Jesús-nuggin-palmilegalmalad Pab Purpa Nuedbal Immalmal Imasmalad
Hechos
Imi Hechos-kartadin Lucas Pab-Purpa-Nuedbal nermas. Tenal kepegin Lucas-e-kartagin nermas Jesús iti-napkin kudigusgu igi immal imajad. Tenal Hechos-kartagin Lucas nermanonibal Pab-Jesucristo-chogzhadyob (capitulo 1:8) tule-Jesúsgin-ibzhemalad Pab-kaka-nuegan-palchogdimal, Jerusaléngin (capitulo 2-7) Provincia-Judeagin tegin Provincia-Samariagin (capitulo 8-11:18) tegin napa-pid-ugakche (capitulo 11:19-28:31.) Tenal Lucas Hechos-kartagin nermanonibal Pab Purpa Nued Pentecostés-Itogedgin aktesgu, Pedrodin Judiomalga chogzha Judiomalde Jesucristogin ibzheenabmal. Tenal Lucas nermanonibal Pab Purpa Nued tule-Jesúsgin-ibzhemaladbal immal imadi-kus, tegin Jesúsgin-kwenadganga igi immal kusbalid. Tenal Lucas Hechos-kartagin chogzhagusdo tule-Jesúsgin-ibzhemalad pul-melgu natapmal, tegin Pab Purpa Nued Judiojulmalad-imas Pab-Jesúsbal abonolegal. Tenal Lucas Hechos-kartagin pul Pedro-immal-imajadgin chunmas (capitulo 1-12,) tegin Pablo-immal-imajadgin chunmasbal (capitulo 13-28.) Imi Pablo pul-pule Judiojulmaladzhik Pabga arpadi-kus. Tenal Lucas nermasbal Pablo ilapá-pipirmadi-kus Pab-kaka-nuegan palchoggal (capitulo 13-14; capitulo 15:40-18:22; capitulo 19-20.) Tenal Lucas Pablo-oturdalemaidgin nermasbal (capitulo 21-26) tegin Pablo Romaje-nadedgin nermasbal (capitulo 27) tegin Pablo-Romagin-maidgin nermasbal (capitulo 28.) Pitomalgu.
1
Tummad-Teófilo, imi antin akpene pega pato pél nermas, Jesús megwijadgin immal imajad, tegin Jesús tulemal-oturdajadbal, Jesús Pab-negzhe nakwijadzhe. Imi Jesús Pab-negzhe-nakwijad-akar an ukin pega nermanebal kwenamaladgin immal kujad.
Imi Jesús ampayo Pab-negzhe needdu, Pab Purpa Nuedbal pela-pela e-nuggin-palmilegalmalad-uanais. Tenal Jesús-nuggin-palmilegalmalad akpene-Jesús-tar-chusmalad.
Tegin Jesús e-purkwijad-cholbal, e-chapinganga kannan-kannan nodi-kus. Tegin Jesús aga e-chapinganga nuekwa oyos, ede chunchunnad kannan tulles. Tenal Jesús kannan-tullejad-akar ni-walgwen-eg-ibaambe nanedi-kus, aga e-chapinganga impa-impagin nononida, e-chapinganga Pab-neg-takmaidgin chunmagal.
Jesús Pab-negzhe nakwejogalidgin, Pab-Purpa-Nued-nonikoedgin chunmajad
Imi teun Jesús e-nuggin-palmilegalmaladbak ampa ormabukwadgin, Jesús e-nuggin-palmilegalmaladga chogal:
—Imi an pemalga chogmaldo: pemal melle Jerusalén-akar aknigwelmalo. Tenal pemal abintamalo, Pab Tummad anpal-pemalga-kaka-ukchadyob, pemalgin Pab-Purpa-Nued-nonikoedzhe. Imi Juan Bautista chunchunnad tiginbi unnila tule-okcha, tenal pemal nue-naojulmal Pab Purpa Nuedgin oglenonimalo.
Al Jesús e-chapinganbak ormabukwadgin, e-chapingan Jesúszhe ekichialmal:
—¿Tummad, tegil we ibegin pe neg-takegal Israel-tulemal-imane?
Tegin Jesús aga e-chapinganga chogal:
—Pemal keg we immalmal wisguel, ibi-ibegin kunoniko. Tenal Pab Tummad chogzhado, ebi unnila igal-nika ede inkwa Israel-tulemal-neg-taknoniko. Tenal Pab Purpa Nued pemalgin nonikil, pemal Pab-kannaleged nikunonimalo. Tegin pemal ankin chunmadamalo, Jerusaléngin, pel-kwapa Judea-napkin, pel-kwapa Samaria-napkin, tegin nap-naid-ugakche.
Tegin Jesús aga e-chapinganga pél chunmasgu, e-chapingan ampa Jesús-takpukwadgin, Jesús nikpa nakwidzhun. Tegin Jesús mogil-impabal togdegu, e-chapingan Jesús-pal-kwen-takchajulmal.
