Roma
La' Paulus lerni de ray Roma rodi plolli la noha-noha honona nor wutga letni-ruhunni. Paulus na'enyatga horat di la' makpesiay la'a Roma totpena nwatutu ira, yoma edon nlernan ma'ta talan pa nla' hande.
Paulus wniatutnu ononni de emkadilla: La'a talla ida nmemeh'a to'a totpena tor Uplerlawna tkalwieda de hornama itpesiay Yesus Kristus.
Paulus ntekal reria niwra rimormiori it hononit de itsi' oleka do'a-hala la'a Uplerlawna yamkekni (3:10-12). Ne ta'en niana itor Uplerlawna tkalwieda onnila agama deullu-tatarni (3:27-28; 4:15). Mere onnila Yesus matmiatni la'a it rerieini pede Uplerlawna Ntuwu-nhai nian it la do'a-hala ralamni (3:25-26; 5:8). Uplerlawna Namori-nalewan nan ita me Nhi' it pa tora E' tkalwieda hornama itpesiay Yesus (3:22, 26; 4:24-25; 5:1). La'pa itpesiay Yesus de do'a-hala edon nodi plolli owa'an mai ita. La' hade pede itlernan talan pa itsi'a-tyapia hya' ed mak kla' nan Uplerlawna ralamni (Onni 6-8).
La'a Onni (Pasal) 9-11 Paulus nakot nohora hya' ed maka hota makden Yahudi (de Israel duratni-waitni) hota rlernana. Makpesiay harahu rwarora de Uplerlawna Nhoplial oleka makden Yahudi re onnila ir edon rpesiay Yesus. Yahudi harahu re edon rpesiaya, mere Uplerlawna Nnairia hade na Nharia talla totpena riy Yahudi atia'a hota rpesiaya (11:11-36). La' makwohorulu-ktatrulu Pukni nakot nohora walia Yahudi atia'a re pesiayni (9:25-29; 10:19-21). Uplerlawna edon Nhopliala makden Yahudi re mere Nhi' nan hare honona totpena la'a hohoni dewade riy Yahudi maka Uplerlawna Nwalir nian honona hota rpesiay wali (11:26).
La'a Puka ralamni rakot emkadilla:
1. Paulus nwak kalwieda me nakot nohora niwra nla'a Roma (1:1-15)
2. Horat di lirni ononni de: La'a talan maka itlola totpena itora Uplerlawna tkalwieda (1:16-17)
3. Riy honona rhi' do'a-ryap hiala la Uplerlawna (1:18-3:20)
4. Talan maka itlola pa itla' riy mak kla' nana Uplerlawna ralamni (3:21-5:21)
5. Do'a-hala edon nodi plolli owa'an mai ita onnila itora Yesus Kristus ihru ida-ralm ida (Onni 6-8)
6. Israel duratni-waitni nora Kot Kalwieda-Paitiota (9-11)
7. Mormiori-dardiar mak kla' nan Uplerlawna ralamni (12:1-15:13)
8. Nnio'a-niatu hohoni me wniak kalwieda (15:14-16:27)
1
Paulus nwak kalwieda la'a makpesiay la'a Roma
1-7 Ina-nara ama-hyali miy hononmi mak kden la Roma! Mak khorat horat di, de a'u, Paulusa, mak kla' Yesus Kristus hopopanni-lili'irnu. Uplerlawna orgahani ed mak kwaliri-kwalioh nan a' pua Nhopn a lia ukot nohora Kot Kalwieda-Paitiota de, mak kwatiawua Uplerlawna. Kot Kalwieda-Paitiot de Uplerlawna ed mak kano'targ hade la' ululu memna la'a makwohorulu-ktatrulu (nabi). Ir er maka rhorat tar la Puk Lululli ralamni. La'a Kot Kalwieda-Paitiota de enakot nohora A'nani, Itmatromlawanni Yesus Kristus. La'pa tamkek la rimormiori wawannu, de E' de ray Daud duratni-waitni E'a. Mere la'pa tamkek la Orgahi-Orha'a, de E' de Uplerlawna A'nani E'a. Uplerlawna ed mak ktut muemna hade la' ler maka e Nnairi E Nhiw Lululli pa Namori owa'an Yesus la matmiati ralamni. Uplerlawna Ntut wualia ralam kalwiedni mai a pua Nwalir nian alia' mak kodia E lirni-tunnu, totpena hota awuatutu-wuaye'a hairi-hairi maka Yahudi atia'a re pa ratu ratlina-ratailla E lirni-tunnu onnila ir pesiayni la E'a, totpena Enlernana ya'uli-yawedi. Uplerlawna Ntutga ralam kalwiedni de mai a'u onnila Yesus Kristus hihi'ini mai a'u. Ne mak kden la Roma miy miana, Uplerlawna Npolg olek wali miy pia mlier teman la Yesus Kristus mutnu-rahanu.
