Tnejil Tuꞌj Juan
Ajo uꞌj lo tzꞌibꞌin tuꞌn Juan, a tsanjil Jesús, a kubꞌ tzꞌibꞌin teꞌ Tbꞌanil Tqanil, a Tuꞌj Juan. Ajo t-xilin tojjo tuꞌj lo, qa nqkꞌuꞌjlin Dios, il tiꞌj tuꞌn qkꞌuꞌjlin te qibꞌ qxolx.
Tojjo uꞌj lo, nyolin Juan oxe tumil a nimxix t-xilin. Atzin tnejil tumil ntqꞌmaꞌn, qa ma qo tzaqpaj toj il noq tuꞌn tkyimlin Tkꞌwal Dios, a Jesucrist, quꞌn ankye teꞌ, a tzunx nbꞌet toj qxopin noq tuꞌn tpaj til, nlayx ten teꞌ tmujbꞌil tibꞌ tukꞌa Dios, quꞌn ate Dios spikyꞌin (1:5).
Atzin tkabꞌ tumil, a nimxix t-xilin tojjo uꞌj lo, atzin tuꞌn tten qkꞌuꞌjbꞌil qibꞌ qxolx, quꞌn atzinte nukꞌbꞌiljo qꞌontz te tnejil tuꞌn Jesucrist. Ex axsa tzajnin tiꞌj Dios, quꞌn ate Dios nimxix tqꞌaqꞌbꞌil tkꞌuꞌj (4:8, 16), ex quꞌn ate Dios s-ok kꞌuꞌjlinqe te tnejil (4:19). Quꞌn qa at jun nqꞌmaꞌnte qa at tmujbꞌil tibꞌ tukꞌa Dios, ex qa mi nchi ok tkꞌuꞌjlin tukꞌa, ntiꞌ tmujbꞌil tibꞌ tukꞌa Dios ikyjo.
Atzin toxin tumil, a nimxix t-xilin, a qnimbꞌil twutzxix. Nyolin Juan kyiꞌj junjun, a ma tzꞌex kypaꞌn kyibꞌ kyxol (2:19), a mina xi kynimin qa a Jesús, Tkꞌwal Dios, a Kolil te jun majx. Ex nkubꞌ kyewin qa ul kanin Jesús tzaluꞌn twutz txꞌotxꞌ tukꞌa t-xmilil tzeꞌnku qe, tuꞌn tok te chojbꞌil qil.
1
Ate Jesúsjo a Yol te chwinqil te jun majx
1 Nxi ntzꞌibꞌinjiꞌy luꞌn kyiꞌjjo a noq attaql, teꞌ naꞌmxtaq tkubꞌ xkye tkyaqil,✡Jn. 1:1; 1Jn. 2:13-14. a Yol te Chwinqil,✡Jn. 1:4; 6:68. a o tzꞌok qbꞌiꞌn, ex a o tzꞌok qkaꞌyiꞌn kyuꞌn qwutza, ex a o tzꞌok qmikoꞌn kyuꞌn qqꞌobꞌa.✡Jn. 1:14. 2 Atzin Yoljo te Chwinqil lo, a o tzaj tyekꞌin tibꞌ tzaluꞌn twutz txꞌotxꞌ,✡Jn. 1:14, 18. ex awokuy o qo lonte, ex xi qqꞌoꞌn jun tqanil kywutz tkyaqil xjal. Ex ikyxjo, nqo qꞌoꞌn tqanil kyeꞌy tiꞌjjo chwinqil lo te jun majx. A chwinqil lo, ax Jesús, a attaq tkꞌatz Manbꞌaj, ex o tzaj tyekꞌin tibꞌ qeꞌy. 3 Ex nxi qchikyꞌbꞌinjiꞌy luꞌn kyeꞌy, a o qliꞌy, ex o qbꞌiꞌy, noq tuꞌn kymujbꞌin te kyibꞌa junx qukꞌiy, ikyxjo tzeꞌnku nqmujbꞌin qe qibꞌ tukꞌa qMan ex tukꞌa Tkꞌwal, a Jesucrist. 4 Tuꞌntziꞌn, nxi qtzꞌibꞌiꞌn tkyaqiljo lo kyeꞌy, tuꞌntzin tnoj kyanmiꞌn tukꞌa tzaljbꞌil. 5 Atzin tqaniljo tzaj xnaqꞌtzin qeꞌy tuꞌn Jesús, ex axsin nxi qxnaqꞌtzinjiꞌy kyeꞌy. Atzin tqaniljo lo: Ate Dios spikyꞌin, ex ntiꞌx chꞌin qxopin tukꞌa. 6 Qa ma txi qqꞌmaꞌn at qmujbꞌil qibꞌ tukꞌa Dios, exsin nqo bꞌetl toj qxopin, tuꞌn qbꞌinchin il, nqo nikyꞌin yol tuꞌn ikyjo; ntiꞌx njapin yol quꞌn, a twutzxix. 7 Me qatzin nqo bꞌet toj spikyꞌin, tuꞌn qbꞌinchin wen, tzeꞌnkuxjo te Dios, a spikyꞌin, attzin qmujbꞌil qibꞌtz qxolx qkyaqilx, quꞌn oꞌkx tchkyꞌel Jesús n-el ttxjoꞌn tkyaqiljo il.
8 Qa ma txi qqꞌmaꞌn jaꞌlin qa ntiꞌ il toj qchwinqil, nkubꞌ qsbꞌuꞌn qibꞌ quꞌnx qibꞌ, quꞌn atzin Yol twutzxix ntiꞌ toj qanmin. 9 Me qa ma jatz qpaꞌn qil, kqebꞌil qkꞌuꞌj tiꞌj qMan Dios, a tzꞌaqlexix, tuꞌn njapinxix Tyol, ex tuꞌn tnajsin te qil, ex tuꞌn ttxjoꞌnte tkyaqil nya bꞌaꞌn toj qchwinqil. 10 Qa ma txi qqꞌmaꞌn qa bꞌajxi qo bꞌinchin il, n-ok qqꞌoꞌn Dios nyakuj jun nikyꞌil yol, ex ntiꞌ Tyol toj qanmin.✡Pr. 20:9.