Nan Omona ay Solat Juan
Nan Makwani Maipoon isnan Inmona ay Solat Juan
Nan omona ay solat Juan ay esa'y apostol Jesus et wad-ay nan chwa ay napateg ay ibfakhana. Ifagfakhana isnan nensolatana ay khawis koma nan angnencha ta ad-i cha maisis-iyan ken Apo Dios ya isnan Anakna ay si Jesu Cristo. Tinokhona akhes chaicha ta ad-icha patpatiyen nan faken tet-ewa ay maisos-olo, tay siya chi nan mangipasiyan ken chaicha ken Apo Dios. Nan nay faken tet-ewa ay sos-olo et aped cha sinsinmek ay mangmangwanin ngaag nan wad-ay isnan nay fatawa. Isonga kinwanicha en ad-i mabfalin ay nenfalin si Jesus is tet-ewa ay takho tay ad-i mabfalin kano ay maitapi nan Dios isnan ngaag ay wad-ay isnan lofong. Kankanancha en ad-i masapol ay khawis nan ikkan nan mamati paymo nan enlilinnaychancha. Ngem ad-i fayaw tet-ewa chi. Isonga nan songfat Juan et ifagfakhana ay tet-ewa ay nenfalin is takho si Jesu Cristo id sangad-om. Ipaammona akhes ay am-in ay mamati ken Jesu Cristo ya menlayad ken Apo Dios et masapol ay khawis nan ang-angnencha ya enlilinnayad cha.
Nan Linaona
Nan lapon si solat 1:1-4
Nan khawis ya faken khawis ay kaiyalikhan nan enpaway ya nan enfollinget 1:5 - 2:29
Nan nateknan nan ang-angnen nan an-ak Apo Dios isnan an-ak Satanas 3:1-24
Nan kinatet-ewa ya nan faken tet-ewa 4:1-6
Nan layad nan mamati 4:7-21
Nan mangafakan nan pammati 5:1-21
1
Si Apo Jesus ay Makwanin Kalin Apo Dios nan Poon si Fiyag
1 Ensolat kami ken chakayo maipoon isnan sikhod ay wad-ay issan laplapona ay siya nan kalin Apo Dios ay poon si fiyag. Wad-ay siya ya chadlos mi chinnge nan kalina. Chadlos inilan nan matami, ya inegnan nan limami kannay. 2 Nenpaila siya ay poon si fiyag ya inilami, et nay tistikhowanmi siya ken chakayo ya ipaammomi siya ay nenpaila ken chakami. Siya nan makwanin fiyag ay maid pengpengna, ay sikhod ay wad-ay ken Dios Ama. 3 Adi kad nan nay ay ifagfakhami ken chakayo nan inilami ya chinngemi, ya ibfakhami ta maitapi kayo ken chakami ay makiiib-a ken Dios Ama ya nan Anakna ay si Jesu Cristo. 4 Isolatmi na ken chakayo ta chadlos tako enlal-ayad am-in.
Nan Entee isnan Paway ya nan Entee isnan Follinget
5 Siya na nan chamag ay chinngemi ken siya ay ipaammomi ken chakayo: Si Apo Dios et silaw, ya maid paat follinget ken siya. 6 Mo kanan tako, “Makiiib-a tako ken siya,” ngem ke pet alig follinget nan manmannalanan tako, en-eng-engag tako ya ad-i maiyafoloy isnan kinatet-ewa nan angnen tako ay enfiyag. 7 Ngem mo manad-alan tako isnan masisilawan tay wad-ay siya ay silaw, et maoornos tako, ya nan chalan Jesus ay Anakna nan menchalos isnan am-in ay fasol tako. 8 Mo kanan tako en maid fasol tako, loklokowen tako kannay nan awak tako, ya maid ken chatako nan kinatet-ewa. 9 Ngem mo ibfafawi tako nan fasol tako ken Apo Dios, pakawanena am-in, ya chalosana nan ngag sisa ay ad-i nalenteg ken chatako. Siya chi tay kaaafolot ya nalenteg siya. 10 Ngem mo kanan tako en egay tako finmasol, ippey tako ay nalalangkowag siya, ya maid ken chatako nan kalina.