Hebreo-tulemalga Karta Nermalejad
Hebreos
Imi tule nuekwa kwen wichulmal toa Hebreos-karta nermas. Kwenadgan-tummagan-ichejul ebinzhemal Pablo Hebreos-karta nermas. Tenal tule nuekwa wichulmalbal Hebreos-karta toaga nermales. Imi we kartagin chogles Hebreo-tule igal. Al kwenadgan-tummagan ebinzhemal kartade Hebreo-tulemalga palmiles. Tenal Hebreo-tulemal pimalbal Judio-tulemal, tegin pimalbal Israel-tulemal. Tenal Pab-Purpa-Nuedbal iti-kartagin chog Pab-Jesucristo-igaldin Moisés-igalga pul igal-nued. Al Jesucristo angelmalga pul tule-tummad. Tegin chogbal Jesucristobi Pab-Machi-chunnad, tegin Jesucristo pel-kwapa immalmal-e-ibedbal.
Imi Pab-Tummad-Abrahamga-kaka-ukchadyob, tulemal kep Jesucristobal ulukued-chunchunnad nikunonimalo. Imi Jesucristo Moisésga pul tule-tummad. Tenal Jesucristo tule-irwal-Pabzhe-kolmalad-e-tummad-pimaladga pul tule-tummad, Melquisedecyobid. Tenal Pab-igal-pin-mezhijaddin igal-akpenegwadga pul igal-nued. Tenal Jesucristo aga tukin Pabga-ukchadbal tule-Pabga-immal-ukchad-pimaladga pul nuedbal. Al kwenadgan wilediid-abalgin abin-purtigenabmal melle Pab-igegal. Tenal tadgan-Pab-Tummad-penzhulmaladyob, tulemal Pab-Jesúsgin penzhulinabmalmo, melle Pabgin ibzhejul-kuo. Al iti-karta kwenadgan-okannojii Pabbak nuekwa nanegal. Pitomalgu.
1
Pab-Machi angelmalga pul tule-tummad
Imi Pab Tummad kepe-sagla-akar anmal-tadganga melugus Pab-kaka-palchogmaladbal akal-akal chunmadi-kus. Tenal Pab Tummad imisgwadzhedin e-Machibal anmalga chunmadi-kusbal.
Imi Pab Tummad aga e-Machi-nugzhas immalmal-pel-kwapa e-Machigadga kugal. Tenal Pab Tummad e-Machibal pel-kwapa nikpa-neg tegin iti-nap opinnisbal. Tenal Pab-Machidin Pab-Tummad-yer-takleged-e-kaedyob yer taklemo. Tenal Pab-Machi e-Pab-Tummad-yopí tamo, tule immal-wilub-cheedyob. Tenal Pab-Machi e-chunmaked-kannaleged-nikadbal pel-kwapa-immalmal onanejii.
Tenal Pab-Machi kuakwa anmal-iskued-elied amisgu, kep nikpa nad, tegin e-Machi Pab-Tummad-chunkal-nuedzhik pul-tule-tummadga chigwitapchun. Al Pab-Machi angelmalga pul tule-tummadga kunoni, tegin Pab-Machi angelmalga pul e-nug tunkunonibal.
¿Tenal Pab Tummad ibi-angelga chognoni pe ebinzhe:
Pedin an-machi,
antin imis-akar pe pabga kunoni?
Sal. 2:7
Chulá. ¿Tenal Pab Tummad ampa ibi-angelga chognonibal pe ebinzhe:
Antin pe-pabga kuo?
2 Sam. 7:14
Chulá. ¿Tenal Pab Tummad ibi-angelga chognonibal pe ebinzhe:
Pedin an-machiga kumogo?
2 Sam. 7:14
Chulá. Tenal Pab Tummad aga e-Machiga chogzhado: “Pedin an-Machi.”
Tenal Pab Tummad iti-napche e-Machi-Walkwénnagwad palminonigu, e-Machigin chogzhado:
Angelmal-pel-kwapa Pab Tummadyob
we tule-otummogenabmal.
Dt. 32:43
Tenal Pab Tummad e-angelmalgin chogzhado:
Antin purwayob angelmal-ima,
tegin cho-kagwichidyob an-mos-angelmal-imabal.
Sal. 104:4
Tenal Pab Tummad aga e-Machigin chogzhado:
Pedin Pab, tenal pe-neg-takmaiddin pal kwen pelguojul,
ilagwen-nadgu nao.
Tenal pedin, pe-napírra-naneedgin kabaston kani-choggu,
al pedin neg-takmail,
inniki pel-kwapa immal imako.
Imi pedin yer igal-innikigwad takedbal,
tegin pedin istar igal-iskana takedbal,
antin-Pab-Tummad pe-chus.
Tegin an pe-Pab-Tummadga maibal.
Tenal an pe-pakamaladga
pul-tule-tummadga pe-odos,
tule nonogin kwallu eyogedyob,
weligwal-itogedgin neg takegal.
Sal. 45:6-7
10 Tenal Pab Tummad aga e-Machigin chogzhabaldo:
Tummad, imi pedin kepe-saglagin nap-kaed opinnis.
Tegin pe nikpa-neg chobzhabal.
11 Tenal nikpa-neg tegin iti-nap pelgunoniko.
Tenal pedin pal kwen pelguojul-kuo,
ilagwen-nadgu kudio.
Tenal iti-nap tegin nikpa-negdin mol-nunguoedyob,
pelgunonimogo.
12 Tenal tule mol-nun-midedyob,
pedin iti-nap tegin nikpa-neg meto.
Tegin tule mol-pid yoedyob,
pe iti-nap tegin nikpa-neg ogwamogo.
Tenal pedin, pe kwen ogwalegojul-kuo,
tenal pe ilagwen-nadgu kudiguo.
Sal. 102:25-27
Tenal Pab Tummad weob aga e-Machigin chogzhado.
13 Tenal Pab Tummad aga e-Machiga chogzhamodo:
Pedin an-nuedzhik tule-tummadga chigwitapo,
antin pebak-aichulmaladgin nakwegal pe-imakoedzhe,
tule kangin nag-onakwedyob.
Sal. 110:1
Tenal Pab Tummad weob aga e-machiga-chogzhadyob angelgadin kwen chogzhajul-kus. 14 Tenal angelmaldin tule-purpamalad. ¿Tenal Pab Tummad mosmalga angelmal-odoszhulzhí tule-abonolemaloed-pentagal? Teobdo.