Pede ina-nara ama-hyali maka Uplerlawna Nsaynia, me maka Uplerlawna Npolga pa mhi'a E mutnu-rahanu, agal horat di tiy miy. Awuak de Uplerlawna, it Amlawanni de, Nora Itmatromni Yesus Kristus pena ed mak kala ra'ani-pallu me kalwiedni-paitiotni tiy miy.
Paulus ralamni nahepru onnila inni-narni la'a Roma pesiayni me niwra la ntomra-nnah'a ira
Ina-nara ama-hyali, maka a'ukot ulga de, onnila Yesus Kristus hihi'ini mai ita pede a'u'uli-uwedi it Uplerlawanni, yoma la'a meni-meni to' pa rakot nohora la'a miy pesiaymi e naruri olek la Yesus Kristus de pede riy ratlin nana. Asiumbain de aghorat rer miy. Uplerlawna orgahani ed maka Ha Natlin reria li'ru ri. Id mana edonna u'itra-ulawna. Uplerlawan de ed maka aghima-rie'a E kniarni de agal toto' memna a ralmu pa agala ukot nohora Kot Kalwieda-Paitiota la'a A'nani Yesus Kristus.
10 Uplerlawna Nat niohor de nhi'inde asiumbain rer miy. Ne awuak de hota Uplerlawna Nal talan ma' a pua totpena atiy tiomra-niah'a miy. Yoma mahnek oleka la a'g edon liernan talan pa atiy. 11 Yoma awuakwak totpa alia' miy die totpena aghi' aruri miy pesiaymi. 12 A ralma-rio'ru de totpena a pesia'yu nod miy lia ga'a me miy pesiaymi de nhi' a pua uhepur nohora Uplerlawna totpena it rewre'wa pa idma nhi' arur nian ida.
13 Awuak de ina-nara ama-hyali miy hononmi totpena miat memna, de liawanni olek maka giwra tiy miy die, mere a'g edon liernan talla. Mere agiwra tiy totpena a li'ru-tu'nu nodi miy pesiaymi la ga'a pa emekwalima a knia'ru maka kodi olek riy maka Yahudi atia'a la'a geni-tiena dom to'a pa rla ga'a. 14 Yoma Uplerlawna Nhopan pa alia ukot nohora Kot Kalwied de la riy maka kwatiawua hairi meni-meni to'a, mak kla' olek la iskola onde mak edon kla' ma'ta, mak klernohora makden Yunani nhiolli-lietni me edonna. 15 La' hade pede awuakwak totpa alia ukot nohora Kot Kalwieda-Paitiot di tiy miy la letlawna Roma wali.
Kot Kalwieda Paitiot de Uplerlawna rurni-laini edade pa nod it la yamori-yalewna
16 A'g edon muola-mua'a la ukot nohora Kot Kalwieda-Paitiot de. Apuesiay memna, de kot de de Uplerlawna rurni-laini edade totpena na Namori-nalewna makpesiay honona, la'a makden Yahudi re, me makden la Yahudi atia'a wali. Kot Kalwied mak kodi yamori-yalewan de rakot nohor plein la makden Yahudi re nhor diewade la'a riy maka Yahudi atia'a re wali. 17 Kot Kalwied de Uplerlawna rurni-laini edade yoma la'a kot de Uplerlawna Nakot nohora emkameni la Enetlia rimormiori pa emeka riy mak kaplol la E yamkekni, totpena tora E' pa it idma nla'a-nmai id de la'a kalwiedni-paitiotni. Talla kmeheni de: itpesiay to'a la Uplerlawna. Hade emekwalima e rhorat targa la Puka ralamni de riwra: “Riy maka Uplerlawna Netlia de ror E'a rkalwied owa'ana onnila ir pesiayni la E'a de hota rmormiori pa nodi liarni.”
