Tnejil Tuꞌj Pabl kye Nimil aj Tesalónica
Toj tkabꞌ tbꞌe Pabl, teꞌ t-xiꞌ qꞌmal Tbꞌanil Tqanil, kubꞌ xkye Ttanim Dios toj Tesalónica, a tnejil tnam toj Macedonia, jun txꞌotxꞌ te Rom (Kybꞌi. 17:1-8).
Attaq Timotey tukꞌa Pabl toj Atenas, ex teꞌ kyetz toj Atenas, bꞌeꞌx xi tsmaꞌn Pabl Timotey tuꞌn t-xiꞌ toj Tesalónica noq tuꞌn tqꞌuqbꞌit kykꞌuꞌj nimil tuꞌn kyweꞌxix wen. Atzin teꞌ tpon Pabl toj Corint, bꞌeꞌx ul meltzꞌaj Timotey tukꞌa ex tukꞌa tqanil tbꞌanilxix kyiꞌj nimil toj Tesalónica.
Exla qa nim yajbꞌil ikyꞌx kyuꞌn, ayetzin nimil antza i ok te jun tbꞌanil yekꞌbꞌil kywutz txqantl nimil toj tkyaqiljo txꞌotxꞌ anetziꞌn. Ntiꞌ juntl tumil tuꞌn tbꞌant tuꞌn Pabl, noq oꞌkx tuꞌn t-xi tzꞌibꞌit jun uꞌj kye. Tukꞌa nim tzaljbꞌil, ex aqꞌbꞌil chjonte te Dios, ntzaj tnaꞌn a tqꞌijil, tej tten junx kyukꞌa nimil toj Tesalónica, ayeꞌ waꞌlqexix toj kynimbꞌil. Nchex tkujsin tuꞌn kychꞌiy wen toj kynimbꞌil, tzeꞌnkuxjo kubꞌ kyyekꞌin te tnejil. Exsin nyolin tiꞌjjo xnaqꞌtzbꞌil te kyjawlin itzꞌje kyimnin exsin tkabꞌ tulil qAjaw. Aye kabꞌe xnaqꞌtzbꞌil luꞌn nimxix i tzalaj nimil tiꞌj, teꞌ tel kynikyꞌ te, ex teꞌ t-xi chikyꞌbꞌit kye. Nxi tkujsin Pabl a xnaqꞌtzbꞌil luꞌn, noq tuꞌn kyayon tkyaqil tajbꞌil ex t-xim qMan tukꞌa qꞌuqbꞌil kykꞌuꞌj.
Juntl tumil xnaqꞌtzbꞌil kyojjo kabꞌe uꞌj kye nimil toj Tesalónica, ajo Crist ax Diosjo. Ilaꞌku maj nyolin qa junx taꞌ Crist tukꞌa Manbꞌaj.
1
Jun qꞌolbꞌil
1 Ayiꞌn Pabl nxi ntzꞌibꞌinjiꞌy uꞌj luꞌn, junx tukꞌa Silvano ex Timotey. Nxi ntzꞌibꞌiꞌn kyeꞌy, ayiꞌy Ttanim Dios toj tnam Tesalónica,✡Kybꞌi. 17:1. a ayiꞌy ma tzꞌok kymujbꞌin kyibꞌa tukꞌa qMan Dios ex tukꞌa qAjaw Jesucrist. Noqit aku ten t-xtalbꞌil ex tnukꞌbꞌil qMan Dios kyibꞌaja.
Qo ok te jun yekꞌbꞌil kye txqantl
2 Kukx nqo qꞌoꞌnjiꞌy chjonte te qMan Dios kyiꞌja, 3 ex kukx nchi tzaj qnaꞌnjiꞌy toj qnaꞌj Diosa, tuꞌn nchi aqꞌniꞌn tuꞌn kynimbꞌila, ex tuꞌn nchi ajbꞌiꞌn tuꞌn tqꞌaqꞌbꞌil kykꞌuꞌja, ex tuꞌn waꞌlqexixa toj kynimbꞌila, noq tuꞌn qꞌuqlexix kykꞌuꞌja tiꞌjjo a o tzaj tqꞌmaꞌn qAjaw Jesucrist, exla qa nim ma tzikyꞌx kyuꞌn. 4 Ayiꞌy erman, kꞌuꞌjlinqiꞌy tuꞌn qMan Dios; bꞌiꞌn quꞌn qa ax o jaw skꞌoꞌn kyeꞌy, 5 quꞌn tej t-xi qqꞌmaꞌn tqanil kolbꞌil kyeꞌy, nya noq toj qnabꞌla quꞌnx qibꞌxa, qalaꞌ tuꞌn tipin Xewbꞌaj Xjan. Qꞌuqlexix qkꞌuꞌja tiꞌj, qa twutzxixjo Tbꞌanil Tqanil kolbꞌil, ex bꞌiꞌn qchwinqila kyuꞌn, tzeꞌn xqo bꞌetiꞌy kyxola, noq tuꞌn kyel wena twutz Dios. 6 Tzeꞌn kyeꞌ ma chi ok lipeꞌy tiꞌjjo yekꞌbꞌil quꞌn, ex tiꞌjjo yekꞌbꞌil tuꞌn qAjaw Jesucrist. Ma txi kyniminjiꞌy Tbꞌanil Tqanil kolbꞌil tukꞌa tzaljbꞌil, a tzajnin tuꞌn Xewbꞌaj Xjan, iꞌchaqx nimx s-ikyꞌx kyuꞌn.✡Kybꞌi. 17:5-9. 7 Me ikytziꞌn, ma chi okajiꞌy te jun yekꞌbꞌil kye nimil tojjo txꞌotxꞌ te Macedonia ex te Acay. 8 Ex kyuꞌn, ma txi laqꞌe Tbꞌanil Tqanil qAjaw jaꞌlin, nya noq toj Macedonia ex toj Acay, qalaꞌ toj tkyaqil twutz txꞌotxꞌ, jaꞌ ma chi bꞌetiꞌy. Ma tzꞌel kynikyꞌxjal tiꞌjjo kynimbꞌila tiꞌj qMan Dios, ex tuꞌn ikyjo, nya il tiꞌj tuꞌn qyoliꞌn kyiꞌja kyukꞌa, 9 quꞌn ayex kyexjal nchi tzaj qꞌmaꞌnte qeꞌy, tzeꞌn xqo kꞌmetiꞌy kyuꞌn, tej qpoꞌn kyxola. Ex nchi yolin tiꞌjjo tbꞌanil o qo kubꞌ kywutzliꞌn. Ex ntzaj kyqꞌmaꞌn qeꞌy tzeꞌn kyij kytzaqpinjiꞌy jniꞌ kyilbꞌiyil kydiosa, ex tuꞌn kyxi lipeꞌy tiꞌjjo Dios itzꞌxix ex twutzxix, ex tuꞌn kyajbꞌiꞌn te. 10 Ex nkyqꞌmaꞌn qa qꞌuqlik kykꞌuꞌja tiꞌjjo tulil juntl majl Tkꞌwal Dios toj kyaꞌj, a jatz anqꞌin juntl majl tuꞌn kyxol kyimnin, ex ax kklolqe tojjo kawbꞌil kujxix, a tzul kanin.