2 Timotius
Paulus horatni re'eni wornu la Timotius pa nakot nohora liawanni, de la'a irora la'ani-maini, me la'a irora rwatamput pua Timotius tuwar mia'ta mere nkar lia Yesus Kristus limni ralamni. Lira yawilu-yawewla pa'etnu-parahmani de totpena Timotius yana nwalera. Rawilu-rawewla me rotlia la ga'a pa nden rer lia, yan nod lia li'iru la'a Yesus Kristus yakotnohorni, me la' walia ntorreria nnielu-niau ululu. Nano'a-na'atga totpena Timotius ntoran reria kniarni tungkur die, me nakot nohora la'a Kot Kalwieda-Paitiota maka kwatiawu Uplerlawna de, de nhioratni yana nwalera, me eramni la' temni, yoma enan liola hururi-wawuawu ralamni.
Paulus nwagahniorta Timotius pa yana nre' teman la yatut niha-yawedi ltieri mak kodia wotwotarni-hawuautnu. Yoma lira-tun muak emkade de edonna nodia untu, mere nodia ralma-rior yatyat la mak katlin reri.
La' hare honona re de Paulus nakot nohora la Timotius totpena nlernohora Paulus nhiolli-lietni illu-wniehwani. La' hare honona de Timotius namkek nek la Paulus hi'ini-yapni la'a pesiayni la Yesus Kristus. Natu nhur niohora inonni, nhol lia kalwiedni, tniutrier tiertehrani, me polpuollu-wakwakni la'a maka e nlernan oleka la wutwutu-kokgohonu ralamni.
La' Puka di de e rakot nohor emkadille:
1. Mulaliaini de (1:1-2)
2. Rodia la ya'uli-yawedi (1:3-2:13)
3. Kniohlima la nnio'a-niatu (2:14-4:5)
4. Rwahaur nohor la Paulus nhiolli-lietni (4:6-18)
5. La'awa lira hohoni tniutawnu (4:19-22)
1
Paulus nwak kalwieda
1-2 A'nu Timotius mak kden rer lia a ralmu. Mak khorta horat di, de a'u Paulus. Nlernohora Uplerlawna ralma-riorni pede Kristus Yesus Ntutmuata-nkewra' a' pua a lia makodi Uplerlawna lir kalwiedni totpa a'ukot nohora mormiori-dardiar miaka Uplerlawna Nano'taru. Mormiori-dardiar die hota itlernana yoma itora Kristus Yesus tla' lir ida.
Awuak de Uplerlawna it Amlawanni de Nora Itmatromni Kristus Yesus ralma kalwiedni pa Nala ra'ani-pallu me kalwieda-paitiota nanaloi-nanatru o'a.
Tden rer lia Uplerlawna kniarni ralamni
A'u'uli-uwedia Uplerlawna, maka aghima-rie'a kniarni de emekwalia ululu la u'pu-tga'ru. Aghima-rie'a de agodi ihru ploi-ralma plele'era. Asiumbaini la lelera-melmela de a'u'uli-uwed reria Uplerlawna onnila o' pesiaymu. Asiumbain de aghoratreria ralam mayo'omu la' ler maka itsakar talla. La' hade pede a ralmu nmormior pia itwatroma, totpena a ralmu namtemna. Aghoratnana la' o pesiaymu toto' la Yesus Kristus, emolmolan walia upmu Lois makpesiay ulga, nanpena inmu Eunike pesiayni. Ne a ralmu nat muemna de omuor ira mimneneha. Hade ed mak kariei pia awuagahniorta o'a, totpena emeka nhi'inde riy ramor rieria ai totpena yana ai nmati, de hota mniair rieria ruri-lai miaka Uplerlawna Nala tiy o' la' lera ariana a li'mu la' o wawanmu. Yana mumta'ata mniair rieria ruri-lai die yoma la'a Nhiw Lulul miaka Uplerlawna Nala mai ita, de edonna Nod it la yamta'ata. Mere Nhiw Lulul die Nhi' it pa taruri-talai me Nodia it pa ittulla-tsaynia it rimormior wialli me totpa tatu todi it inonni la hanek-harahu wuawannu.