10 Tenal Jesús-e-chapingan ampa nuu Jesús-takpukwadgin, arpak walbo tule-takalmal, e-abir pukwamal. Tenal we tulemal mol-chibu yoyomal. 11 Tenal we angelmal Jesús-e-chapinganga chogalmal:
—Galilea-tolgan, ¿ibi pe nuu nikpa takmal wedega? Imi Jesús-pemal-abalgin-kudigujaddin, imis Pab-negzhe nad. Imis pe igi nikpa-nad Jesús-takchámaldin, Jesús kujal ampa weopí kannan iti-napche nonibalo.
12 Tegin Jesús-e-chapingan Olivo-yal-nugad-akar algu, Jerusalénzhe nonimal. Tenal Olivo-yal Jerusalén-akar twagdar pannajul, unnila minuto-ambe-naneed-panku.
Jesús-e-chapingan Matías-amismalad, Judas-Iscariote-anal toggal
13 Tegin Jesús-e-chapingan Jerusalénzhe nonigu, akpene neg-nikpa-ampagusmaladgin kannan ampagunonimalbal. Tenal te neggin Jesús-e-chapingan ampagunonimalad: Pedro, Juan, Jacobo, Andrés, Felipe, Tomás, Bartolomé, Mateo, Alfeo-machi-Jacobo, Simón-Romano-tule-onobied, Jacobo-machi-Judas. 14 Tegin te neggin Jesús-e-chapingan, tegin María-Jesús-e-nan, tegin ome-pimalad, tegin Jesús-e-urpamal pel-kwapa pinzheed-ilgwenadgin pulakwa Pabzhe kolbukmal.
15 Imi teun kwenamalad-tulanerkwa-kuchale ormabukmal. Tegin Pedro kwenamalad-pukmaladga chunmakal chogal:
16 “Kwenamalad, imi akpene Pab Purpa Nued Davidbal Judas-Iscariotegin chunmas. Tenal Pab-kartagin-Judasgin-chunmalejad-yopí kued-wilub. Tenal Judas-Iscariote tulemal-iktuedga kus Jesús-kagal. 17 Tenal Judas anmal-pakadmogan, anmal-arpagedgin arpagalmogan. 18 (Imi Judas Jesús-ukchad-manigin, nap pakcha. Tegin Judas nikpa-akar sortukin nai arkwatku, sabal marid. Tenal Judas-e-samur pel-kwapa akne-akne miles. 19 Tegin tulemal-pel-kwapa-Jerusaléngin-mamimalad, Judas-nap-pakchad wisgusgu, apka-pakal we nap nug onosmal, Acéldama. Wedin e-kakagin chogle: Abe-Nap.)
20 “Tenal Judasgin pél immalmal kujad, Pab-namaked-kartagin pato nermakal maido:
Imi we tule-e-neggin tule melle ampaguelen, nabirin;
tegin we neg metmalalen, nabirbalin,
we tule-e-nug ilgwen pelgugal.
Sal. 69:25
“Tegin Pab-kartagin chogbal:
Tule-pid we tule-anal tummadga togenab.
Sal. 109:8
21 “Al anmal tule-walgwen-amienabmal, Judas-anal anmal-pakadga kugal. Tenal we tule anmalbak mes Jesús-kannan-tullejadgin, tulemalga chunmagal. 22 Al we tule-chulegoed Juan-tigin-Jesús-okchad-akar Jesúsbak pipirmadi-kujad, Jesús nikpa Pab-negzhe nadedzhe. Al we tule-chulegoed tulemalga pul-nabir Jesús-kannan-tullejadgin chunmanoniko.”
23 Tegin tule-Pedro-itobukmalad walbo tule-amismal. Walgwen nug José, tegin pimalbal Barsabás-Justo; tegin kwéntin nug Matías. 24 Tegin tule-pukmalad Pabzhe kolalmalgu, Pabga chogalmal:
—Pabye, imi pedin wiis we tule-walbogwad igi aga ulubgin pinzhenanimalye. Imi pe anmalga chogoye, piti-we-walbogwad pe chuo, Judas-anal toggalye. 25 Tenal we tule pe chuo anmalbak mes arpagal, tegin Jesús-nuggin-palmilegalidga toggalye. Imi Judas Jesúsgin-akpijadbal aga tukin arpaged owes. Tegin Judas Jesúsgin-walmajadbal cho-chagla-negzhe tognadye.
26 Tegin tulemal-pukmalad pél Pabzhe kochamalgu, wilub takalmal, toa-tule-walbogid Jesús-nuggin-palmilegalidga togo. Tenal takalgu, Matías Barsabásgin nakwis. Tegin Matías Jesús-nuggin-palmilegalidga togzhamojun. Tegin Matías walambe-kakagwenchakkwad-e-pakadga kunonimojun.