Nan Solat Pablo ken Filemon
Nan Makwani Maipoon isnan Solat Pablo ken Filemon
Si Filemon et esa'y khawis ay mamati id Colosas ay nenfaa ken Onesimo. Nan faa ay nay et linmayaw isnan apona ay si Filemon sa et inmey id Roma. Naibfafalod si Pablo ischi issan chey et ischi nan nen-asiam-ammowancha ken Onesimo. Khapo ken Pablo nenfalin si Onesimo ay esa'y mamati. Nensolat si Pablo ken Filemon ta pakawanena nan faana ay ipasakhong Pablo ken siya. Nan laychen Pablo ay kedchawen ken Filemon et ta chawatena koma si Onesimo ay kag na met laeng chadlos akhi, tay en-iso cha et ay naiyornos ken Jesus ya es-esang nan pammaticha.
Nan Linaona
Nan lapon nan solat 1-3
Nan kaidchayawan Filemon 4 - 7
Nan kechaw Pablo maipoon ken Onesimo 8 - 22
Nan anongos nan solat 23-25
1
1 Nan nay ay solat, et nalpo ken chakami ay chwa ken Timoteo ay ib-a tako. Sak-en si Pablo ay falod khapo ken Cristo Jesus.
Isolatmi na ken sik-a Filemon ay laylaychenmi ay makidkidno ken chakami maipoon ken Cristo. 2 Isolatmi akhes na isnan am-in ay mamati ay maam-among isnan afongmo, ya ken Apia ay kag mi kafabfaiyan, ya sa et ken Arkipo*Si Apia et asawan Filemon, ya si Arkipo et kanan nan tapina en pangolon nan mamati ay maam-among isnan afongcha. Kanan nan tapina en anak cha Filemon ken Apia siya. ay ib-ami ay sorchachon Cristo.
3 Asop ya wad-ay ken chakayo nan fachang ya talna ay malpo ken Apo Dios ay Ama tako ya si Apo Jesu Cristo.
Nan Layad ya Pammatin Filemon
4 Kad-in enyaman ak ken Apo Dios isnan mamanmekak ken sik-a isnan enlowalowak, 5 tay chak chengngen nan maipoon isnan layad ay ipap-ailam isnan am-in ay takhon Apo Dios ya nan pammatim ken Apo Jesus. 6 Ilowalok tatno isnan cham mangawisan isnan ib-ayo ta mamati cha et cham akhes ammowen kayet am-in nan enkhawisan ay kwa tako isnan naiyornosan tako ken Cristo. 7 Nan layadmo kayong nan chadlos nangipafikas ya nangipalal-ayad ken sak-en, tay inpalin-awam nan semek nan takhon Apo Dios.†Nan osto ay naisolat isnan Griego isna et, “inpalin-awam nan poton nan sasanto maichalan ken sik-a.”
Nan Kechaw Pablo pala ken Onesimo
8 Idwani, wad-ay nan kedchawek. Olay mo natoled ak ay mangifilin isnan osto ay angnem tay itakchegko si Cristo, 9 ngem khapo isnan layad, ad-ik filinen sik-a. Nan yangkhay angnek, et enseg-ang ak ken sik-a. Sak-en si Pablo ay am-ama ya falod khapo ken Cristo, ya 10 enseg-ang ak maipoon ken Onesimo ay kag ko anak, tay nenfalin ak ay kag na ama isnan pammati isnan mafabfalochak. 11 Issan chey maid maifachangna‡Nan ayen nan ngachan ay Onesimo isnan kalin Filemon, et fachang. ken sik-a, nay met achi idwani wad-ay nan maifachangna ken chaita ay chwa.