Ama, onnila Uplerlawna Nhiw Lululli Ntulan mai ita, pede yana tmola-tma'a la takot nohora Itmatromlawanni ne yan walia mmuola-mmua'a la' mai a'u, yoma onnila edonna aghi'a yatyatni pa a'utnioran la roma nhio'la, mere yoma Yesus tototni-rerieini. Yana mmuola-mmua'a mere lol Uplerlawna rurni-laini makden tiy o'a de hota mrie'ela pa muor rewre'wa a' pua ttutulu-takwara nniahora-nniala'a yamuki-yama'ala onnila takot nohora Uplerlawna Kot Kalwiedni. 9-10 Uplerlawna Namori-nalewna ita ne Npolg it pa tla' E gah wamueheni mak kakleha do'a-hala. Enhi'a hare honona de edonna Namkek la hya' maka it tsi'a-tyapi oleka la'a it mormiorni di, mere Nhi' hare honona de Nhapar rer lia E kalwiedni maka Ha wniaror oleka la ler maka Uplerlawna edon Nakoki-nayap mia'ta nohkerna. Mere la'pa dodo'ondi na'nama Uplerlawna Ntutga kalwiedni-paitiotni de mai ita, de tamkek nek la Kristus Yesus maimiaini, de emekneka Makamori-Kalewna mak katowar oleka matmiati la' yawa, ne Nodia mormiori-dardiari pa Nmai. Enayakot olek la' mormiori-dardiari mak kodi liarni de la' E Kot Kalwiedni-Paitiotni ralamni. 11 La'a Kot Kalwieda-Paitiot de, pede Uplerlawna Ntut a' pua a lia makodi E lir kalwiedni pa a'ukot nohora lir de me awuatutga la riy. 12 La' hade pede atiutulu-lielewua yamola-yama'a lui-nuhru (la' roma nhio'la di ralamni) mere a'g edon muola-mua'a, yoma a lia maka ha rtoran reria a'u, yoma apuesiay toto' meman la Yesus Kristus. Ne apuesiay miemna Enatiak reri E Kot Kalwiedni-Paitiotni mak Enhopan pa a'ukot nohora la'pa ler maka hota Nmai owa'ana ntutu-nte'ewa.
13 Timotius, ompuatutu-mpuaye'a de mliernohora wniatutu plollola maka awuatutu-wuaye' tiy o'a. Ne yan memmemna mpualer la pesiaymu onde ralam kalwiedmu. Itlernan oleka ruri-lai pa tsi' hari honona yoma itler wutg olek la Kristus Yesus. 14 Mpuatutu-mpuaye'a lir kalwiedni de, Uplerlawna Nhiw Lululli mak kodi plolli la' it mormiorni, himni-re'eni mai ita pa mutiak kalwiedweda wniatutu mak kalweli, maka Uplerlawna Nhopna omukot nohora.
15 Omuat niohora olek la'a Asia di yapatni de riy honona raltarga a'u. Figelus nor Hermogenes nek de raltarg a'u wali.
16 Mere awuak de pena Orgahi-Orha'a ralam kalwiedni pa Nmeh'a Nwoili-nwahla Onisiforus romni mniotni. Yoma Onisiforus nodia a lia muki-hepru. Alia' oleka roma nhio'la mere Onisiforus edonna nmola-nma'a la' hade. 17 Nte' tar lia letlawna Roma dewade nodi liarni pa nwahak a'u. 18 Ne omuat mueman walia la Epsus de e ntulan mai a'u. Pena Itmatromlawanni Nhoratreria la hihi'ini-yapyapni de pa Nhi' samomuou lia'a e'a la' ler maka hota Itmatromlawanni ed mak ktorna watghudi mai riy nohkerna honona.