul, na Mahlon ac Chilion kewa misa pac, ac Naomi el mukelana muta. Wanginla mukul tumal ac wen luo natul ah.
Naomi Ac Ruth Folokla Nu Bethlehem
Kutu pacl tok, Naomi el lohngak lah Leum God El kasru mwet in acn sel ke El akwoye fokin ima lalos ac sang mwe mongo nu selos. Na Na­omi ac mutan luo talupal ah akola in som liki acn Moab, ac mutawauk in fahsr nu Judah. Naomi el fahk nu sin mutan luo natul ah, “Wona komtal in folokla nu yurin nina kiomtal ah, ac lela tuh Leum God Elan kulang nu sumtal oana ke komtal tuh kulang nu sik ac nu sin mukul tomomtal ma misa. Lela tuh Leum God Elan kasrekomtal in ku in ko­nauk luo mukul ah tomomtal komtal in muta wo yoro.”
Na Naomi el wilkas ac ngok mutaltal. Tusruktu eltal mutawauk in tung 10 ac fahk, “Mo! Kut ac wi kom na som nu yurin mwet lom an.” 11 Na Naomi el fahk nu seltal, “Komtal enenu in folokot. Efu kom­tal ku lungse wiyu? Mea, komtal Nunku mu nga ac ku in sifil oswela tulik mukul komtal in payuk nu se? 12 Folokot nu yen sumtal an mweyen nga matuoh ac nga tia ku in sifil payuk. Nga finne nunkauk mu nga in sifil payukyak ofong ac oswela kutu wen, 13 mea, komtal ac soano na eltal in matula? Ya sripa se inge in pwanang komtal in tia payuk nu sin kutepacna mukul? Mo, acn nutik, komtal etu na lah tia ku in ouinge. Leum God El ngetla likiyu, ac nga arulana pakomutomtal.”
14 Ac eltal sifilpa mutawauk in tung. Na Orpah el ngokya mutun nina sac, ac folokla nu yen sel ah, a Ruth el sripsriplana nu sin nina sac ac tiana fahsr lukel. 15 Na Naomi el fahk nu sel, “Ruth, mutan se wiom ah pa folokla nu yurin mwet lal ac god lal. Fahla welul.”
16 Tusruktu Ruth el fahk, “Nimet kom kafwe nga in som liki kom! Lela nga in wi kom na. Tuh yen kom som nu we, nga fah som pac nu we. Yen kom ac muta we, nga ac fah muta pac we. Mwet lom fah mwet luk, ac God lom fah God luk. 17 Yen kom misa we, nga ac fah misa we, ac nga ac fah pukpuki pac we. Lela Leum God Elan arulana ase mwe keok yohk nu fuk nga fin fahsr liki kom meet liki nga misa!”
18 Ke Naomi el akilen lah Ruth el wotela na ku sel mu el ac welul ah, el tia sifilpa fahk kutena ma.
19 Eltal fahsr nwe ke na eltal sun acn Bethlehem. Ke eltal sun acn we, mwet in acn sac elos arulana lut, ac kutu sin mutan in acn sac fahk ouinge, “Ku pwayena lah Naomi pa inge?”
20 Na Naomi el fahk nu selos, “Kowos in tia sifil pangonyu Na­omi, Naomi: kalmen Naomi in kas Hebrew pa “engan.” a kowos in pangonyu Marahr Marah: kalmen Marah in kas Hebrew pa “asor,” ku “mwen.” mweyen Leum God El ase sie moul na asor nu sik. 21 Ke nga tuh som liki acn yenu ah, pukanten ma luk, tuh pa Leum God El folokinyume pisinpo. Mwe mea kowos in pangonyu Na­omi ke Leum God Kulana El akkeokyeyu ac supwama mwe ongoiya nu fuk?”
22 Ouinge Naomi el foloko liki acn Moab, ac Ruth, mutan Moab se talupal welul. Ke eltal sun acn Beth­lehem, tufahna mutawauk pacl in kosrani barley in acn we.

*^ Talupal: Nina ku papa tuman tulik ma payukyang nu in sie sou.

1:20 Naomi: kalmen Naomi in kas Hebrew pa “engan.”

1:20 Marah: kalmen Marah in kas Hebrew pa “asor,” ku “mwen.”