1 Werman, kykaꞌyinktziꞌn, nimx teꞌ qMan Dios tqꞌaqꞌbꞌil tkꞌuꞌj qiꞌj; ma tzaj tqꞌoꞌn qoklin te kꞌwalbꞌaj.✡Jn. 1:12. Me aye xjal nya nimilqe mi n-el kynikyꞌ qe, quꞌn tuꞌn naꞌm tel kynikyꞌ te qMan Dios. 2 Me awotzinqe ma qo ok te tkꞌwal qMan Dios. Me naꞌmxixpe qlonte tzeꞌn qo okila, aj tul Jesús juntl majl. Quꞌn ex bꞌiꞌn quꞌn, qa aj tul, qo okil ikyxjo tzeꞌnku a, quꞌn k-okil qkaꞌyin ikyx tzeꞌnkuxix t-xilin. 3 Ex alkye taj tuꞌn tok ikyjo, il tiꞌj tuꞌn tsaqsin te tibꞌ toj tchwinqil, ikyx tzeꞌnku te Jesús saqxix teꞌ toj tkyaqil.

4 Me ayetziꞌn bꞌinchil il, n-el kyiꞌjlin tnukꞌbꞌil Dios, quꞌn tuꞌn atzin il nbꞌant kyuꞌn, atzin n-el iꞌjlinte tnukꞌbꞌil Diosjo. 5 Ex bꞌiꞌn kyuꞌn, qa ul Jesús tzaluꞌn twutz txꞌotxꞌ te najsil qil, quꞌn oꞌkx te Jesús ntiꞌ il xbꞌant tuꞌn.✡Jn. 1:29. 6 Tuꞌn ikyjo, tkyaqil xjal, a o tmujbꞌe tibꞌ tukꞌa, mi nbꞌetl toj il. Me ayetzin xjal nchi bꞌet toj il, naꞌm tel kynikyꞌ te, ex nya ojtzqiꞌn kyuꞌn.

7 Ayiꞌy werman, mix aꞌl jun kubꞌ sbꞌun kyeꞌy. Quꞌn ankye teꞌ wenx nbꞌant tuꞌn, ex wenx teꞌ, ikyx tzeꞌnku te Jesús wenxix teꞌ. 8 Me atziꞌn a bꞌinchil il, te tajaw ilx teꞌ, quꞌn ate tajaw il bꞌinchin il te tnejil. Tuꞌntzin ikyjo, ul Tkꞌwal Dios tzaluꞌn twutz txꞌotxꞌ tuꞌn t-xititjo tkyaqil taqꞌin tajaw il.✡Eb. 2:14-15.

9 Mix aꞌl jun xjal aku tzꞌok te tkꞌwal qMan Dios qa kukx nbꞌetjo toj il, quꞌn tuꞌn o tzꞌok te tkꞌwal Dios, ex quꞌn o tzaj tqꞌoꞌn Dios jun akꞌaj tchwinqil. Tuꞌnpetziꞌn, nya tuꞌn tbꞌinchin il, quꞌn o tzꞌok kꞌwalbꞌaj te Dios. 10 Quꞌn bꞌiꞌn quꞌn alkye qeꞌ tkꞌwal Dios, ex alkye qeꞌ tkꞌwal tajaw il: Quꞌn aye, a nya bꞌaꞌn kybꞌinchbꞌin, ex mi n-ok kykꞌuꞌjliꞌn txqantl nimil, nya teqe te Diosjo.

11 Atzin yoljo lo, a kybꞌiy atxix ojtxe: Tuꞌn tok qkꞌuꞌjlin qibꞌ qxolilex.✡Jn. 13:34; 15:12. 12 Ex mi qo ok tzeꞌnku te Caín, a xi tqꞌoꞌn tibꞌ te tajaw il. Ex tuꞌn ikyjo, kubꞌ tbꞌyoꞌn titzꞌin.✡Gen. 4:8. ¿Me tinquꞌnil kubꞌ tbꞌyoꞌn? Quꞌn tuꞌn nya wentaq tbꞌinchbꞌin Caín, quꞌn tuꞌn tlochꞌj tanmin tiꞌj titzꞌin, quꞌn atzin tbꞌinchbꞌin titzꞌin wentaq taꞌ.

