Na Etana KerekereꞋa FaꞋasia Sa John
Na lifurongo sa John naꞋa neꞋe keresia buka neꞋe. NiaꞋa ta taꞋi ngwae ana akwala ma ro fafarongo ba sa Jesus ki, ma nia ba keresia logo FaꞋarongoꞋa LeꞋa sa John. Saena kerekereꞋa neꞋe, nia saea fuana ngwae faꞋamamana ki kike uu ngasi ana falafala God ki, ma kika madafia faꞋamanataꞋanga rora ki. Ana kaidaꞋi neꞋeri, ti ngwae ꞋosoꞋoso kira saea sa Jesus noaꞋa kasi koso maꞋi Ꞌani noniꞋi ngwae mamana. ꞋIu, sa John ka saea fuana ngwae faꞋamamana ki kike madafia faꞋamanataꞋanga rora kira ki. Sa John oga Kristin ki fuana dongalana faꞋamanataꞋanga sa Jesus Christ ba lifurongo ki alaꞋa naꞋa maꞋi sulia. Na lifurongo ba kiri, kira lisia naꞋa sa Jesus kaidaꞋi nia tua. Ma kira ka bolo fuana faꞋamanataꞋanga sulia.
Na ru talingaꞋi ki saena buka neꞋe:
Sa Jesus Christ neꞋe na AlaꞋanga ana MauriꞋa & 1:1-10
Na alaꞋanga totongaꞋi sulia na alafeꞋanga & 2:1-17
Na Malimae sa Jesus Christ & 2:18-29
AlafeꞋanga fuamuꞋa kwailiu & 3:1-24
Na ngwae faꞋamanata ꞋosoꞋoso ki & 4:1-6
God faꞋataꞋinia fuakulu kuke alafe faꞋuta fuakulu kwailiu & 4:7-21
Na fitoꞋonga kulu ana sa Jesus liufia naꞋa magalia & 5:1-21
1
Sa Jesus Christ neꞋe na AlaꞋanga ana MauriꞋa
Nau ku kerekere kwau fuaumulu sulia na AlaꞋanga neꞋe kwatea mauriꞋa mamana. Na Christ naꞋa neꞋe AlaꞋanga ana MauriꞋa mamana neꞋeri. Ma nia tua mala maꞋi Ꞌua ana etangilana magalia. Bore ma kaidaꞋi neꞋe, kaimili lifurongo ki rongoa naꞋa, ma kami ka lisia naꞋa Ꞌani maamiꞋa. Ma kami ka sama naꞋa toꞋona Ꞌani na limamiꞋa. Na MauriꞋa mamana neꞋe ka alua naꞋa na ngwae, ma kami ka lisia naꞋa. Nia neꞋe kami ka fata sulia, ma kami ka faꞋarongo kaumulu sulia na MauriꞋa firi neꞋe nia tua ni fuli faꞋinia God na MaꞋa. Ma God ka faꞋataꞋinia naꞋa Mauri mamana neꞋe fuaimili. Kami lisia ma kami ka rongoa na Christ neꞋe na AlaꞋanga ana MauriꞋa mamana neꞋeri, ma kami ka faꞋarongo logo Ꞌani fuamuꞋa, fasi Ꞌiri muke fiku faꞋi kaimili saena na mauriꞋa neꞋe kami tua Ꞌani faꞋinia na MaꞋa ma sa Jesus Christ na Ngela nia. Ma kami keresia na ru neꞋe ki kwau fuamuꞋa fasi Ꞌiri na saesaeleꞋa Ꞌanga kulu ke leka talau.
Abulalana God madakola taꞋifau
Ma na faꞋarongoꞋa neꞋe kami rongoa faꞋasia na Ngela God ma kami ka saea fuamuꞋa neꞋe Ꞌuri: God nia diꞋia na madakolaꞋanga osiꞋana nia leꞋa ka tasa liu, ma ka noaꞋa ta maꞋe rodo ana niaꞋa. Ma diꞋia kuka saea fasi kulu fiku Ꞌado kwaima naꞋa faꞋinia God, ma kulu ka tua Ꞌua goꞋo Ꞌakulu saena maꞋe rodo, kulu ka soke liu Ꞌani fatalaka, ma falafala kulu ki ka Ꞌiri tua sulia mamanaꞋanga. Bore ma diꞋia kulu tua sulia na mauriꞋa ana madakoꞋanga God, diꞋia God nia tua sulia na madakoꞋanga nia, ꞋunaꞋeri kulu fiku faꞋi kulu kwailiu, ma na maelana sa Jesus, na Ngela nia, ka faꞋasikasika kia faꞋasia na taꞋangaꞋa ki taꞋifau.
Ma diꞋia kulu saea noaꞋa kulu kasi fulia goꞋo ta roraꞋa, kulu ka soke kulu talakulu. DiꞋia kulu fata ꞋunaꞋeri, tama noaꞋa kulu kasi sai goꞋo ana na mamanaꞋanga God. Bore ma diꞋia kulu fulangaꞋinia na roraꞋa kia ki fuana God, nia ke baꞋa rufuanata ana na roraꞋa kia ki, ma ka faꞋasikasika kia faꞋasia na taꞋangaꞋa kia ki taꞋifau, osiꞋana nia ke baꞋa faꞋamamana na eta fataꞋa nia fuana sasilana na ru neꞋeri, ma nia ka sasia naꞋa ru saga. 10 Ma diꞋia kulu saea noaꞋa kulu kasi fulia goꞋo ta roraꞋa ana kiaꞋa, tama kulu saea God na ngwae ꞋosoꞋoso goꞋo ana niaꞋa talana, ma na fatalana God ka noaꞋa kasi tua goꞋo saena maurilaka.