Nan Solat Pablo isnan iFilipos
Nan Makwani Maipoon isnan Solat Pablo isnan iFilipos
Siya na nan insolat Pablo isnan iFilipos ay inmona ay namati ken Jesu Cristo id Macedonia khapo isnan sos-olon Pablo. Naibfafalod si Pablo issan nangisolatana isna. Nachadchanakhan siya isnan cheycha'y mamati ay iFilipos, tay wad-ay nan naisos-olo ken chaicha ay ad-i osto, ay nalpo isnan tapina ay en-isos-olo ay cha mangipangpangaag ken Pablo. Ngem olay mo siya chi, khechangna'y nenlal-ayad si Pablo ya nentatalek khapo isnan pammatina ken Cristo, et maiila na isnan nay ay solat.
Nan osto ay chomalat isnan nangisolatan Pablo isna, et ta ifaagna nan chadlos yamana isnan cheycha'y iFilipos ay namadfachang ken siya. Tinogtokhona akhes chaicha ay mangipafikas isnan pammaticha, ta olay mo ngag nan om-omat ken chaicha, et ad-i koma kayet makak-aan nan pammaticha ken Apo Jesus. Sinos-olowana chaicha maipoon isnan mangifan-ikhan isnan awak ay kag nan inangnen Jesu Cristo, ya ta ad-icha en-im-imot paymo en-eng-engag. Insos-olona akhes ken chaicha ay wad-ay nan osto ay fiyagcha isnan maitapiyancha ken Cristo, ya nan layad Apo Dios ken chaicha nan khotokna. Naichowa na ken chaicha khapo isnan pammaticha ya faken nan nangiyangnenancha isnan lenteg si Judio. Inpasmek akhes Pablo nan lagsakcha ya nan natalna ay semek ay ichawchaw Apo Dios isnan maitapiyancha ken Jesu Cristo.
Nan Linaona
Nan lapon nan solat 1:1-11
Nan kasasaad Pablo id Roma 1:12-26
Nan ikkan ay enfiyag ay wanchen koma nan mamati 1:27 - 2:18
Nan makwani maipoon ken cha Timoteo ken Epafrodito 2:19-30
Nan poon nan kinalenteg Pablo 3:1-15
Nan en-isos-olo is faken tet-ewa 3:16-21
Nan tokhon maipoon isnan ornos ya talna 4:1-9
Nan menyamanan Pablo isnan fachang nan iFilipos 4:10-20
Nan anongos nan solat 4:21-23
1
1 Chakami cha Pablo ken Timoteo ay faan Cristo Jesus. Siya na nan solatmi ken chakayo ay takhon Apo Dios ay naiyornos ken Cristo Jesus, ya entetee issa id Filipos. Insolatmi kayet na isnan mangichad-alan ken chakayo issa ya nan kafachangcha.
2 Asop ya wad-ay ken chakayo nan fachang ya talna ay malpo ken Apo Dios ay Ama tako ya ken Apo Jesu Cristo.
Nan Nangilowalowan Pablo isnan iFilipos
3 Mo chakhos yangkhay semkek chakayo et kad-in enyaman ak ken Dios ay Apok. 4 Kad-in enlal-ayad ak ay mangilol-owalo ken chakayo am-in 5 maigkhapo isnan inikkanyo ay nakidkidno ken sak-en mailapo issan chamona engkhana idwani, isnan chak mangipap-alawakhan isnan Khawis ay Chamag. 6 Sak et ad-i enchwadchwa ay si Apo Dios, et itot-oloyna nan linapowana ay khawis ay inangnena isnan fiyagyo engkhana ay ikwasna isnan akhew ay kasin aliyan Jesu Cristo ken sak-en. 7 Nan khawis ay liknak ken chakayo et osto, tay sesemkek chakayo.* Nan naisolat isnan Griego isna et, “wad-ay kayo isnan posok,” paymo “wad-ay ak isnan posoyo.” Tay nakilak-am kayo am-in isnan fachang Apo Dios ken sak-en, faken yangkhay isnan maifabfalochak idwani, mod-i ket isnan chak mangitakchekhan ya manistikhowan isnan kinatet-ewan nan Khawis ay Chamag akhes. 8 Ammon Apo Dios nan iliwko ken chakayo, tay nan chachama ay layadko ken chakayo et nalpo kannay ken Cristo Jesus.
9 Et siya na nan ilol-owalok pala ken chakayo: Kedchawek ta onanig fomikas nan layadyo, ya ta cha yo kayet ammowen nan kinatet-ewa ya ta nalaing kayo ay mamigfig isnan osto ya khawis, 10 ta mabfalin yo ay piliyen nan kakhawisan. Sa et ta enfalin kayo ay nadchalos, ya maid makmakwaniyanyo isnan akhew ay kasin aliyan Cristo. 11 Ta nan yangkhay fongan si kinalenteg ay wad-ayen Jesu Cristo nan maila ay okhaliyo, et siya nan mangischo isnan katangtangachan ya kaidchayawan Apo Dios.