13 Ayiꞌy werman, mi chi jaw kaꞌylaja qa ma chi el ikyꞌin kyuꞌnxjal, ayeꞌ nya nimil. 14 Awotzinqe, a o qo etz toj kyimin, ex ma qo kanin toj jun akꞌaj chwinqil,✡Jn. 5:24. ma tzꞌel qnikyꞌ te, tuꞌn tkꞌuꞌjbꞌil qkꞌuꞌj kyiꞌj txqantl nimil. Ankye ntiꞌ tkꞌuꞌjbꞌil tkꞌuꞌj kyiꞌj txqantl, naꞌm tkanin tojjo akꞌaj chwinqil, ex axsi taꞌye toj kyimin. 15 Quꞌn tkyaqilxjo a n-el tikyꞌin txqantl nimil, ikyx tzꞌeleꞌ tzeꞌnku jun bꞌyol xjal. Ex bꞌiꞌn kyeꞌ kyuꞌn, qa ntiꞌ jun bꞌyol xjal aku ten chwinqil te jun majx. 16 Me qalatzin qe, ma tzꞌel qnikyꞌ te a tqꞌaqꞌbꞌil tkꞌuꞌj Klolqe Jesús: Quꞌn xi tqꞌoꞌn tchwinqil noq tuꞌn qpaj; exsintla ikyxjo qetz, tuꞌn t-xi qqꞌoꞌn qchwinqil tuꞌn kypaj txqantl.✡Jn. 15:13. 17 Me qa at jun, a at chꞌin at te, exsin qa noq s-ok kyim tiꞌjjo juntl, a ntiꞌx chꞌin at te, ex mi saj chyoꞌnx tanmin tuꞌn t-xi tmojin, ¿Ma atpela tqꞌaqꞌbꞌil tkꞌuꞌj Dios toj tanmin? ¡Ntiꞌ! 18 Tuꞌn ikyjo, ayiꞌy werman, atzin tqꞌaqꞌbꞌil qkꞌuꞌj nya noq tuꞌn tkubꞌ qyolin, qalaꞌ tuꞌn tkubꞌ qyekꞌin tukꞌa qbꞌinchbꞌin qa twutzxix.

19 Ikytzin tumiljo, qa matxixix qo ok te tbꞌanil nimil, ex ikytzin kqebꞌil qkꞌuꞌjjo twutz Dios. 20 Mi kubꞌ qbꞌisin toj qanmin qa ntiꞌ qoklin twutz Dios. Qalaꞌ il tiꞌj tuꞌn tel qnikyꞌ te, qa a qoklin tzajnin tiꞌj qMan, a ojtzqiꞌn tkyaqil tuꞌn. 21 Ayiꞌy werman, nimxix nkꞌuꞌja kyiꞌja. Qa ntiꞌ nkubꞌ qximin ikyjo toj qanmin, at qꞌuqbꞌil qkꞌuꞌjtz tiꞌj Dios. 22 Ex noq tuꞌn qbꞌinchbꞌin, ex tuꞌn nkubꞌ qnimin tnukꞌbꞌil, at qꞌuqbꞌil qkꞌuꞌj, tuꞌn ttzaj tqꞌoꞌn Dios, ikyx tzeꞌnku nxi qqanin te. 23 ¿Ex altzin kye tnukꞌbꞌil Dios? Atzin ma txi qnimin Tkꞌwal, a Jesucrist, ex tuꞌn tok qkꞌuꞌjlin qibꞌ qxolile, ikyjo tzeꞌnku o tqꞌma.✡Jn. 13:34; 15:12, 17. 24 Ayetziꞌn nchi kubꞌ nimin teꞌ nukꞌbꞌil lo, najleqe tukꞌa qMan Dios ex Dios najle kyukꞌa. Ex ma tzꞌel qnikyꞌ te qa najle Dios qukꞌa, noq tuꞌn Xewbꞌaj Xjan, a o tzaj tqꞌoꞌn toj qanmin.