12 Pasakhongek siya ken sik-a, olay mo kag wad-ay nakaan ken sak-en tay chadlos ko laylaychen siya.§Nan osto ay naisolat isnan Griego isna et, “siya nan potok.” 13 Sak-en, lalaychek ay enkadwak siya isna, isnan sisya'y maifabfalochak khapo isnan Khawis ay Chamag, ta maisokat siya ken sik-a ay mensilfi ken sak-en. 14 Ngem ad-ik laychen ay mangangnen engkhana ay ipalofosmo, ta ad-i mapilit nan fomachangam maichalan ken siya, mod-i ket ta kikhad ka ay fomachang.
15 Away siya na nan khotok nan naisiyanan Onesimo ken sik-a isnan sinak-itan, tatno sa entee ken sik-a is engkhana. 16 Ngem idwani, faken et aped yangkhay faa, mod-i ket wadwad-ay mo nan faa, tay nenfalin et ay kalal-ayad ay ib-am. Tay chachama nan layadko ken siya, et am-amed koma nan layadmo ken siya ay sikhod ay pangafongmo, ngem am-am-amed idwani tay faken yangkhay faam siya mod-i ket ib-am akhes ay mamati ken Apo Jesus!
17 Et mo ifilangmo sak-en ay kadwam Filemon, khakhawisem siya ay kag isnan angnem ay manawat ken sak-en. 18 Ya mo wad-ay finmasolana paymo otangna ken sik-a, sak-en nan singilem. 19 Ilam, sak-en kannay ay Pablo nan mangisolat isna*Nan osto ay naisolat isnan Griego isna et, “Sak-en si Pablo ay mangisolat isna isnan limak kannay” ay mangwanin, “Sak-en nan mamayad isnan otangna.” (Ad-ik magtek mang-ey ipasmek ken sik-a ay otangmo ken sak-en nan eng-engkhana ay fiyagmo.) 20 Adi kad siya chi nan kedchawek ay fachangmo ay ib-ak khapo isnan Apo tako. Palin-awaem nan semekko†Nan osto ay naisolat isnan Griego isna et, “Palin-awaem nan potok” khapo isnan naiyornosanta ken Cristo.
21 Ensolat ak ken sik-a tay ad-i ak enchwadchwa ay at angnem ay angnen nan kedchawek. Ammok ay ad-ad-acha nan angnem mo nan kedchawek. 22 Wad-ay kayet nan laychek ay ibfakha. Adi ngen ta omisakhana ka is sak entey-an, ta asop ya songfatan Apo Dios nan lowaloyo ya ipasoblina chadlo sak-en ken chakayo.
Ipaammon Pablo ay Sesemken nan Iib-an Filemon siya
23 Pakpakomostaan Epafras chakayo. Siya nan ib-ak isna ay maibfafalod khapo ken Cristo Jesus. 24 Enpakpakomosta akhes cha Marcos, Aristarco, Demas ya si Lucas ay cha makidkidno ken sak-en.
25 Asop ya wad-ay ken chakayo‡Nan osto ay naisolat isna et, “Asop ya wad-ay nan fachang Apo Jesu Cristo isnan leng-agyo.” nan fachang Apo Jesu Cristo.
*1:2 Si Apia et asawan Filemon, ya si Arkipo et kanan nan tapina en pangolon nan mamati ay maam-among isnan afongcha. Kanan nan tapina en anak cha Filemon ken Apia siya.
†1:7 Nan osto ay naisolat isnan Griego isna et, “inpalin-awam nan poton nan sasanto maichalan ken sik-a.”
‡1:11 Nan ayen nan ngachan ay Onesimo isnan kalin Filemon, et fachang.
§1:12 Nan osto ay naisolat isnan Griego isna et, “siya nan potok.”
*1:19 Nan osto ay naisolat isnan Griego isna et, “Sak-en si Pablo ay mangisolat isna isnan limak kannay”
†1:20 Nan osto ay naisolat isnan Griego isna et, “Palin-awaem nan potok”
‡1:25 Nan osto ay naisolat isna et, “Asop ya wad-ay nan fachang Apo Jesu Cristo isnan leng-agyo.”