Nan Khawis ay Nenfanakhan nan Naibfalochan Pablo
12 Laychek ay ammowenyo ay iib-ak, ay amed inpafikas nan inmat ken sak-en nan naiwalasan nan Khawis ay Chamag. 13 Et nay naammowan isnan am-in nan sorchachon nan ali ay manoktokkhong isnan afongna, ya nan am-in kayet ay wad-ay isna, ay nan yangkhay khotok nan naibfalochak et khapo ken Cristo. 14 Khapo akhes isnan naibfalochak, finmikas nan pammatin nan kaangsanan isnan iib-a tako isnan Apo ya ad-i cha omegyat, mod-i ket onanig cha tinmoled ay mangipaammo isnan kalin Apo Dios.
15 Wad-ay cha tet-ewa nan mangipap-alawag maipoon ken Cristo khapo isnan apalcha, ya tay laychencha yangkhay ay wad-ay makisomsomaancha, ngem wad-ay cha akhes nan tapina ay khawis nan semekcha. 16 Enpap-alawag cha tay isnan layadcha ken sak-en, tay ammocha ay naifalod ak ay mangitakcheg isnan Khawis ay Chamag. 17 Nan tapina, teken pet nan khakhalacha ay mangipalawag maipoon ken Cristo, tay nan kafokfokochancha ay pangkhep nan semsemkencha. Kananchan mo onanig cha matoptopan nan likhatko isnan maifabfalochak isnan cha cha angnen.
18 Ngem kikhad cha olay ngag nan pangkhepcha ay mangipalawag. Mo khawis nan semekcha paymo teken, enlal-ayad ak kayet mo ke tay cha maipalawag si Cristo. 19 Ad-i ak tomke ay enlal-ayad tay ammok ay khapo isnan lowaloyo ya nan fachang nan Ispiriton Jesu Cristo et sak maipalofos. 20 Nan chadlos ko sadsad-en ya namnamaen ay maikkan et ta ad-ik koma ifabfain nan awakko isnan ik-ikkak, mod-i ket ta kad-in tommoled ak, am-amed idwani, ta machad-ayaw si Cristo isnan awakko, isnan matatakhowak ya olay pay isnan mateyak. 21 Tay ngag kasin nan khotok nan matatakhowak mod-i si Cristo? Et mo matey ak at am-am-amed kayet ay enkhawisak. 22 Ngem mo isnan sisya'y matatakhowak et angsan kayet nan fongan nan chonok, ad-ik ammo mo ngag nan osto ay piliyek isnan chwa: nan matakhowak paymo nan mateyak. 23 Enpalikhat ak ay enpili isnan chwa ay laychek. Laychek ay komaan ta omey ak et is kakawad Cristo, tay siya na nan kakhawisan ay maangnen. 24 Nay met achi, wadwad-ay nan enkhawisana ken chakayo mo sisya'y matatakho ak kayet. 25 Ad-i ak enchwadchwa isna, et nay ammok ay ad-i ak komaan idwani, mod-i ket matatakho ak kayet ta cha matoptopan nan pammatiyo ya nan lagsakyo isnan namatiyanyo. 26 Siya, at somakhong ak ken chakayo issa, ta isnan makitey-ak kasin ken chakayo, at wadwad-ay kayet nan khotok nan mangilaychalaychanyo isnan naiyornosanyo ken Cristo Jesus, khapo ken sak-en.
Nan Tokhon Pablo isnan iFilipos
27 Idwani, ilaenyo ta nan ikkanyo ay enfiyag et maiyafoloy isnan Khawis ay Chamag maipoon ken Cristo, tatno mo makaeey ak ay mangila ken chakayo paymo ad-i, khechangna ay at chengngek ay naornos kayo ay ad-i mangiyoya, mod-i ket kag kayo sorchacho ay naornos ay mamaloknit isnan cheycha'y mangapos isnan pammati isnan Khawis ay Chamag. 28 Ad-i kayo omegyat isnan olay ngag sisa ay angnen nan mangapos ken chakayo, tay nan toledyo nan sinyal ay mangipaila ken chaicha ay at maamas cha'y maafak ya at maisalakan kayo, tay si Apo Dios nan mangisalak ken chakayo. 29 Maangnen am-in chana tay faken yangkhay nan mamatiyanyo ken Cristo nan ichowan Apo Dios ken chakayo ay enkhawisanyo, mod-i ket inischona akhes ay enlikhat kayo maipoon ken siya. 30 Idwani, kag kayo ken sak-en ay cha makifaloknit isnan chey kannay ay likhat ay inilayo ay chak intopeg, ya nay cha yo chengngen idwani.