Uplerlawna Nwaghala rimormiori yoma irat niohora E'a mere rahmena ra'unni-ramta'ata
18 Uplerlawna-Mempulwatnu mak kden la Ilwo'itu-Darwionema, Ilyamou-Watyatoha Nalharia oleka de, hota hankeranni-ralmha'arni ntuin meman la riy maka kahmena katlina-katailla E'a, me la' walia riy mak khi'a-kyapi do'a-hala. Ir hihi'ini-yapyapni yatyatni-halalli de nwal lia oruli-augewat la pa rahew niana rimormiori gaini totpa edon ramkek nan talla plollola la Uplerlawna. 19 Yoma rimormiori rat niohora Uplerlawna ed rer lia yoma Uplerlawna Nmeh'a neka ed mak kalhari olek hadella' rimormiori it wa. 20 Yoma la' lerni la' Uplerlawna Nakoki-nayapia nohkerna la'pa nma ntut lia ler di, Uplerlawna yehwani maka ta'an niana tamkek nana, de emekto'a E yehwa Uplerlawanni me E plolli-mneheni mak kodi liarni, de rimormiori rat niohora, yoma ramkek nana hya' ed maka Ha Nakoki-nayapi re. La' hade pede rimormiori ta'en niana rwatikil pa riwra iraplin niohora Uplerlawna. 21 Yoma plollolli de rimormiori re ratg oleka Uplerlawna etla. Mere hota emkade ho'mana rakleha nhiu'ru-nhielam ya'unni-yamta'ata la E'a, me rakleh walia nhiorat pa ra'uli-rawedia (rwak terima kasi la) E'a. Rwaldioinia de rimormiori wniarorni-wnialaini rwal lia makpodku, me ralma-riorni re rwal lia melmelli. 22 Riwra ir er mak katu, mere raplin nieka la podaknu lola lelli. 23 Ir edonna rkola tieru-rawur nehla la'a Uplerlawna-Mempulwatnu mere maka ha rkola tieru-rawur nehla la de, de uplera-upmati maka rna'ihla la rimormiori, ma'nu, hamormior miaka kodia lakni wogata, me toki mlawa, niy rehla mak kawrika-kawriai. Ir rhi'a emkade kennama Uplerlawna-Mempulwatnu ed mak kodi plolli pa nodi liarni mere rimormiori nora hamormior honona re hota edon nalo'on wali ne rmati.
24 La' hade pede Uplerlawna Nolin doini rla ralam wamueheni maka kodia ir la ralam yatyata maka kakdeha-kaktiahli re pede hota orgahi idma nhi'a la ida hya' mak kodi molmola-mama'a. 25 Hya' ed mak kaplola la'a Uplerlawna, de ir edon rlernohora, mere rwaldioinia pa rhi'a mak edonna kaplola. Ir edonna rkola tieru-rawur nehla la Makakoki-Kayapia nohkeran di nor lyanti, mere e ra'targho'ola mak Ha Nayap niana pa irkola tieru-rawur nehla la. La' plollolli de Makakoki-Kayap die nampena ed maka ra'uli-rawedia pa nodi liarni. Amin (Plola).
26 Rimormiori rhi' emkare, pede Uplerlawna Nolin doinia rpa rlernohor neka ira ralam yatyata maka kakdeha-kaktiahli re. Pa hota patke'a re nekane edonna emekneka maka rimormiori ha rhi' taru, pa a'na muanke'a nhi'inde ralamni nala a'na patke'a, mere la hadi de a'na patke'a idma ralamni nal ida. 27 La'pa a'na muanke'a mana emkade wali. Ir edonna rlernohora plollolli pa ratiana a'na patke'a mere orgahi ralamni na'hira pa ra'oin nan targho'a a'na muanke'a wali. Idma nhi' amola-ma' ida. La' hade pede irlernana hihi'ini-yapyapni de wniahlani maka edonna npa'eini-npahal la'a ira nhiolli-lietni mak kpohra-kgehpa de.
28 Ne la' wali de, rimormiori re edonna rhe'du nana Uplerlawna pede Uplerlawna Nhur dioinia ir la kirkirni-ralma-riorni yatyatni-halalli mak kakdeha-kaktiahli pa reiniande ir edon rhi'a-ryapia plollolli. La'a plolli de yana ir rhi' emkade. 29 Ir ihranu ralamni re rpenpuenu tetem la yatyatni-halalli mak kpenpuen niohora ralma-riora wniunu-wnienna, kokokna-rariarni, putra-palka, ra'ante'a-rakamna'a, id ralamni nod rer lia ida hyonni-hyanni, me idma na'un tar ida, idma nod niur lia ida. 30 Rape'el toto' meman la rwahaur pa ralernia rira nan kalwiedwedni. Ne ratulu-rapetna me rakleha yatota-yawawa mak kodia ir la ralam mehra la Uplerlawna, ne rpo'on atulu-apetna inonni. Ratu rwahaka hihi'a-yapyapia warwuaru pa ra rna'ohma yatyatni-halalli. Rhoklira-rpah' waw la inni-amni. 31 Raplinu rwaror nohora hya'-hya'a mak kaplola. Ta'en niana riy rpesiay ira. Ir rakleha nhiol kalwiedweda la ir rimormior wiali pa edon rtutga sniayanni la. 32 Iratga de Uplerlawna deullu-tatarni niwra la'pa he' ed mak klernohora nhioli-lieta yatyata re, de hota rukum penna de. Emkade wal ho'mana ir rhi' ma'ta yotyotni-yatyatni ne rerehnian de irwayow nohora riy meheni mak khi' walia nhioli-lieta re.